vendredi 19 novembre 2010

A morte d'Orghenel IX (2/2)

Una nuvella di
Petru Felice Cuneo-Orlanducci

L’omi di Stega si tenenu in numaru incalculevule in giru à u so castellu. Anu passatu l’ultimi ghjorni à sfragellà tuttu ciò chì si trovava nant’à u so caminu, da a cità di Lanoc à quella di Larana. Anu tombu omi, bestie, arburi, piante, fulletti, omidacqui, luceanelli è maghi. Sò stati senza nisun pietà contr’à tutti quelli chì si trovavanu nant’à a so strada. È ùn firmavanu più chè qualchì minute nanzu ch’elli sbundessinu l’oramai sprudata porta di a furturezza.

Un mumentu, i suldati parenu esità. Micca per paura di u sacrilegiu di tumbà un principe benedettu da i Dii, chì avianu dighjà fattu peghju, ma sicuramente per un’ altra raghjone. L’ultimi fideli d’Orghenel IX credenu una stonda chì tuttu si passerà bè, ma u principe, ellu, ùn si face nisun illusione. U so donu li hà permessu di vede l’assaltu, è ùn si pò sbaglià.

È pò, d’un colpu, tutti si movenu, sfundendu prestu a porta illusoria di u castellu, è hè l’assaltu.

L’assaltu hè bruttale, l’assaltu hè preputente, l’assaltu hè feroce.

In pochi tempi, i tinti fideli di u principe sò summersi da un mare d’odiu è di rabbia, è sò marturiati, sfragellati, ammazzati. Elli chì avianu ricusatu, contr’à tutti i cunsigli di u principe stessu, d’abbandunallu, sò prestu tumbati, è malgratu i sò sforzi è u so curaghju, fermanu imputenti contr’à un’ armata più di centu volte superiore in numaru. A spada scontra a spada, u farru pichja u farru, e frezze sò tirate à un ritimu infernale, è u sangue ùn pianta di corre.
In poche minute, a battaglia si sparghje in tutti i piani di a furturezza. U valore di l’omi di u principe ùn pò nunda contr’à u numaru di nemichi, è sò prestu accidiati, aghjaditi, filzati, trapassati, cunculcati è essanguinati.

Da a cima di a torra, u principe ùn pò ch’è firmà, imputente, à soffre cù i soi di a so morte, aspettendu a soia, sempre drittu, fieru è altu. Orghenel IX ùn pò ch’è sente u rimore di a battaglia avvicinàssi sempre di più.

Dopu à qualchì minuta, u principe sente qualchissia chì colla e scale. Prestu s’apre a porta di l’ultima stanza di a cima di a torra, permettendu à Orghenel IX di vede, per a prima volta, a faccia di Stega ellu stessu, venutu à tumballu.
L’omu, u visu sfurmatu da l’odiu, porta un armatura dura, di quelle nant’à e quale si rompanu e spade. Si leghje nant’à a so faccia un surrisu velenosu, è Orghenel IX sà, senza cunnoscelu, chì l’omu hè un demoniu. In a so manu, una spada bianca, rossa di sangue.
Stega scopre un omu serenu è tristu, ch’ùn pare teme a morte. Un omu altieru, vestutu simpliciamente, senza nisun prutezzione nè armatura. Un omu ch’ùn hè mancu armatu, è chì tene in le so manu un ghjuvellu strasurdinariu è miticu : u famosu rubinu-smaralda di i principi di Larana.
A vista di u ghjuvellu bastò à dissipà u disandiu ch’ellu avia risentitu davanti à u calmu serenu di st’omu ch’ùn facia nunda per difendesi, chì dapoi seculi è seculi, si dicia ch’ellu era u ghjuvellu chì cunferia à a famiglia principesca u so donu divinu di vede l’avvene, è per quessa, Stega si ne vulia impatrunisce.

I dui omi ùn dicenu nunda. Stega s’avvicina pocu à pocu d’Orghenel IX, tenendu a so spada davanti à ellu, è senza cacciassi u so surrisu gattivu di a faccia, fin’à truvassi ghjustu in faccia à ellu, prontu à tumballu. Tandu Orghenel IX li dice, calmu è serenu :
« Prufitta bè di u to regnu è di u to putere. Seranu corti. L’aghju vista. »
Resu azezu da sta pruvocazione, Stega lampa a so spada in u core di u principe Orghenel IX, è a ritira subitu. Senza un gestu, senza un mughju, u sguardu di u principe si spenghje, è casca in terra, mortu, senza mai esse statu vigliaccu.

Rallegratu, Stega s’inghjinochja per dicicutà di e manu di l’omu ch’ellu venia di tumbà a famosa petra ch’ellu bramava tantu, u rubinu-smaralda di Larana.
À stu mumentu, a doppia petra pare scambiassi in fume fin’à svaniscesi cumplettamente.

È tandu, in tuttu u castellu è ancu aldilà, ribomba un stridu putentissimu di rabbia è d’ira.

3 commentaires:

  1. Ghjà 30 intrati diffarenti, è 21 testi publicati par avali...

    È ci hè a robba bona ch'affacca in i ghjorna à vena...

    RépondreSupprimer
  2. Un novu sundaghju à a fini par dì i testi chì vo aveti lettu (n'aghjustaremu unu tutti i deci testi).

    RépondreSupprimer
  3. Vi salutu o voi chì cusì bè impinnate.
    Di petra filusuffale in petra filussufale sempre di più suffisticata eccu bè cum'ellu gira u mondu e so sette chjappelle è canti senza stancia chì di sicuru riguardu à l'impeti d'a vita è à u sòffiu divinu chì li danu d'esiste ùn li gàrbanu tantu nè u ristagnu nè lu sempiternu. Avà per contu meiu pare appinuccia troppu compitu lu vostru Principe cusì chjamatu Orghenel IX. Soprattuttu mi piace a fine è lu sfogu addisperatu di quellu Stega quasì spiritatu chì pare cunvintu chì 'à sangue sparsu putere suvranu' !

    RépondreSupprimer