samedi 30 avril 2011

Ingurdizia

Una cronica di
Marcu Biancarelli

Passaraghju torra pà calchì straviatu, ma pocu premi, socu avvizzu. Dunca m’aghju da lampà listessi… A carri umana, vo, vi seti ghjà dumandatu chì gustu ‘dda t’avia ? Dui sturiani aviani inchiistatu, in i tempi, è intarrugatu l’archivii di u cannibalismu, pà circà di risponda à ‘ssa quistioni impurtanti. Trà altri quistioni cussì impurtanti, voddu dì. Com’è quissi di sapè chì piazza u fenomenu spavintosu di l’antrupufagia avia presu in a Stodia, quali era statu manghjatu, quandu, di chì manera, cù chì cundimenti.

Cussì Pierre-Antoine Bernheim è Guy Stavrides ci prupuniani, in 1992, u libru « Cannibales ! », ind’è Plon, chì, s’iddu ùn era mancu un capu d’opara in materia d’analisa psiculogica o antrupulogica, t’avia o mancu u meritu di fà u ghjiru storicu u più cumplettu annant’à u sughjettu. Una vera antulugia di u cannibalismu, i fatti discritti cù tutti i ditagli i più morbidi pussibuli. È sempri dinò, fattu raru ind’è i sturiani, cù un sensu di a risa di i più acuti. Ciò chì pirmittia quantunca di fà passà a bistecca, senza indigistioni.

Ma u gustu, dunca, pà vultà à i nosci quistiunamenti di u principiu. Bernheim è Stavrides faciani parlà l’attori : i più numarosi evucaiani una sumidda cù u purceddu, com’è ‘ssi marinari inglesi burulati in 1808 da l’indigenii di i Fidjì, chì l’aviani fattu tastà un prighjuneri di guerra. Cunfusioni cù u porcu dinò pà tutti i clienti d’un certu Fritz Haarmann, esecutatu in Hanovra in 1919, dopu ad avè vindutu à u so maceddu a carri di 24 aduliscenti spariti di pocu. Pà i Chinesi di u Medievu, inveci, l’omu t’avia più à veda cù a pecura. Cussì un essaru chì finia in tianu era chjamatu una « pecura à dui zampi ». Ma l’intarpritazioni di u gustu di l’omu pari d’essa liata à spissu à a sughjittività culturali. Par quissa ch’un Indianu di l’Orenocu, intarrugatu da Humboldt, pricisaia piuttostu a vicinanza cù a scimia. Difficiuli di fassi un avvisu. Almenu di pudè spirimintà. Ma via.

Altra quistioni di primura : quali hè statu cannibalu ? Chì populu ? I dui autori t’aviani u meritu di ramintà chì l’omu hè statu manghjatu in tutti i cuntrati, sutt’à tutti i latitudini. Certu, l’anziani populi di l’Uceania pariani d’avè un attichju più sviluppatu in u duminiu. Com’è l’Indiani d’America, chì si fecini arrusta una mora di cunquistadori. Ma quandu ci hè a fami ugnunu prova o mancu una volta una piccula custiglietta. Par esempiu, mentri a ritirata di Russia in 1812, i tistimunianzi ùn funi rari di cannibalismu in a Grandi Armata : una banda di suldati Cruati cacciò un corpu da un incendiu pà intazzallu ; u generali russiu Kreutz poti veda da par iddu certi suldati francesi in traccia di sciaccassi un catavaru in a nivi ; u tinenti alimanu Furtenbach vidisti i suldati imbruccà i cori umani nant’à i foca di i so campamenta…

Tutti i cannibalizati, puri, ùn funi micca cussì anonimi chè ‘ssi tinti militari disfatti è inguttiti da i so simuli. Uni pochi di parsunalità ani fattu dinò un picculu sughjornu in unu stomacu di sapiens sapiens. Com’è Caligula, chì, una volta assassinatu, fù spartutu trà i cunghjurati chì u s’erani sdunzatu. Altru mastuccatu famosu : Concino Concini, tumbu in 1617 par via d’un ordini di Lavighju XIII, è udiatu da u populu pariginu, chì fù cacciatu da a tomba par essa strascinatu in carrughju, scurticatu, brusgiatu, è manghjatu da a folla isterica. Monda spluratori di rinoma, dinò, o missiunarii di prima trinca finistini a so carriera in a panza d’un Indianu salvaticu : mintuvaremu solu i puvaretti di Juan de la Cosa, Giovanni Verrazano, James Cook, ancu, o ‘ssu disgraziatu di Jean de Brébeuf, à qualissu l’Iroquois, crudeli, taddoni l’anchi è i braccia par manghjassili davanti ad iddu, vivu ma ammutulitu. Chì l’aviani cacciatu a lingua par impidillu di briunà. Iscia.

Infini. Eccu da veru un libru da buscà, com’ì vo pudareti, è da purtà subitu annant’à l’isula diserta. Ma com’è manuali, ghjustappuntu, in casu chì l’isula fussi menu diserta chè ciò ch’idda paria.

9 commentaires:

  1. Per quelli chì anu lettu a biugraffia di Sampieru scritta da A.M Graziani, s'ampara chì quand'ellu hè statu tombu, certi mercenarii si sò manghjati e trippe di Sampieru per pigliassi e so forze.

    J.A

    RépondreSupprimer
  2. Socu sempri à tempu di mudificà a me cronica... :-) (o di scrivani un' altra !)

    MB

    RépondreSupprimer
  3. à sceglie, hè megliu à firmà debuli chè di truvà a forza in e trippe di qual'ellu sia! iscia!

    Titic

    RépondreSupprimer
  4. Si dipende, s'elle sò accumudate è cundite cum'ellu ci vole...

    JYA

    RépondreSupprimer
  5. S'ellu si va à circà quand'ellu si piglia u core, u fegatu, un renu nant'a un mortu pè salvà un cristianu, serebbe listess'affare di manghjà si un pezzu d'issu mortu pè salvà si in casu di grande famia..no? Cume sera chì u fattu di manghjà ci pare male? Qual'hè u primu ch'hà dettu : pas bien :( ! U Signore? Allora vole dì chì i millioni d'agnostichi d'issu mondu si ponu manghjà frà elli ? Innò, sicura. Hè perchè no simu CIVILIZATI: ci pudemu tumba ma micca manghjà! À dì la franca è di manera più seria, semu tutti techji dunque ùn pudemu sapè sè no semu capace di manghjà o no a carne umana. Ind'un spiritu di sopravvivenza forse iè?! Ma crepà pè crepà preferiscu à crepà di fame chè di crepà d'ave di quessi i ripasti nanta u stomacu è a cuscenza. U suggettu hè schifosu ma interessante.
    ok je sors ===>

    Titic :p

    RépondreSupprimer
  6. Circati u libru di Bernheim è Stavrides, o Titic. Dopu à avellu lettu, sarè ubligata di duvintà com'è mè : un ochji di cecu à a cuchjara ugni matina... un pezzu di sciugna di verghjini à meziornu... un tinau di bracciu a sera... Mmmmmhh... ùn ci hè nienti, nò ! nienti ! di meddu chè un beddu brodu umanu !!!

    MB

    RépondreSupprimer
  7. O ghjente, fate casu s'è vo site invitati à manghjà o dorme ind'è MB, aprite l'ochju è non solu nantu à a cuchjara!
    Diana

    RépondreSupprimer
  8. À mè, m'hè mancatu dui diti à un pede dopu à un suggiornu à mezu à a furesta piuvasca è nibbiacosa di u stremu meridianu. Solu dui diti, soca a mio carne ùn era cusì bona...

    JYA

    RépondreSupprimer
  9. MB : Marcu Bokassa? (ch'ùn era micca cannibale infatti, hè statu "sbiancatu" lol)

    I casi di donne cannibale sò rarissimi !?

    Un casu famosu : In u 1981, Un'alemana di 26 anni, Anna Zimmerman, hà tombu u so cumpagnu per vindicassi (di chè ùn la sò). Dopu l'hà intazzatu, hà messu i so pezzi in u cungelatore, è l'hà manghjatu à pocu à pocu cù i so figlioli !!!

    Mintuvemu dinù u cannibalisimu sessuale! Ci hè un vechju scemu per un dettu,un alemanu (torna, ma ùn vogliu tirà cunclusione...), chì manghjava i zitelli. Hà palisatu ch'ellu avia un piacè sessuale di quelli, manghjenduli! è hà ancu scrittu à una mamma chì a so figliola era "un veru deliziu"!!!! (mi face pensà un pocu à a lettera à Madama Whise di MM)

    RépondreSupprimer