vendredi 3 décembre 2010

U barattu

Una nuvella di
Petru Larenzu Santelli





À mez’a Bocca di Ghjuva affumacciata, l’alba nascitoghja u truvò straiatu, bracci in croce, stringhjendu una mazzetta tronca di talabucciu.

A guazza chì incrusciava a so faccia era dolce di pettu à e lacrime amare chì currianu longu à lu so visu.

Acciaccatu, culpitu, stracciu vivu, pruvava d’assirinà u so cerbellu marturiatu ma e fiure s’inticciavanu è sgranfiavanu a so mente cum’è saette.

À quandu u cignale varcava u ghjargalu, à quandu si ne vultava. Ogni passu in davanti di l’animale era cum’è un stilettu cutratu chì si ficcava pianu pianu in la so carne.

Avà u porcu s’era firmatu à mezu saltatoghju. L’acqua curria rossa sottu à u so corpu. Po pocu à pocu, u currente avia richjaratu u pozzu.
U razzoni si vultò è saltò da ripa in dà. Senza vultassi s’ingaciava in l’imbucatoghju, e calanche  da sopra  rinviendu u ribombu di e so unghjule nantu à i pitraghji.

A vincula di luminellu striava l’aria. A nebbia s’era inzeppita cuprendu ogne cose d’un fasciu panghju.
A pungnitura di a lama si facia menu feroce in lu pettu. A sentia chì si ritirava.
Inghjinuchjatu ripigliava fiatu.

Ma un urlu trimendu l’accuculò :

- U cunnosci u prezzu…!!!

*
*  *

Dui o trè chilometri chì a camiunetta di livresone suvitava u scooter. Duppià ùn pudià duppià chì u carrughju era troppu strettu.
Li andava bè chì stamane ùn era tantu pressatu.
I so ochji ùn chitavanu a cappellera bionda chì sventulizava.
Ancu a so figliola li avia chersu ultimamente un scooter per andà à scola. Guardendu sta merdusella viaghjà senza cascu, un telefuninu à l’arechja, ùn rigritava mancu appena d’ùn avè cidutu.

Sbuccava in cima à a stretta è digià sentia i stridi zitellini di a scola primaria vicina.
Facia listessa strada ogni mane è si piacia à guardà e mamme chì accumpagnavanu i so figlioli à a scola.

Si rallegrava di st’ambiente di vita chì surghjia da stu locu, l’urli, i scaccani, i pienti, u currizinumi, u bruddigumi di ‘ssu quartieru.
Pensava à a so figliola, à i so primi passi ‘nantu a scena sabatu scorsu, à l’emuzione ch’ellu avia spartutu cù a mamma, di a lea ritruvata cun ella.

- chì sà, tuttu ùn hè persu, forse… ?

Persu in li so sonnii ùn s’era avvistu chè troppu tardi chì u scooter avia incapucciatu.
A zitella venia di scrizzà è cincinava à mezu carrughju. Malgratu ch’ellu abbii frenatu a s’avia da parà di nanzu, ùn vidia chè i so ochji tamanti. Ghjera u so urlu à avellu scuzzulatu.
In un gestu d’addisperu s’era azzingatu à u cherchju per svià a camunietta.
È di fatti ùn l’avia tocca chì u camiunellu era pichjatu nantu à u trottoir.

*
*  *

Un mare d’ogliu si stendia davant’à i so ochji. Di solitu li garbavanu ste stonde mattutine nantu à sta terrazza, l’aria marina murzichenduli a pella. Ma sta mane s’ambiu di chietà cuntrastava troppu cù u furrore chì assaltava u so cerbellu.

U nostru nutiziale d’oghje ci hè presentatu da Carolina Saglione.

Venia di riservesi un’ antra tazza di caffè è stava à sente a voce luntana di l’animatore di RCFM.

Bonjour à tous , les nouvelles du temps pour commencer……

Cuntemplava u trizzinume di u sole à l’orizonte.

Un drame horrible s’est déroulé ce matin devant l’école primaire …

U tempu s’era firmatu.

Pour éviter un scooter au milieu de la chaussée, le chauffeur d’une camionnette de livraison a fauché une maman qui accompagnait son fils à l’école.
Dans la violence du choc la mère, le petit garçon de 6 ans, mais également le nourrisson dans la poussette ont été ……

A tazza li scappò di e mani.

5 commentaires:

  1. 337 pagini visti oghji. Femu tombula dipoi più d'una sittimana... È s'e ùn mi sbagliu ci hè oghji un articulu in u ghjurnali chì parla di u bloggu...

    Puri emu da calmà u ghjocu.

    I testi firmarani oramai in "una" dui o trè ghjorna. U ritimu cutidianu hè furmidevuli, ma à longu andà sarà impussibuli à tena. È po rimarchemu chì l'ultimu testu hè più lettu chè i pricidenti, cussì pirmittarà una littura più spartuta di u testu novu (è di i testi in prima pagina).

    Eccu, par avali ci hè trè testi novi in riserva, ma micca tutti riletti, curretti è finiti. Sò subratuttu trè novi scrittori à vena annant'à u bloggu !

    Ma a calata di ritmu ùn devi micca impidiscia di scriva, à u cuntrariu !

    Aspettu dunca i vosci testi !

    MB

    RépondreSupprimer
  2. N'importa chè 'ss'articulu, quellu c'hà scrittu s'hè scurdatu d'amintà à Mirvella è à Marcu Biancarelli.

    JYA

    RépondreSupprimer
  3. Dui picculi ritocchi vulsuti da l'autori : "Bocca di Ghjuva" è "inticciavanu" inveci di i currizzioni ch'aviamu prupostu.

    Sì di nò, iè, aghju lacatu à MB è Mirvella da cantu in a cronica. Ma certi littori ani fattu prestu à ramintà a so esistenza ! Eh ! Eh ! Eh !

    RépondreSupprimer
  4. A ghjurnata ùn hè ancu finita, ma ghjà vi possu annuncià... chì u record di fraquintazioni hè statu battutu oghji !!!

    È pà ringrazià à tutti i littori chì affaccani, vi possu dì ch'e rimettu à più tardi a me vodda di lacà du' o trè ghjorna da un testu à l'altru...

    Dunca dumani ci sarà a robba nova.

    RépondreSupprimer
  5. Bravu, bravu ! Tremendu l'affare, tremenda a messa in palcu ! Da veru mi màncanu e parolle per sprime tuttu ciò ch'aghju risentitu lighjendu sta nuvella vostra quì sopra. Vi possu quantunque filicità chì hè da veru stu "barattu" vostru pròpriu machjavellescu qualcosa da sèntesi vene e sètule... ! Mi piace dinù assai a manera vostra di palisacci tuttu in corti paragrafi lascenduci da lettori induvinà da per noi i ligami fatali tinenduli forte inseme.
    Ch'ellu duri in sempiternu l'ìndule vostru di u cuntà ! Cù stima Carole

    RépondreSupprimer