dimanche 7 novembre 2010

Gran Cavaglier d’Onori

Un testu di
Marcu Biancarelli

U trostu ribumbò in tutti i vaddi. Da i cità à i pasciala, a boci curria. U stessu affannu spartutu, è u stessu dolu ghjà cumminciatu. Da u Di Quà di i Monti à i Stati Cinarchesi, a gattiva nova si sparghjia com’è un ventu ghjacciatu. Ghjà i veli chì spariani à l’orizonti a purtaiani sin’à i canti stremi di u mari… U celi stessu paria di vulessi spinghja in un’ abbrucata d’addisperu. È in un pientu russu di sangu, i induvini annuncioni chì oramai, u Mondu ùn saria più u Mondu…

… ch’era mortu u Gran Cavaglier d’Onori.

I foca funi accesi à a cima di i turri di vardia. A conca marina feci senta u so frombu di funarali. Nant’à i cristi i più alti, l’aduratori di i petri si missini à buciarà lampendu i so brioni di morti, sgrinfiendusi a faccia com’è animali. In i furesti luntani, piatti à u bughju di i so rampali salvatichi, i signadori attacconi i rituali antichi. I prigantuli è i canti di morti stantariani i cuntorna, da pirmettali u passaghju…

… chì u Cavaglieri era cascatu, u nosciu Gran Cavaglieri d’Onori.

Invinitivi tutti, o ghjenti di a cumarca, inviniti ziteddi, è vo i viaghjadori stanchi, invinitivi di quidd’omu, chì guasgi l’avariamu crettu un mezu diu. Invinitivi di quiddu chì affruntò u musconu, quand’iddu era vultatu à impuzzicà i nosci piaghji… U Gran Cavaglieri sciutu da u sprufundu, chì strangulò a Barbuta di Tia, chì a brusgiò in a so sapara… L’omu chì affruntò i Dimonii Saianati, chì solu si risicò in a so selva… Invinitivi quand’iddu purtò u focu è u farru in a pievi luntana di u Conti Pazzu, chì lu pulsò cù a lancia di deda…

… u nosciu Cavaglieri mortu. U nosciu prutittori altieri.     

Purtaia l’elmu è u scudu. A currazza d’argentu è a spada incantata. Iscia da a notti pà fà spuntà u ghjornu chjaru. Vinia da i tarri alti, una mani matina, è feci cascà a crudeli bandera di San Ghjorghju. Un centu di numici alibrati in i fossi di Rocca Taddata, è quant’altri dati à i ghjacari, ch’iddi intazzessini i so carri maladetti. U Cavaglieri cù a so scorta… i Setti Fiddoli di l’Arcindita… i maghi curaghjosi chì spazzoni i barbari Facci Pinti, chì i sfecini in u so casteddu…

… u Gran Cavaglier d’Onori, chì ghjacia avali in i buttissi.

N’eti intesu parlà. A Donna d’Arburea l’avia tinutu caru. S’iddu avia vulsutu saria ancu statu rè. Ma u Cavaglieri ùn pudia firmà cù i travi, indu chì u Mali vulia triunfà l’abbisugnaia à purtà i so passi. È mossi cù u ventu. A Murgana dinò u vulia dannà. Era un regnu più scuru cù solu pirdizioni. È ni fù a Murgana à mirzà in l’eternu, u so cori afflittu, carcu à dillusioni. I strii tutti quanti si vuliani dà. Li cantoni certi foli par abbiucciallu. U Cavaglier d’Onori li sapisti risista. Liatu à un pilastru da i Fiddoli di l’Arcindita intesi i canti difesi, urulò sutt’à a Luna, è u lindumani, scioltu, sfeci par sempri a tana di i strii. Fendu cissà par vo i brutti incantesimi.

… u Cavaglieri Chirgu, chì durmia oramai, sfracicatu.

Avia tumbu Franchi è Saracini. Avia vardatu i porti di Cinarca è di a Rocca quandu l’infami Ginuvesi ci lintaiani i so mercenarii. I campagni di u Di Là di i Monti vastati da i reffichi infirnali… I paesa assaltati l'unu impressu à l'altru, marturiati da i sicarii di quinci è di culandi… I turri è i casali abbassati da i balisti è i catapulti tirrificanti… Era falatu iddu da i sarri, à a testa di i malandati è di i paciaghji, signori di l’aienti minuti, spiranza ultima quandi ugni spiranza era spinta… È fù unu stirminiu d’invasori, una notti di sangu, i fucari accesi cù i salmi disdrutti d’upprissori è di furdani… È i tarri ghjintili tinuti indomiti è libarati.

È s’era crettu chì mai più nimu sintaria a furia di a guerra, l’abuminazioni di i crimini udiosi. S’era crettu chì u spaventu avia abbandunatu i lochi biati. Sin’à u ghjornu di l’affaccata d’un diavuli, un basgialiscu com’è nimu l’avia cunnisciutu, un essaru malmindosu chì nimu avaria vulsutu prununcià u so nomu. I Fiddoli di l’Arcindita divurati ad unu ad unu… U telu di ritornu, da Cuvasina à i Trè Pievi… U telu chì avia presu a forma di a Bestia… d’un’ Anguidda di Tarra impinsevuli… U telu chì avanzaia à rampaconu, chì mughjaia in tuttu u so orrori à u cori di i vechji furesti…

È tandu a boci si feci senta. Piensini i pastori è i gran signori. Tandu s’affascioni di dolu i vechji vardiani di a cridenza è i belli donni. U Cavaglier d’Onori durmia pà sempiternu. À u pe’ di i stantari muti. U so vantu chì tinia sempri a tencia taddata di u mostru. È l’eroi chì ghjacia, una firita vilanosa chì l’apria u corpu da parti in parti… L’eroi cascatu, di capu appughjatu contr’à i scaddi schifizzosi di l’Anguidda di Tarra.

… Chirgu u Cavaglieri, quissu chì l’Onori era a so casata.

Invinitivi dunqua, o ghjenti, quissi di a Cinarca è di l’Istria, populi di a Rocca o di u Di Quà, omini di u Pumonti o di u Cumunu, campagnoli di i Maremmi o vilani di l’Aragona. Invinitivi di quiddu ghjornu. U ghjornu funestu chì u Mondu ùn fù più u Mondu…


5 commentaires:

  1. Ispiratu à modu libaru d'un cantu tradiziunali di Pumonti, ritrovu è cantatu da Petru Gambini.

    L'autori.

    RépondreSupprimer
  2. Più di 1300 pagini visti in una sittimana d'esistenza, voli dì sicuramenti chì u bloggu hè fraquintatu. Ni semu filici.

    Pà significà à l'autori chì i so testi sò stati letti, pudeti risponda à u novu quistiunariu piazzatu à a fini di a prima pagina.

    Ùn avendu u mezu di cuntabilizà da veru i visiti, i quistiunarii sò par no un mezu di situà a fraquintazioni di u situ.

    Ma pudeti lacà dinò i vosci cumenti di littura in l'inquatratu di i testi chì vo aveti lettu. Ci farà piaceri ben sicura.

    I missaghji sporchi o i ghjastimi i cacciaremu com'iddu si devi.

    RépondreSupprimer
  3. Benchì certi testi l'appia digià letti in altrò, face prò di ritruvalli quì, è inquant'à i testi novi o da mè scunnisciuti... hè un veru piacè di scopreli!Anc'assai ch'e aghju digià lettu "A Vistica", publicate tantu in furia chì hè difficiule per mè (ch'e aghju pocu tempu) di seguità tuttu... Ma cuntinuate puru, mi campu! (è vi possu dì chì sin'ad avà aghju lettu TUTTU nant'à stu blog (a me fame di lingua corsa?)!!!)

    Marilena

    RépondreSupprimer
  4. Saluta o Marilena !

    Postu chì tu ha lettu tutti i testi riempii puri u sundaghju in ghjò di a pagina, cussì l'indicatori sarà fidu.

    T'abbracciu.

    RépondreSupprimer
  5. Magnificu, scrittu di focu stu testu ! chì soffiu epicu, simbolicu, tutta una mitulugia cumparisce ...

    Bravu dinù per l'icunugraffia.

    Culomba

    RépondreSupprimer