samedi 26 février 2011

E sette porte (10, 11, 12 /15)

Una nuvella di
Jean-Yves Acquaviva

X

Vardava ‘ss’omu è una meza siconda, si vidia abbuchjà li un cazzottu in bocca, senza altru prucessu. Po, u so musu appinzatu s’era fattu surisu. « Jag ? » L’altru avia rispostu di sì è s’eranu abbracciacati. Dopu à una pochi di « cumu stai ?», « Chì diventi ?» è altri « cum’è tù sì smagritu… », Jag avia invitatu à Mark à suvità lu. Avia cacciatu una chjave è avia apartu a porta di l’ustaria. Jag era u figliolu di Vikash, Mark è ellu eranu stati amichi in tempi di studii, una pochi d’anni in daretu. Mentre ch’ellu facia dui caffè, Mark l’avia contu i so affanni, amintendu soprattuttu a so idea di a leia trà i crimini è a cultura indiana. Dopu à avè lu statu à sente senza parlà, capighjendu per palisà u so interessu, Jag avia dettu : « Caschi bè, ùn a sai forse micca ma tuttu què hè a mio spezialità. Sò prufessore à l’università è insegnu a storia di e cridanze indiane.» Mark ingullia e parolle di u so amicu cum’è u famitu si saria sciaccatu u piattu di suppa calda tantu bramatu. Jag li dava e chjave nicissarie à una capiscitura più linda di ciò ch’ellu avia lettu in u librone. Pasciuppattì, quessa l’avia capita, era una di e forme di Scifà. A materialisazione guerriera di ‘ssa divinità « Signore di tutti i vivi ». Pasciuppattì era u focu fattu parsona, quellu chì deve mantene « u sacrifiziu rituale da duve nasce ogni vita ». È jag avia allargatu u so discorsu à una prufezia menu cunnisciuta da a ghjente ma, sicondu ellu, chì pudia dà lume à l’inchiesta di Mark, quella di « a sottumissione di u mondu ». Dicia chì Pasciuppattì, chjamatu dinù « Maestru di a reghje », era statu imprigiunatu da l’omi impauriti da u so tamantu putere è di a so brama di strughje u mondu è fà ne un infernu. L’infernu terraniu duve l’omu pagaria, in sempiterna, i so piccati. U giovanu prufessore avia amintatu « E sette porte » chì eranu state chjose per impedisce à Pasciuppattì di gode di l’energia di u sole è scatinà ne a putenza contru à l’umanità. Ogni porta si  pudia apre offrendu à Scifà un sacrifiziu umanu. Sette porte, sette sacrifizii per e sette Sciaccrà principale. À sente à ellu, quattru porte eranu digià aparte postu chì Mark parlava di quattru sacrifizii. Ne firmava trè è s’elle vinianu à esse aparte ancu elle, u mondu cunnisciaria u bughju è u spiantu nati da l’ira di Pasciuppattì. Ci vulia à circà unu omu chì si cridia u missageru di ‘ssa prufezia è chì tumbava per ch’ella venghi à ghjornu.

Mark ùn avia trovu nisuna parolla per sprime a cunfusione di u so spiritu. Si n’era andatu dopu à avè abbracciatu torna u so amicu. S’eranu prumessu d’ùn aspittà torna anni è anni nanzu di turnà à vede si è ognunu era vultatu à a so vita. Mark si dumandava cumu i so supariori avianu da piglia a teuria di Jag. L’avia ancu prupostu d’accumpagnà lu per spone la da per ellu, ma dicendu ch’ellu avia « qualcosa à fà », quellu avia ricusatu.

XI

Eccu li à Vikash è u librariu, in una pustura pocu piacente. Nudi, appesi cum’è dui lonzi, e mani liate sopra u capu da un canapu chì li marturieghja i polzi, i pedi à dece centimi di a tarra. Stinzanu l’anche, pruvendu à culmà ‘ssa distanza, ‘ssu mezu palmu chì face a tamanta sfarenza trà u dulore sugicu è u sullevu d’una impressione di libertà. Ma più stinzanu è più a pena si face forte. U sangue li corre nant’à i bracci, li candileghja in fronte è in pettu. Fideghjanu in faccia à elli ‘ssu parastagiu guarnitu di quattu caraffoni di taglia sfarente, u so cuntinutu i santavuglieghja è li rimena u stomacu. Un fœtus, un minchju, una manu è indu unu più maiò, dui capi ochjiaparti, cusgiti bocca à bocca in una spezia di basgiu prigione. È cum’è pronti à accoglie duie nuvelle pezze di ‘ssa cullezzione spavintosa, un paghju di vasetti aparti è  impiuti di u stessu liquidu pagnu c’à l’altri. À a so manca, i dui omi ponu vede un curridore luminosu, una filata di quattru porte aparte. In fondu, ne induvineghjanu una antra, sarrata. Sentenu cum’è un rispiru arghitu è un pichju acciuncatu, rigulare cum’è un core chì batte, chì li alliscia l’arechje. U rimore d’una scarpata, vinutu da daretu à elli, li stringne ancu di più u corpu. Qualchì siconda chì parenu seculi è l’omu vistutu di notte si tene di punta à elli. I varda una stonda è si mette à parlà. D’una voce chjara, à un ritimu chì s’assumiglia à quellu d’un zitellu recitendu una puesia amparata in scola. Vikash ùn capisce nulla à e parolle di l’omu, u librariu sì è u so visu si sface torna à pena. Hà cunnisciutu supitu u Sanscrittu, una di e più vechje lingue di l’umanità. Pare d’ùn pudè suppurtà ciò ch’ellu sente, scuzzula u capu, rispira più forte, cerca à scioglie si. A brusgiatura di u canapu u forza à calmà si supitu è dopu à un lagnu addisperatu, lascia andà tutta i liquidi di a so parsona, lacrime, sudore è u restu dinù. L’omu pesa a manu dritta, prisintendu li una cultella à lama fatta à triangulu, lucicante è arrutata. S’avvicina di u librariu è pianu, pianu à gesti misurati li taglia e duie arechje. U corciu apre a bocca da mughjà a so suffranza, u boia ci si ficca a manu manca, li chjappa a lingua è a taglia dinù. U librariu ùn hà più c’à i so ochji per sprime u so addisperu, ùn pò c’à sburlà li è offre li à a lama pinzuta chì i face saltà unu appressu à l’altru. Ùn hè più avà, c’à un pizzacciu di carne disanguinatu, chì pindiculeghja aspittendu l’ultima spasimata. Tuttu què era statu accumpagnatu da u stritu longu è altissimu di a quinta porta chì si spalancava.
Vikash chì avia chjosu l’ochji à a prima arechja, l’avia turnatu à apre sintendu a voce di l’omu dì li « Vardà mi ! » in una lingua ch’ellu capia infine. L’avia vistu ritirà u so cappucciu è avia scupartu u visu di quellu chì li ficcava a so cultella in pettu. Ùn avia cappiatu mancu un mughju, à u colpu u so core avia affrinatu u so galloppu scemu, ùn battia quasi più quandu l’omu l’avia ritiratu. A sesta porta s’era aparta d’un colpu, lascendu vede l’ultima. U soffiu arghitu s’era fattu voce è u pichju ùn era più mancu à pena assuffucatu. Ci era qualcosa, daretu à l’usciu chì circava à sorte. L’omu avia racoltu ogni pezzu toltu à e so duie vttime è i mittia nu i caraffoni lampendu una ultima prighera.

« Cumu hà ricusatu ? Avia qualcosa à fà ? Mi piglii veramente per una conna ! Volta è arreca lu mi quì supitu ! » Eccu à Mark torna à avvintà à Brick Lane circhendu à mette a manu nant’à Jag. Viaghjava in furia è pinsava à voce rivolta, senza dà capu à a ghjente chì u vardava mezu amusata è mezu impaurita. Avia torna ‘ssu sguardu neru chì avia avutu tantu successu cù Vikash. Passava è vinia da a libraria à u risturante, ma nimu. Si turcia u collu pruvendu à vardà nentru à a sala di l’ustaria di Vikash à traversu à i tafunelli di a tindina di farru. « Puttana ! Avia qualcosa à fà, chì ci possu eiu ? ».

XII

« Salute o Big Mark ! M’anu dettu chè tù mi circava. » Mark s’era pisatu d’un saltu. Fighjava à Jag, dui ghjorni ch’ellu visticava e so zampate cum’è un cane di caccia suveta un cignale. Avia fattu ciabba è n’avia pagatu u prezzu sintendu e ghjasteme crude è gattive di i so supariori. Ma avà era quì, è l’avia da mette à tallozzu. Senza mancu risponde à u surisu di u giovanu indianu, l’avia puntatu à sin’à u burò di Grazy. « Eccu lu ! », avia dettu quessa à l’usu di un guerrieru fieru di a so vittoria. U « era ora… » seccu, seccu d’Anny l’avia supitu fattu vultà à a realita. « Lascia ci soli ! » Mark avia cercu à dì qualcosa ma u sguadu di Grazy l’avia, torna una volta, mandatu à ghjace.
Jag s’era stallatu in u futtogliu di punt’à u scagnu di l’ispittore principale. Era un bellu zitellu cù un surisu abbagliulente, marcava più c’à bè in u so custume di seta grisgia rialzatu da un mantellu neru di cascimira. U giuvanottu avia cruciatu l’anche è aspittava e dumande di Grazy. Quella ùn si pudia impidisce di sente un picculu calore sfrisgià li l’iglie vardendu ‘ssu masciu fieru, era tuttu à fattu à u so gustu. S’era arrizzata è avia chjosu i stori per creà un ambiente più intimu, più prupiziu à a discussione.
Mark, videndu quessa, avia lintatu una suspirata è s’era ciuttatu torna in u so travagliu. Ripigliava, puntu à puntu, tutti l’elementi di a so inchiesta. Pruvava à arricurdà si d’ogni discursata, ogni pinsata. A so idea di a leia cù a cultura indiana era averata. A soluzione era nu e parolle pocu chjare di Vikash è nu quelle più assistate di Jag. Si ramintava a prima reazzione di Grazy quand’ellu l’avia sottumessu a so teuria. « Poca nova quessa ! Quantu sò e ghjente discindenti d’imigrati indiani nu ‘ssa cità ? Tè, ancu eiu aghju una arcimamone nata à New delhi. » Avà u pigliava sicuramente à u seriu, è si vulia tene tutta a gloria per ella, stendu sola à sente l’infurmazione di Jag, chì l’infurmazione l’avia di sicuru è di prima trinca. Mark fulminava, quasi una ora ch’elli eranu chjosi, pinsava ch’ellu meritava quant’unque di sente ancu ellu i detti di u so amicu. S’era arrizzatu è andava, à passu dicisu à impone u so ragiunamentu. Appressu à tuttu, pattinavanu dapoi quasi una simana è era statu ellu à arricà ‘ssu pucucciu di lume nant’à tamantu bughju.
À mezu caminu era piantatu, videndu sorte Jag di u burò. Vinia à via d’ellu cù u so surisu immaculatu è suddisfattu. L’era passatu à cantu, fendu li una stinta d’ochju. Si n’andava chietu, chietu è Mark u vardava imbafatu, dicendu si ch’ellu ùn avia micca rimarcatu a so valisgetta di coghju neru quand’ellu era ghjuntu.


1 commentaire:

  1. Una scrittura veramente curata, precise è ricca, di altissima qualità. Si trema, l'imaginazione si spalanca cù tutte 'sse porte chì apreranu...l'Infernu?

    RépondreSupprimer