lundi 8 novembre 2010

À a surghjenti di a Fantasia

Un articulu di
Marcu Biancarelli















Sì l’opara di l’Irlandesu C.S.Lewis ferma pocu prizzata da u publicu latinu, l’autori ricunniscia chì i so Cronichi di Narnia erani influinzati abbastanza da u so stintu cristianu, è chì d’una certa manera ‘ssu scrittu di Fantasia Eroica duvia illustrà a difesa di  i so valori cunsirvatrici. Hè cussì chì u mondu imaginariu di Narnia – ch’un filmu feci cunnoscia ‘ss’ultimi annati – hè un universu carcu à sessismu, razzismu o ancu à uccultismu, nuzioni chì poni dà fastidiu à una parti maiori di i littori.
                    
Si n’hè dittu altr’è tantu di l’opara di u so amicu Tolkien. Ma puri st’ultimu ricusaia a carica troppu simbolica di i so scritti. Quissi ch’ani vistu in a lutta trà l’omini è i putenzi di u mali una spezia di parudia di l’affruntamentu trà i dimucrazii è u nazismu sariani dunca à cantu à u sughjettu. Ma, scrittu da 1937 à 1949, U Signori di l’Aneddi ùn saria mancu spruvistu d’un certu pessimismu, o di pinseri bughji liati à l’anni di guerra. D’altrondi l’autori stessu vulia chjamà u so libru « A Guerra di l’Aneddu », ciò chì avaria missu di più in avanti a filusuffia guerriera di l’opara.

Ci hè inveci da dumandassi sì una vera influenza ùn fù micca porsa da u Primu Cunflittu Mundiali, à qualissu Tolkien avia participatu com’è suttitinenti di l’armata brittanica. Si truvò ancu in i fossi di a battaglia di a Somme in 1916, veru maceddu chì vidisti a morti di più di 300 000 suldata. Difficiuli d’imaginà ch’ùn esistissi micca un paragonu trà un infernu paghjesu è l’universu di guerra generalizata è barbara discritta da Tolkien in u so capu d’opara. A Cuntrata surridenti di i dulci Hobbit era dinò par iddu, à modu palisatu, un’ alleguria di a virdicanti campagna inglesa, un mondu caru indu Tolkien era statu addivatu, è ch’iddu vidia minacciatu tantu da a guerra chè da un’ industrializazioni udiata.

Pà un publicu ch’ùn hè micca di cultura anglo-sassona, i riffarenzi arrubbati da Tolkien à u paganismu nòrdicu o germanicu poni dinò pruvucà un certu sbileghju. Vera chì l’omu ideali discrittu in i so libra s’assumidda abbastanza à u guerrieru arianu com’iddu cumparisci ind’è Richard Wagner… Ma una rilazioni simuli ferma abbastanza dubbitosa, è un ghjudiziu cussì sittariu di a spirazioni di Tolkien scunnisciaria l’arrecu à a cultura inglesa di i sagà scandinavi è d’opari medievali com’è u famosu Beowulf. Una certa stampa cristiana – dinò quì – hè piuttostu da metta in evidenza, cù l’utilizazioni di miti com’è quissu d’Abel è Cainu (Smeagol è u so cucinu Deagol ind’è Tolkien), o à traversu à a pussibilità d’annubilera di i debbuli (a rescita straurdinaria di l’Hobbit par esempiu).

Fà chì ti fà, ch’idda biissi à a surghjenti di i foli scandinavi, germanichi o finlandesi, ch’idda sighi u fruttu di l’imaginariu senza limiti d’un filulogu appassiunatu di latinu o di vechju nurresu, ch’idda s’ispiressi di Shakespeare o ancu d’H.G.Wells, a criazioni di Tolkien si scrivi com’è a più impurtanti di u XXu seculu cuncirnendu a Fantasia Eroica. Difficiuli di dì ch’ùn avissi fattu tombula, o di nigà a so influenza annant’à u nosciu imaginariu mudernu. U ghjurnali u Times, iddu, ùn esitò micca pocu fà à piazzà à Tolkien in siesima pusizioni di l’autori i più impurtanti di a literatura brittanica dipoi u 1945. Davanti à certi tarcani com’è Naipaul, Salman Rushdie o John Le Carré…

2 commentaires:

  1. Aghju da cancillà u mio abbunamentu à La Corse votre hebdo s'è trovu quì a sola cosa interessante à leghje...

    JYA

    RépondreSupprimer