Neanderthal (2/3)

Una nuvella di Stéphane Ancey

II.

Museum di Storia Naturale, Parigi, vennari u 05-10-2012, ultimu ghjornu di l’80esimu Cungressu Naziunale d’Antrupulugia.

-         « Aiò aiò fatela finita ! à mumenti ci vulete fà crede chì ci sò i bigfoot nu e Pirenee ! »

A cunferenza di Bilal Arriteguy si compie ind’una scaccanata sguasi generale, chì marca male cù a sulennità di u locu.  Rossu imbagatu, sticchitu, u circadore fala da a tribuna cù un sintimu di rabbia è di vergogna ch’ellu ùn hà mai cunnisciutu sin’à oghje. Eppuru à principiu i participanti parianu intarissati da u so studiu nant’à a prisenza di una piccula pupulazione d’omi salvatichi ind’è l’Hindu Kush, à a fruntiera trà l’Afghanistan è u Pakistan. Ma u so naturale timicu, dui o trè incertezze nu u so discorsu… l’anu fattu inciampà.  L’assaltu finale, urchestratu da u Prufissore Lanchevin, chairman per l’uccasione, l’hà ammazzatu :

-         «  L’antrupulugia hè una scenza seria chì si deve rispittà. È si deve dinù rispittà ‘stu locu carcu di storia chì ci accoglie oghje. È voi, quì, ci parlate di barmanù, di yeti o chì ne socu… à ringraziavvi o Monsieur Arriteguy. A prossima cunferenza tratta di… »

Eppo’ à Bilal li hè mancatu sopr’à tuttu un elementu cuncretu per cunfirmà e so ipotese. Dop’à parechji sugiorni di parechji mesi quallà, à mez’à i pastori, hè vultatu cunvitu di l’esistenza di una forma umana astra cà Homo Sapiens, una forma arcaica, pò esse Homo Neanderthalensis, c’avaria sopravissutu sin’à oghje in certi lochi scantati cum’è l’Hindu Kush. Ma ùn basta à esse cunvitu per cunvince à l’astri.

Quand’ell’hè partutu quallà a prima volta, era per illustrà a so tesa d’antrupulugia nant’à l’interazzione trà Homo Sapiens è l’astre spezie umane, Homo Neanderthalensis in particulare, longu i millenarii d’evoluzione. Tandu, st’omu salvaticu, stu barmanù cum’elli u chjamanu, per ellu era una fughjichja è basta ! Ma à rombu di cuntà e fughjichje omu finisce per credeci, è era intarissante di pudè studià a riprisintazione chì e pupulazione di l’Hindu Kush ne avianu. Ebbè sta riprisintazione era quella d’un mammiferu salvaticu più ch’è scarsu, sopr’à tuttu st’ultimi anni. Ma manc’appena una fola : Quelli chì ùn l’avianu mai vistu dicianu « andate à vede à u tale »… Quelli chì l’avianu vistu ne parlavanu zenza fanne un mostru terribule di dui metri ma solu qualcosa di nurmale, chì facia parte di l’ambiente, ch’elli avianu sempre cunnisciutu. Era sta manera di parlanne, zenza passione particulare, zenza fizighette, chì stupia u più à Bilal. Ma oghje davant’à stu publicu ‘‘civilizatu’’, a fizighetta… ci avaria vulsutu à manighjalla !

« Bah ! S’eramu stati à l’epica di Giordano Bruno, o puru di Galileo Galilei saria astru c’à stu calore in faccia ! » si dice Bilal, filosoffu, per truvà qualcosa di pusitivu in sta ghjurnataccia. Mentre ch’ellu ride solu di a so cacciata, falendu e scale cum’è abbanbanatu, una donna  u chjappa pè u bracciu è l’assalta di parolle :

-         « Scusatemi o Monsieur Arriteguy, scusatemi… ùn vi vogliu dirangià, ma sò vinuta apposta per a vostra cunferenza. À dilla franca aghju certe ragione euh… prufiziunale, per intarissammi à stu sugettu… Ma ùn mi sò mancu prisintata. Mi chjamu Faustine… Faustine Vals. »

Ci vole à dì chì Bilal Arriteguy, anzora, hà parlatu appinuccia di a biolugia di u barmanù pakistanese : Sorte piuttostu à l’attrachjata, o puru di notte, perchè di manera generale fughje l’Homo Sapiens. Magna un pocu di tuttu, frutti, arbiglie, è carne quand’ella li casca. Per tumbà un animale li casca addossu è li tronca u collu. Aspessu si beie u sangue è magna u fegatu prima, perchè u so stintu li cummanda di fà cusì. Si sà ghjuvà di certi arnesi rudimentali ma ind’è l’Hindu Kush nè ammaestra u focu nè si veste. Ancu di grazia u so pelu pare piuttostu quellu d’una scimia cà quellu d’un omu. In fin’ di contu u so modu di campà s’assumiglia di più à quellu di l’orsu c’à u nostru. Hè per quessa chì, per e pupulazione muntagnole d’Auropa, di l’Alpe o di e Pirenee per esempiu, a fruntiera trà l’orsu è l’omu salvaticu ùn hè mai stata cusì chjara… Quandu Bilal hà datu l’esempiu di l’omu salvaticu di e Pirenee, à a fine di a so intervenzione, a maiò parte di a ghjente l’hà pigliatu à a risa. Micca Faustine.

-         « Ch’elli ci sianu sempre omi di Neanderthal in Auropa ùn ci credu micca » dice Bilal dopu una discursata di sguasi un ora in caffè cù Faustine. « Ci sò stati. Ci sò stati ùn hè tantu ma avà sò spenti. Eranu numarosi 40.000 anni fà, in core di u Würm, quandu chì e timperature eranu 5°C più fresche c’à oghje. Tandu, Sapiens hè vinutu à stallassi. Ufficialmente, Neanderthal s’hè spentu 30.000 anni fà. Aghju parechji elementi per pinsà ch’ellu era sempre prisente pocu fà in Auropa Occidentale, forse chì à u principiu di u XXesimu seculu ne firmava uni pochi. Avà s’ellu ne ferma appena ind’è u mondu, si stanu ind’è l’Hindu Kush, o ind’è e muntagne di l’Ural, pò anch’esse… »

-         « Ma cumu spiigà chì i Neanderthal, s’elli ci sò sempre, campinu cum’è bestie, ch’elli appiinu persu tutte e sò caratteristiche umane ? » taglia Faustine. « Aghju intesu dì ch’ell’eranu assai vicinu à noi, ancu culturalmente… Vogliu dì : si vistianu, adupravanu arme è arnesi, intarravanu i so morti… Eppo’ ch’elli campinu solu in altitudine, spugliati in Cristu, què dinù mi dirangia… d’accordu sò piluti ma… »

-         « Ùn vi scurdate chì sta razza d’omi s’hè sparta quandu chì l’Auropa era un cuntinente cutratu. Ùn anu nulla à chì vede cù noi per ciò chì tocca à a resistenza à u fretu. E muntagne e più alte fubbenu per elli un rifugiu naturale à a fine di u Würm, cum’è per i stambecchi, e pernice bianche, e levre variabile, eccetera… chì nanzu stavanu in piaghja. Per risponde à a prima quistione, hè più difficiule ma, d’appres’à mè, hè un fattu culturale. Per un dettu s’è no sciacchemu una famiglia d’Homo Sapiens nant’un isula diserta : o morenu, o s’elli campanu, anu da campà cum’è bestie. Un anu micca da invintà da per elli u telefonu o a televisione. Per mè ùn s’anu mancu da veste, è s’è i parenti ùn sanu micca accende u focu, i figlioli ùn saparanu mancu più ciò ch’ell’hè u focu… Hè u numaru, a cultura, a tramandera chì face a forza di Sapiens. Tuttu què Neanderthal l’avia è l’hà persu quand’ell’hè statu sparnicciatu. » 

À Faustine sta spiigazione li pare linda… Qualchì stonda di silenziu, si vardanu. Bilal si dice chì finalmente sta ghjurnata ùn hè stata cusì pessima. Ma a so passione ripiglia a suprana :

-         « V’aghju da dì qualcosa… postu ch’ell’esistenu da veru iss’omi salvatichi, omu si pò dumandà perchè ùn ci hè micca A prova chì accerta a so esistenza. Ebbè mi cridarete o micca ma ogni volta chì qualchissia a tinia, STA prova… u corciu… hà finitu male. Ùn vi parlu micca di maledizzione o qualcosa cusì, eiu à e maledizzione ùn ci credu… Ma hè cusì, una spezia di fatalità, è s’e vi contu quelli stalvatoghji, andate chì u vostru pilutu pireneanu u lasciate corre… »

-         « È voi ? l’avete da lascià corre ? »

« Eiu à e maledizzione ùn ci credu… »

Neanderthal (1/3)

Una nuvella di Stéphane Ancey

I.

Pau, Bearn, Luni u 27-08-2012 versu 10 ore di mane.

-         « Allò, Faustine ? quì hè Larrieu. C’è statu torna un sterpu in la valle d’Aspe. Infine dicu un sterpu ma c’hè solu una pecura morta. Da l’avà ùn si sà ciò ch’ellu hè. Sempre listessa fattura… Ci vole chè tù colli à vede, per rendeti contu soprallocu… Ti docu u locu pricisu, aspetta… »

Faustine ùn si face micca prigà per cambiassi, ricote i so attrazzi è andassine. Sciacca u so sacchittone nu u 4x4 è… via ! Hè per quessa ch’ella face stu mistieru, micca per stà chjosa trà quattru muri chì i scartafacci, à ella, li garbanu pocu è micca… Hè un mistieru, ma nanzu tuttu hè una passione. Sopr’à tuttu ‘sse stonde passate nant’à u tarrenu. Quandu chì Jean-Benoît Larrieu, u direttore di l’UGP (Uffiziu di Gestione di i Predatori) publicò un annunziu per custituisce a so squadra dece anni fà, vidì ‘ssu postu di rispunsevule scentificu cum’è un’uccasione chì ùn ci vulia à mancalla. Si prisintò cù u so Dutturatu novu frammante è fubbe pigliata. Era a listessa passione per a natura è u salvaticume, soprattuttu quelli di i so lochi pireneani cusì cari, chì l’avia sempre mutivata per fà i so studii di veterinaria. È oghje avia sta furtuna tamanta di pudè addunì a so passione è u so mistieru.

Di sicuru tuttu ùn era sempre cusì faciule. Certe volte i pastori c’avianu persu unu o parechji animali a ricivianu cù una certa sfidatezza. Ch’ella fussi bearnese di ceppu, soca dinù una donna, l’aiutava assai per fassi accittà megliu c’à qualchì technocratu pariginu ! Ma c’era sta lita vechja nant’à l’affare di l’orsu : Aspessu i muntagnoli pinsavanu chì i technichi di u Statu eranu di cumbriccula cù l’eculugisti.  Eculugista, Faustine l’era zenza dubitu, ma micca cum’è certi khmer verdi chì vulianu fà di e so muntagne un santuariu. Ella pinsava chì l’omu duvia tene a so piazza nu l’ecusistema, a piazza impurtante chì era a soia dipoi seculi è seculi di pasturalisimu, seculi è seculi d’invistite sempre listesse c’avianu datu à ‘ssi lochi a so fisiunumia. Tuttu què era un tisoru chì ci vulia à prisirvallu. Ma e bestie, è l’orsu in particulare, ci avianu anch’elle a so piazza. L’orsu di i stalvatoghji, l’orsu di e fole à veghja, l’animale miticu chì persunificava e Pirenee. L’orsu arrittu, mezu animale mezu umanu, l’orsu o l’orcu un si sà più… u solu fattu ch’ellu fussi custì, à spirdà per ‘sse fureste, dava à ‘ssi lochi un’antra dimensione. Strada facendu Faustine si ripassa u filmu di i so dui incontri cù a bestia. Solu dui ! in sguasi dece anni, è quante nuttate in furesta, agrunchjata ind’una posta, cù un mischiu di spiranza è di paura chì li ciangotta u core… quandu chì u ventu in le fronde diventa murtulone, chì u stritu d’un acellu ùn pò esse cà una strega, è chì un ragiu di luna nant’à una rama dissegna e bracce d’un mostru affanosu… è li rivenenu ‘sse fole paisane chì a so mammone li cuntava, di l’omi salvatichi chì stavanu in furesta è chì ne surtianu ogni tantu per chjappassi qualchì giuvanotta…

Un ora di stradone, un quartu d’ora nant’una pista, è per compie sguasi duie ore di marchja. Eccula chì ghjugne. Atteppa versu u stazzu duve ellu c’è digià a ghjente : dui giandarmi, u merre di u paisolu è Pierre Caze, u pecuraghju. E prisintazione fatte, avvianu sin’à u locu di u sfracellu.

-         « Avete fattu cum’è a v’hà detta monsieur Larrieu ? »

-         « Iè o madama » risponde Pierre. « L’aghju trova cusì stamane à ban’ora è ùn aghju più toccu nulla. »

Faustine principia a so ispizzione nant’à l’animale chì ghjace nu l’arba, à l’orlu d’un boscu zeppu zeppu di foi è di ghjallighi. Sangue, poch’è micca. Un travagliu pulitu, sguasi scirurgicale. L’assassinu l’hà troncu u collu, dopu li hà apartu u corpu per magnassi u fegatu è li hà tagliatu un cusciottu per sciaccassilu à l’ascosu.

-         « Cume a saparanu st’animali chì u fegatu hè carcu à vitamine A ? » dumanda u merre. « Lighjaranu e riviste di medicina ? »

-         « O andate ! o sgiò merre ! avà ùn ci hè più nimu chì e leghje ‘sse riviste : si sà tuttu cù internet ! » dice Faustine sempre pronta à dà a corda. Ma si volta subitu versu u pastore, appinuccia scunfitta… « Scusate…  vardate : a carne, a pelle, ùn sò manc’appena mastucate. Nulla à chì vede cù ciò ch’elli ponu fà i cani… »

-         « Dunque saria un orsu ? » dumanda unu di i giandarmi.

-         « Iè, forse. »

Dice cusì ma Faustina dubbiteghja quantunque. Da e prime muntagnere in quà ci hè statu più d’una dicina di bestie morte in cundizione simile. Una o duie à ogni colpu, micca di più, sempre ind’è u listessu rughjone, un settore di vinti chilometri quadrati à pocu pressu, ingiru à a furesta d’Issaux. Ciò chì stona appena à Faustine, hè chì da l’avà ùn ci sia statu un veru scempiu. A sà ella chì quandu l’orsu minaccia, a banda hè talmente spavintata ch’ella si pò ancu lampà sana sana da un tippale. Ma tandu chì sarà ? Una lince ? Ùn si sà mancu s’ella hè prisente nu e Pirenee. Pò esse ancu qualchì pantera, qualchì N.A.C. chì si saria salvatu ? 

Ma ùn vole dì : i pastori accusanu l’orsu ! È dipoi qualchì mese a situazione hè torna à cane pisatu trà elli è l’eculugisti. Per appacià e cose, e cunsigne di u Statu sò di rimpattà e vittime zenza troppu circà à capì. Ci vole à dì chì u pianu di riintruduzzione prevede un rimpattu di 150€ à pecura s’ell’hè un orsu. Astrimente, ci vole à scumbatte cù l’assicuranze. Ma à Faustine, ùn li cunvene micca troppu : di circà à capì hè u so mistieru.

Unu sbagliu giugrafficu

Una nuvella di

Marceddu Jureczek

à Philip K. Dick

A strada di Roma, a noscia galassia nativa, hè fatta à a sumiglia di una granitula di 100 000  anni luci di diamitru.

Hè spessa 1300  anni luci.

Sò 100 milliardi i steddi à cumponala. Ogni stedda pò essa un soli, ogni soli pò fà da sistema cù parechji pianetta, ogni pianetta calchì mondu…

Al dì là, un uceanu scuru, pagnu, strappuntatu da 100 milliardi di galassii tali è quali a noscia.

Stufi di svultulà i schema discrittivi di u Mondu ad ogni scuparta i scintifichi, ani pensu à a nuzioni di «Universu Starminatu». Cusì piantoni i liticheri trà astrofisichi è mistichi.

Ghjacumu Zumbè, Pruligomina di una mudellazioni di l’universu cunnisciutu.

Roccu era impiigatu mudellu ed anonimu. Forsa ùn avarà ma’ intesu mintuvà ad Aristippu di Cirinàica, discipulu sminticatu di Sòcrati, chì appratindia chì una vita senza pinseri avviaia l’omu versu a saviezza è a sirinità ; eppuri Roccu, a so vita, l’avia righjiratu sionti à quiddu anticu precettu. Ùn dava da fà à nisciunu è nimu li dava da fà.

In tuttu si sapia misurà. Parlava cù una boci dolci è lenta ; ùn s’impanzava micca ; biia ma mai ad essa inturcatu ; riccu ùn era ma si stantava un picculu trattamentu chì li bastava da mantenasi.

Tinia à tutti è tutti u tiniani…

Funziunariu di u Ministeru di i Pruvinci Spaziali, u so travagliu li andava propiu da bè. Micca ch’eddu tiressi tanti salti à pichjà annantu à u so urdinatori purtativu millaia di righi di cuurdinati galattichi, in u so catagnu di scagnu, accortu à tanti altri scagni, in un palazzu altu 111 piani, 10 ori à ghjornu, i 6 ghjorni di a sittimani (sionti u tempu di Prima Cintrali, cori di galassia), ogni annu, da nutriscia a Reta d’infurmazioni giugraffichi di u Ministeru.

Anc’assà, c’era madamicedda Rusalia, 33 anni, ùn nasu finu ma finu chì basta, in u scagnu 157, à vicinu à u soiu.

À Rusalia, Roccu l’amava, ma micca d’un amori tontu è scatavoltu, innò. U so amori era patimu è riflittutu. D’altrondi, Rusalia ùn a sapìa. Ùn li cunvinia cusì à Roccu ? Mancaria altru ch’eddu si turbessi a vita cù una donna, chì forsa ci saria vulsutu à spusà, à dichjarà à u Ministeru di u Cuntrollu di i Cittatini (12 cartulari à riempia, s’era rinsignatu aghjà), pò li saria tuccatu à chera i 16 cartulari di u Ministeru di a Prucriazioni pà accuntintà a nova sposa chì di sicuru avaria vulsutu un criampulu. Ma’ ch’edda ni fussi.

Roccu, à l’oziu ùn era po, è tribbulà ùn si vulia tribbulà cù una famiglia à varnà.

Ma l’amori, quali a sà com’eddu pò righjirà è rimiscià a vita di un omu. Macari un omu com’è Roccu, cumpagnu di a paci è di a cuncordia. Rosalia fraquintava un ghjuvanottu di u scagnu 159. Roccu l’avia visti sorta tremindui à tempu da a sala di riposu sinsuriali.

Quidda notti, in u so appartamentu cubu, Roccu si ni steti sveghju. Ogni voltu ch’eddu chjudia l’ochji, i dui amanti, si tuccavani, si liccavani, si turciani com’è dui sarpi in franasia. Comu pudiani essa cusì sputriti ? Comu faciani da ùn truncassi i reni ? Ma u felu di a ghjilusia u si rudia è ghjuntu a mani, Roccu s’era dicisu à faddi calchì scherzu à u so rivali.

Un soli mensu, aciarbu, s’era pisatu senza troppu fretta nant’à a Prima Cintrali. Prumittia d’essa una bedda ghjurnata : suddioni è fumaccia. Ma Roccu t’avia altru à matriculà. Era à dighjà à u scagnu 156, prontu à fà calchì fisica. A sculifatta di Rusalia l’ingannava cù u barnacali di u scagnu 159, Alanu, era cusì ch’edda u chjamava edda, ebbè u so amanti andarà à visitallu à i cunfini i più sversi di l’universu. Cunniscia u mezu di mutà i righi di i scifri in corpu à l’urdinatori. Si ni ghjuvava ogni tantu da accrescia u so creditu alimintariu à a cantina di u Ministeru. S’è a cumbriccula viaghjava pà u magnà, si pò dà ch’edda viaghjessi ancu puri pà 159…

Dumandaria ad essa vulintariu pà tramutassi in i culunii novi di Caronti eddu, unu scogliu in sù li forchi, dù facia u fretu chì basta, un fretu assulutu. Tintu à chì si pigliaria calchì rifritoriu…

Ma di colpu, à l’assumbretta, unu rimori in curridori, i diti chì bulani sopra à i tasti lisci è sparti di l’urdinatori, a porta chì s’apra è u vardianu di u pianu chì s’affacca.

- «Chì ghjà feti quicci 156 ?»

- «Nudda… nienti, ebbè… t’aviu un travagliu chì avanzava da arrisera è…»

- «Nanzi à l’ora ùn hè l’ora. Mi tuccarà à fà unu rapportu à u vosciu capisirviziu 156, ni seti cuscenti ? Par avali, faletivini ghjà in sala di riposu sinsuriali ad aspittà à quidd’altri, hè capita ?»

L’avia corsa brutta. Ùn ci vulia tantu à discorra cù i vardiani di u Ministeru di i Pruvinzii Spaziali. Timiani sempri a visita di una spia mandata da calchì cunglumarata multigalattica ingorda à nutizii capitali.

Ghjustu ghjustu avia spintu u screnu quandu s’apria a porta. Ùn si ni ramintava più l’ultimi cuurdinati ch’eddu avia pichjatu, civa !

In i curridori, l’ascinsori, i sali, i scagni, a piena di i funziunarii sbucciaia da intaccà un ghjornu novu.

In u soiu u scagnu, Roccu era inaffaracciatu à l’usu di sempri. Ma indrentu buddia di un’ aligria maiori. Da quì à pocu ùn lu vidaria più à quiddu ghjuvanottu pratinziunutu.

D’altrondi, anz’ora, in a sala di a cantina, ùn l’avia sculinatu ùn docu è Rusalia magnava cù i cumpagni neci di nienti. Ogni tantu li mandava un surrisu. Quissa po ! ma’ avaria cridutu ch’eddi fessini cusì lestru da mandallu in i sidari à 159.

È Rusalia chì u si gudia d’ochji !

Una sfiacculata rossa nantu à u screnu l’annunciò un missaghju elettronicu. Qual’ sarà à disturballu in u so travagliu ? Rusalia, ma in i scagni erani pruibiti i scambii privati, o tandu u capisirviziu ? Una goccia di sudori li falò longu à i reni.

Aprò u missaghju. Nè Rusalia, nè altru nimu.

Prugramma Alanu 159/0008/75126/128793 sguassatu.

Dati salvi

Sistema uparativu

U ciarbeddu di Roccu viaghjava più lestru cà l’urdinatori i più putenti. Intargava, dubitava, circava. Escì in curridori è a si tracciò versu u scagnu 159. Ghjuntu davanti piantò in forsa.

A paura li turcia i minucci. Timia di capiscia. Pianament’è bè, sghignò a porta. Pusatu à u scagnu, una ghjuvanetta stampittava, spinu vultatu.

- «159 ?» a boci di Roccu trimulava.

- «Isiè, sogu eiu, chì ci hè ?»

si vultò, ùn era più 159.

Roccu turrò à u so postu. Vulia essa sicuru. Andeti à sbulicà a mimoria di l’urdinatori da ritruvà l’uparazioni fatali. Eccula quì. Si feci appariscia u listinu di l’ultimi cuurdinati spaziali utuli da a cosmunivigazioni. Scelsi una stedda à l’isbaragliu, Persefona 19576. Una stedda suligna, cunnisciuta à bona via da eddu solu. Nimu ci farà casu…

Dopu ad una stonda, quidda sfiacculata rossa era quì.

Prugramma Persefona 19576 sguassatu

Dati salvi

Sistema uparativu

À Roccu l’era falatu u sangu à i pedi. Avia capitu.

Ma u puteri, quali a sà com’eddu pò righjirà è rimiscià a vita di un omu.

Quidda sera, nanzi d’inzucchitassi, ci volsini l’ori è l’ori . In ciarbeddu li bugulavani idei, ipotesi, cirtezzi ed incirtezzi. U focu pazzu di l’ambizioni u si rudia tuttu quantu.

T’avia a forza di sguassà à bona via tuttu. Avia acquistatu a putenza smisurata di cumandà à a Reta.

U mondu, l’universu starminatu, i galassii, i steddi, i pianetti, l’omini, ùn sò cà foli, fandogni, bucii. A Reta, eccu a sola virità. Senza a Reta, criazioni micca. A Reta hè a forza chì unisci insemu i pezzi spargugliati di l’universu. A Reta hè a matrici inghjinatrici di i mondi è di l’essari. Ed eddu, l’ avia dumata, a Reta…

U so pinsamentu ùn era ma’ statu cusì lindu, cusì tagliutu. Dumani saparia chì fà.

Un soli mens, aciarbu, s’era pisatu senza troppu fretta nantu à a Prima Cintrali. Prumittia d’essa una bedda ghjurnata di suddioni è di fumaccia. Ma Roccu t’avia altru à matriculà cà l’andatura di u pianetta. Vulia essa Diu.

À st’ora quì, u palazzu furmiculaghju era sempri biotu.

In u scagnu 156, Roccu s’appruntava à incalcà a tasta di validazioni. U vardianu di u pianu sbalangò a porta.

- «156 ? Stu colpu m’eti da spiigà ciò ch’è vo feti quì nanzi à l’ora.»

Roccu li saltò addossu. Era pà divintà Diu è ùn era po micca ‘ssu rompistacca chì u faria faltà. U vardianu, più avvezzu cà eddu à i bracciuti, u catapussò contru à u descu. Roccu inticciò di capu, propiu annantu à a tastera di l’urdinatori.

A paci. Altru nudda ma a paci. Lotta più. Silenziu.

A l’aviani ficcata un’antra volta. I diti nantu à u ceppu di a pistola insustatrici di a vardia ministiriali, si ni pintia d’avè scumessu i so ultimi ori di riposu sinsuriali cù 354. si pochi tempi, t’avia dicia poca è micca cù a china galattica.

Da in curridori, intesi u trizinimu chì iscia da scagnu 156. Mossi a mani dannanzi a cellula di sarratura à laser. A porta smarì di colpu. In scagnu, nimu. A si dubbitava. Ma era fermu à stà accesu l’urdinatori. Altru ùn mancava. Avali li tuccava ancu à fà unu rapportu par via di u frazu. S’avvicinò 311 è vissi chì u screnu lucicava à infurmazioni :

Prugramma Roccu 156/0215/24626/453197 sguassatu.

Dati salvi

Sistema uparativu

Causalità inguerciata: un viaghju in u futuru ?

Un articulu di

Francescu Viangalli

À segua a filusufia classica, u sensu di u tempu hè unicu. U passatu priesiste à u prisente, da quì, è solu dopu, nasce l’avvene. Ogni fenomenu trova dunque a so causa in un fattu anteriore, è pruduce i so effetti dopu. A spiega d’altrò David Hume, ellu stessu, in a so Inchiesta nant’à a Capiscitura umana (1748). Di sicuru, ùn c’hè da frasturnassi di pettu à stu pensamentu. Cumu di fatti si purria cambià u passatu, eppuru trasfurmà u prisente incù l’aiutu di l’avvene? U viaghju in u tempu hè una fola, s’ùn mi sbagliu. Puetica sì, quella fola, ma fola quantunque.

Riflettendu à u prublema, si pò scopre pertantu, trà varii scritti filusofichi o scientifichi attalintati, chì u nostru sgardu nant’à u prisente firma appena guercinu: s’omu ci riflette bè, e cose ùn sò cusì semplici. Sò d’altrò una certa manata, in America è in Europa, à dumandassi in veru s’è saria pussibule d’usservà – o di praticà cum’è l’emu da vede – una forma di causalità inguerciata, val’à dì di causalità duve l’effetu si pruduce innanzu à a so causa. Cercanu à sapè, in altri motti, s’è u prisente pò influenzà u passatu, da cambiallu per un dettu, o ancu, eppuru megliu, s’è u futuru purria influenzà u prisente... Spostu à l’iniziu da u filusofu Michael Dummett [1], stu prublema hè diventatu famosu incù u travagliu di Robert Nozick [2].

Forse vi dite chì ghjè una tuntia, è ch’elli sunnieghjanu quelli chì pensanu pudè, un ghjornu, andà à salutà l’Eloii o fà fronte à i Murlochi di u rumanzu d’H.G.Wells, The Time Machine (1895). Ma à dilla franca, a causalità inguerciata ùn hè solu un deliriu literariu o matematicu, chì a pudete sperimentà subitu avà. Una manera semplice d’accorgevvi chì campate di fatti attraversu u tempu -  è micca solu in un prisente staticu- hè di ciuttavvi da per voi in u cusì chjamatu Paradossu di Newcomb.

Vulete viaghjà attraversu u tempu ? Andemuci.

Figuratevi puru chè cumminciate una partita di un ghjocu appena speciale. Sete dui ghjucadori. U primu, l’induvinu, hè una persona chì privede senza mai sbagliassi, à ciò chì v’hanu dettu, u cumpurtamentu futuru di l’altri. U secondu, site voi. L’induvinu hà fattu e so previsioni eri sera, è ùn hè quì. Voi, sete solu; è avete di punta à voi duie scatule bughje, a scatula A è a scatula B, da quì u cuntinutu, difinitu eri, hè impussibule da vede. Quandu principia u ghjocu, ete duie pussibilità : sia aprite a scatula A, sia aprite traminduie scatule, val’à dì a scatula A quantu à scatula B. È u risultatu ùn sarà listessu in i dui casi. S’è l’induvinu hà privistu eri che apririste oghje a scatula A sola suletta, allora cuntene 1 000 000 €. S’è hà privistu à l’incuntrariu chè apririste traminduie scatule, a scatula A ùn cuntene nulla. Ma a scatula B, in quant’à ella, cuntene sempre,  in ogni casu, listessa cosa: 1 000 €. Capita ? Va bè. Dumandatevi allora cosa diavulu ete da fà: pighjà a scatula A, affidenduvi à a predizione di l’induvinu, o pighjà traminduie scatule?

Riflettenduci, pare chì e duie strategie sianu assai sfarenti, è chì currispondinu tutt’inghjuna à una cuncezzione particulare di u tempu è sopratuttu di u so sensu.

S’è sciglite di pighjà traminduie scatule - cum’è à l’iniziu mi sò dettu chè faria eiu - aduttate u pensamentu dettu di l’ammaestria stratègica. Vi dite ch’ùn hè pussibule di privede l’avvene, è sopratuttu chì l’atti vostri sò liberi. Ciò ch’ellu hà dettu eri l’induvinu ùn pò micca influenzà a vostra decisione d’avale : hè solu un parametru di u vostru càlculu stratègicu. Fate dunque a stimazione chì ne sorghje. S’è pighju a A sola suletta è che l’induvinu l’hà privista, partu cù 1 000 000 €, ié, hè intesu;  ma s’è hà privistu u cuntrariu, tandu vulteraghju scozzulu. Pò esse saria megliu, dunque, di pighjà e duie scatule, perchè a B cuntene sempre 1 000 €, è sò assicuratu d’avelli... Allora sì chi si pò cunclude chè pighjendu a A & a B, mi facciu à u minimu 1 000 €, è à u megliu 1 001 000 €, s’è l’induvinu s’hè sbagliatu ; mentre chè pighjendu solu a A, sia partu cù 1 000 000 €, sia cù nulla. Da un puntu di vista matematicu, ci vole dunque à esse tontu o baulu sterpifinu pà sceglie solu a A...

S’è avà sciglite quantunque di pighjà solu a scatula A, forse a fate perchè ci credete à u pudè di priscienza di l’induvinu. Vi dite ch’ellu ùn pò sbagliassi – ghj’hè u so pudè à l’induvinu, a sapemu – è chì dunque ciò ch’ellu hà privistu eri dipindia di ciò chi oghje state pè fà. Postu chì u più interessante hè ben intesu di stantassi 1 000 000 € di manera assicurata, pighjate cusì solu a scatula A, chì, cusì fendu, rendete attuale u prisente ch’ellu hà dunque, in a so qualità d’induvinu, pussutu privede tandu. U vostru attu d’oghje ferà dunque ch’ellu ci sia 1 000 000 € in a scatula, bench’ella sia stata empia eri, perchè l’hà necessariamente privista l’induvinu. Ed eccuti chì u prisente ditirmineghja u passatu, val’à dì chì semu in piena causalità à l’inguerciu, è chì viaghjemu attraversu u tempu...

Sta seconda strategia, chì suppone un viaghju raziunale attraversu u tempu [3], vi parerà forse baullesca. Vi sbagliate. Da un puntu di vista matemàticu, è ghjè quessu u paradossu, i risultati ch’ella pruduce sò à pocu pressu listessi in termini di prubabilità finanziarie, è à le volte sò puru superiori in a rialtà sperimentale statistica [4]. Ancu megliu : e sperimentazioni riali di u paradossu hanu mustratu chì mentre chì circa 50 % di a ghjente sceglienu u raghjunamentu di l’ammaestria stratègica, l’altri 50% sceglienu a strategia di a causalità à l’inguerciu. È in più di quessa, pare chì ciascunu pensi chì sò scemi compii quelli chì adopranu l’altra strategia chì a soia...

Da tuttu què si pò tirà una cunclusione trimenda. A prima hè chì u fattu di pensallu à l’inguerciu, u tempu, ùn significheghja mancu ch’omu hè tontu. Una strategia stabilita cusì di pettu à una scelta binaria, marchja, o pò marchjà à le volte ancu megliu. Pare scemu, ié, ma hè a rialtà scientìfica... A seconda c’interessa di più, à noi. Campemu in un paese induv’ellu hè castratu u futuru, dapoi menu di una decina d’anni. C’hè una radica, una brama, unu speru storicu di ricrià infine ciò chì deve esse, ma s’affacanu sempre quelli chì volenu castrà l’avvene. Cum’è s’è u nostru u prisente – è sopratuttu u soiu – dipindessi di stretta manera di  l’avvene ch’omu pò figurassi. A cunsequenza vene da per ella. Pè cambià u prisente, ci vole innanzi tuttu à cambià l’avvene. Perchè ghjè u nostru sguardu nant’à u futuru chì ditirmineghja u prisente. Or nimu ùn puderà mai cambià u me pensamentu di u futuru, fintantu chì a ma mente firmerà libera.

Capite dunque una cosa : s’è pensate ch’emu da perde, ghjè di sicuru ciò chì accaderà. À l’inguerciu, s’ùn pensate micca, ma sapete chè a ci feremu, è chè tandu principiate ad agisce oghje pè priparavvii à quessu l’avvene, hè ellu, l’avvene, chì venerà à scuntravvi. Oghje ghjornu, più chè mai, a nostra sorte ùn dipende più di u prisente ma di u futuru, chì Cursichella pare bella chè bè u paese di a causalità à l’inguerciu.

[1] M. Dummett, Can an Effect Precede its Cause ?, in : Proceedings of the Aristotelian Society, 1954, 28, 27–44.

[2] R. Nozick, Newcomb’s Problem and Two Principles of Choice, in : Essays in honour of Carl g. Hempel, 1969; vedi ancu : S. Bourgeois-Gironde, Temps et causalité, PUF, 2002

[3] Ben intesu, ùn si viaghja cusì fisicamente in u tempu. U vostru corpu, ellu, firma in u stessu spaziu di tempu chè l’altre persone. Issu viaghju attraversu u tempu hè dunque pisculògicu :  hè solu una manera di pensà. U viaghju fìsicu in u tempu, quellu di l’espluratore di Wells, hè un antr’affare...

[4] R. Nozick, op. cit.

Corsica Ferrita (2/2)

Una nuvella di

Petru Larenzu Santelli

Tenutu per i pedi u ciucciu vermiculava. Duie sciappatte nantu à e cule li fecenu tirà retti.

Dopu à avellu asciuvatu è pulitu, Serena u purghjì à a mamma chì l’allacciò subitu.

U duttore cumpiia di lià u curdone.

Ella fighjava a  mamma  è si lasciava empie da l’emuzione.

Ùn facia nisun sforzu per ritene e so lacrime.

A vita cruda a mursicava è ella ùn si difendia mancu à pena, li s’uffria  ch’ella fichessi e sanne belle più prufonde.

Un pezzu ch’ella s’era resa .

L’avvene, ecculu quì , pensò.

Quale averia pussutu pensà chì dui chilò novecentu sessenta cinque di carne insanguinata è d’urli insuppurtevule li strapperebbenu pienti ?

Toutes les voies ont été explorées pour arriver à un règlement politique.

Devant le mépris affiché par l’état colonial, nous ne pouvons assister plus longtemps à la liquidation programmée de notre peuple par l’ethnocide de substitution en train de se jouer chaque jour.

Notre langue, notre histoire, notre culture sont niées. La spoliation de notre terre s’accentue de jour en jour.

Le commando Marcu Maria a encore frappé ce matin en liquidant deux colons dans la plaine orientale.

Cette huitième exécution et toutes les autres sont dédiées aux fils de notre peuple tombés en  résistant à l’état colonial.

Sans réponse forte de l’état français nous procéderons à une exécution journalière.

Toutes les revendications se feront par ce canal.

Ùn c’era guasi nimu in lu cyber caffè.

Megliu cusì si disse Serena.

U cummunicatu era compiu. Ùn li mancava chè u nome.

FRONTE PUPULARE DI LIBERAZIONE…

Nò micca FRONTE, ARMATA ?  ARMATA PUPULARE DI LIBERAZIONE ?

Quessa non più.

A videò avia fattu u giru di u mondu è ella a guardava in la sala di l’infirmeria.

« Yeménisation du conflit en Corse » avia stampatu in prima pagina u ghjurnale « Le Monde ».

Li era venuta cusì. Avia rispostu à una chjama annantu à u so I Pod mentre ch’ella cincinava i parigini in lu fussettu. È avia fattu u ritrattu.

Ùn li piacia  tantu.

Li vinse l’idea di mette i capi  nantu à u cappò di a vittura è avia filmatu.

Quì sì chì c’era u pathos, moltu più cù i brioni di a figliola firmata daretu.

L’avia filmata cù e capochjule in primu pianu.

Quessa ùn credu ch’ella venerà à rompeci e stacche d’estate più tardi ! Ùn credu !

A videò, a guardava cù l’ochji di quella chì scopri. Un sentimu stranu. Ùn ebbi u tempu di troppu pensacci chì a cinque chjamava.

A mamma di i picci.

Avia di più primura di quessa chè di u restu.

A cità d’Aiacciu era una furtezza. Decine è decine d’omi in arme eranu sbarcati dui ghjorni fà.

U quartieru di u Palazzu di i Cungressi era chjosu à a pupulazione.

Per entre in casa soia bisugnava à passà trè o quattru chek point.

Sarkozy è tutti i ministri di u guvernu eranu scalati elli u dopu meziornu.

C’eranu giurnalisti di u mondu sanu.

In la sala di riposu di l’infirmiere, ùn si sentia un zittu.

U nutiziale di TF1 principiava.

Era cunsacratu sanu sanu à a visita di u Presidente in Corsica.

Nous condamnons avec la plus grande fermeté les actes de barbarie qui ont terni l’image de la France .

Des actes odieux, abjects qui nous ramènent aux heures les plus sombres de notre histoire.

J’ai personnellement demandé à ce que tous les moyens soient mis en œuvre pour retrouver les coupables.

Car ils  seront retrouvés. 

Et châtiés.

À a tribuna una infilarata di ministri, prefetti, eletti di l’assemblea di Corsica, merri.

Serena era firmata per sente u discorsu ma fin’ora era dilusa. Vinti minuti di minacce, di chjachjare.

Tuttu què per què. Si n’avia da andà è li vinse à l’arechja duie parole.

….peuple corse.

C’est vrai que nous avons sans doute manqué d’attention. C’est vrai que nous n’avons peut être pas su écouter les appels du peuple corse.

Peut être que nous avons manqué des occasions de réparer le retard  historique…

S’era posta à posà è e frase li ghjunghjianu cum’e in un sonniu.

J’ai demandé à ce que les modalités de mise en œuvre d’une co-officialité de la langue corse soient effectives le plus rapidement possible. Nous proposerons à l’Assemblée Nationale de statuer sur une modification de la constitution permettant cette mesure.

Un sussuru avia parcorsu a sala.

J’ai demandé  à ce que les travaux sur la problématique du foncier soient accélérés et que des moyens supplémentaires soient débloqués immédiatement.

D’ores et déjà nous étudions la possibilité de légiférer sur l’accès à la propriété pour les résidents de l’île.

Toutes les transactions immobilières sont bloquées jusqu'à ce que nous ayons toutes les données de l’Insee, commune par commune, sur le taux de résidences secondaires.

La notion d’équilibre des populations entre résidents permanents et résidence secondaires sera primordiale dans tout nouveau document d’urbanisme.

L’Assemblée de Corse se verra transférer tous les outils juridiques pour mener à bien les opérations de préemption sur les terrains  afin de réguler le marché de l’immobilier.

Li si paria di sunnià da veru. Ma à vede u scumbugliu in la sala di i cungressi ùn pudia esse chè vera.

Era u ministru di a Funzione Publica chì parlava avà.

Comme mon collègue de l’Education Nationale, je vais proposer que soit mis en place rapidement une discrimination positive à l’embauche pour les jeunes Corses.

Nous étudierons également la possiblité, à l'instar de ce qui s'est fait en Nouvelle Calédonie ,de mettre en place un corps electoral corse fondé sur la justification de 10 ans de residence permanante sur l'Ile.

Ce pour les elections locales: Municipales, cantonales, territoriales.

Avant toute chose il sera procedé à une refonte totale des listes electorales........

Un statut dérogatoire ….

Ma cum’hè ch’ella ùn ci aghju pensatu prima. Tanti anni persi.

Une charte pour le retour de la diaspora corse est déjà à l’étude. Elle permettra à vos compatriotes de rentrer dans cette île qui les a suivis partout.

Mi stunava. Era troppu bè. Ci vole sempre un vasta salza. S’ellu s’hà da suppurtà omu i Corsi impizzutiti megliu tenesi i Francesi.

N’avia intesu abbastanza, si ne pudia andà.

S’avanzava à u passu di a furmicula. Aostu venia à fine. Battelli ci n’era assai menu ma sempre troppu magaru.

L’avemu per a coda si disse.

A strada s’astrittia, di duie vie ùn ni firmava più chè una. E vitture si taccaniavanu per passà. Tuccava à ella ma un vitturone à stringhjì è li tagliò a strada. S’ella ùn avia frinatu quellu l’avia impiccicata.

U vechju smanitava è butulava .

Ancu e pulice anu a tossa !

Serena fighjò a placca : Ottenta trè.

À diritta un sumere chì arpiava è scrittu sottu : pas trop près je viens de Corse.

À manca : Lozzi u mio paese.

Per compie l’opera, à mezu : Souvent conquise jamais soumise.

Casamozza. Francardu. Ponte Castirla.

Corsica Ferrita (1/2)

Una nuvella di

 Petru Larenzu Santelli

Torna un’oretta, pensò Serena.

I pienti di i ciucci empianu u curridoru.

Daretu à u vitratu tuttu ùn era chè smanitume, calcitume è urli.

Li piacianu ste stonde.

A vita era prisenta in ogni scornu, à ogni mumenti di a ghjurnata.

Ùn rigrittava manc’appena d’avè cambiatu.

Oghje si dumandava cum’ella avia fattu à tene quindici anni in u serviziu Reanimazione.

Quindeci anni di miseria, di disgrazie, sempre affiancata à a morte.

Quindeci anni à impitrì u so core.

I primi tempi s’era lasciata intrappulà. Allacciata da e suffrenze, troppu impegnata in lu so travagliu, ci avia ghjucatu a so salute.

Una dipressione è qualchi mesi più tardi avia imparatu anch’ella à spiccà i so sentimenti, à indurissi , à tenesi sempre à l’orlu, à chjode à luchettu ogni porta.

In la nurseria dodeci famiti aspettavanu d’appuppassi, dodeci surpatori in brama di latte.

Kevin, Hugo, Susan, Brandon, Jules, Lynette. L’infirmiera passava longu à u primu rangu.

Sei altri veguli li facianu fronte.

Marcia, Luis… A so cullega venia d’entre in la pezza. Una scalaticcia brittona sempre scorta chì ùn garbava tantu à Serena.

Avia intuppatu un criaturu è u tenia à bracci tesi sopra à u so capu.

- Markandrìa !Mon pov’ tu es vraiment  mal barré avec un nom pareil.

Non mais   franchement..Markandrìa….tu t’rends compte ?

C’est imprononçable ce nom là. T’imagines plus tard s’il part sur le continent. J’comprends pas qu’ils autorisent ces prénoms à l’état civil.

Serena era sturdulita quante ch’ell’avessi ricivutu un pugnu in capu.

Da quant’ella era abambanata ùn avia mancu rispostu.

U più chì li facia male era a manera. Nisun’gattivera, nisun’stizza in le parole di l’altra. Nò ghjustu naturale. Era quessa: naturale.

À quella li si paria nurmale. C’era più viulenza in sta nurmalità chè in l’insulte.

Chroniques du racisme ordinaire si dicia Serena.

Un pezzu ch’ell’ùn suppurtava più stu disprezzu. Avia pruvatu di lascià corre, po di spiegà, mà nò, nund’à fà. Ci vulia sempre à riprincipià.

A brittona cumpiia à tempu à ella.

Serena s’avviava versu a salla di l’infirmiere per lascià e cunsigne à a rileva.

Fù richjappa da a risa sumerina :

- Hahaha ! Markandrìa….pov’goss’ !!!

L’avia lasciata score per entre in la pezza di e medicine.

L’ascensore falava à u terzu pianu di u parking sottu terra. Avia avutu tuttu u tempu per fidighjalla da capu à pedi.

Una coupe au carré antigogna, un chemisier et una jupe-culotte di Daxon chì mancu mammona ùn averebbe messu.

Scarpetti à taccu è à punta quadrati, un saccu in veru sky Vuitton.

Sudurosa, li puzzava l’ansciu.

Avianu a raggiò i masci :

Débandador. Eccu cum’elli a cugnumavanu.

Ghjunte à e so vitture s’eranu salutate. Ma Serena invece d’apre a soia li s’era avvicinata.

- O  grosse vache !

Prima ch’ella abbii pussutu risponde li avia ficcatu a sciringa in la canella .

U liquidu zeppu è pastosu avia fattu effettu in duie seconde.

Strascina è strascina, era ghjunta sin’à u cuntener à par’di terra.

Pesa quante un frate mortu ‘ssa lofia, si disse.

- J’aime la Keurse ! dicia sempre quella. Casca bè, dumane hai da visità a piaghja di Tallone.

L’alba hà truvò ochji aperti. Da u so appartamentu in quartieru di u Fangu sentia u ruzzu di i battelloni gialli chì principiavanu à scalà.

-La prima collazione vi hè servuta al Ponte Sei ! Urlava a voce.

Da quì à qualchì stonde i ferries avianu da roce e centinaie di turisti.

Un mese torna di st’invasu di prufanatori.

S’era vestuta à a lesta. E prime vitture affaccavanu à l’entre di u tunellu. Si ficcò in la fila. Ghjustu davanti à ella, un coppiu.

Furiani. Borgu. Casamozza.

Ùn la sapia induv’ella andava.

Suvitava à e longhe a 306 carca à bloccu. Annantu à u tettu, un canoe kayak di mare.

U clignutore dirittu di a Peugeot venia d’incedesi.

100 metri più in dà s’erani aretti.

Senza sapè perchè Serena si lampò dinù in l’accantatoghju.

L’omu, di spinu, impalavichitu, anche sparte, pisciava.

A visse chì s’avvicinava è a fidighjava cumè un connu.

U scalpel li tagliò a canella, lascienduli u so surrisu di baullone in faccia.

A techja in vittura ùn era ancu à capì chì u Cutter a scannava .

E duie infirmiere li avianu lasciatu e cunsigne per a notte.

I ciucci durmianu diggià. I guardava ‘cun tenerezza.  Era colma è chieta. Avia tant’amore à dà è si sentia appaciata.

L’ore passate quì ùn l’increscianu mancu à pena. Li si paria d’esse ghjunta è era diggià l’ora di parte.

U rond point di u portu era ingurgatu da e vitture sbarcate.

Corsica Ferrita leghjia nantu à i battelli gialli.

Ùn riiscia à girà chì si vulianu tutti infrugnà.

Dui lucchesi avianu mancatu d’inticciassi.

Invece di piglià à manu diritta per cullà à u Fangu, s’era lasciata purtà da a fiumara di e vitture.

Furiani. Borgu. Casamozza.