samedi 11 juin 2011

U catinu

Una nuvella
d'Angélique Bazziconi

Era longhitirata. Induvinava un odore d’etere ; li paria di sente i rimori, e voce, ma ùn pudia nè move nè parlà, li paria d’avè persu a nuzione d’ogni cosa. Più pruvava à capì ciò chì si passava menu ci capià. Facia sforzi tamanti pè ricurdassi, ma ahù. Ùn si ricurdava di nunda : u ghjornu , a stagione o puru l’annata... Nunda ! U solu affare chì li girava in capu era un catinu ! Chì sunniacciu !

Maria era una bella donna di cinquanta quatr’anni, primurosa di a so apparenza. Avia i capelli negri è luccicanti, a pella bianca, era fine è suttile. Di caratteru era dolce eppo’ cusì brava. O cum’ell’era brava….
Stava in un magnificu appartamentu à dui piani in un quartieru burghese di a capitale. Ùn travagliava micca, i parenti l’avianu lasciatu abbastanza ricchezze pè pudè campà quattru vite senza fà nunda. Ùn avia nè figlioli, nè fratelli, nè surelle, nè cugini, a so sola famiglia era Agata, a surella di a so povera mamma.

Qualchi mese fà, zia Agata avia cumminciatu à perde appena u cerbellu. I duttori avianu cunsigliatu à Maria di piazzà a so zia in un stabilimentu duv’ella serebbe suvagnata, perchè oramai era sicuru chì sta povera vechja ùn pudia più stà sola.
 
À Maria l’avianu sempre stumacata ‘sse ghjente chì mettenu i soi indè e case di vechji. Zia Agata l’hà fatta vene à stà in casa incù ella. Si n’occupava cum’ellu c’iole.

A malatia d’alzheimer hè una malatiaccia mì ! Sta donna cusì intelligente è indipendente era vultata à u statu di un cininu senza alcuna nuzione di periculu è senza più manc’appena di ragiunamentu.
Maria assumava a so carica notte è ghjornu. ùn avia mancu un rimpientu. Era brava, è ciò ch’ella facia, a facia vulenteri è di core.
Cum’ell’era brava Maria…

Un ghjornu ch’ell’era surtita un’oretta à fà qualchi cumissione avia trovu, à u so ritornu, zia Agata in terra. Era cascata da a scala. Stava in terra besgia besgia. Ancassai ùn s’era micca fattu troppu male : una sgranfiatura nant'à u bracciu, ma pochi affari. Si pudia esse tomba in sta scalaccia.

Da tandu Maria ùn hè più surtita è hà fattu stallà un sistema pè bluccà tutte e finestre. Ùn si sà mai sè à Agata li venia l’idea di sbalancassi à una finestra ! Pè apre ci vulia à fà un codice di quattru numeri. Ùn era micca cumplicatu eppo’ cusì o mancu era tranquilla Maria.
Zia Agata era in securità. U so penseru maiò eranu e scale ma survegliava, notte è ghjornu.

Ùn surtia più, durmia pocu è pè fà e so cumissione s’era fatta mette un urdinatore di quelli.
 
Si facia livrà tuttu in casa, chì putenza ‘ssu internet quantunque.

Li ci hè vulsutu pocu tempu pè imparà a manighjà l’urdinatore.
Eranu avà parechje settimane ch’ella discutava ogni sera, nantu un situ di scontri, incù un omu di i so anni. Avianu parechji interessi cumuni, Maria era brava eppo’ dinù colta è s’omu paria d’esse lu dinù.

Ben intesa quandu Ghjuvan'Carlu hà prupostu di scuntrassi, Maria hà dettu innò ! Ùn pudia lascià a Zia sola mancu un minutu. Ancu sì e finestre eranu assigurate bè, c’era sta scalaccia è Zia Agata chì pisciava quant’è sette vulia falà pè andà in cabinettu à ogni minutu.

Maria avia a brama negra di scuntrà à Ghjuvan'Carlu è qualchì ghjornu dopu s’hè fatta livrà un catinu ch’ell’avia cumandatu nant’à internet. Si trova tuttu nant'à Internet !

O tanti penseri ch’ell’avia pè Agata sta brava Maria !
 
E finestre chjose è assigurate, a porta chjosa à chjave, u catinu postu in camera, ùn c’era più prublemi nè penseri à avè !
 
Zia Agata era in securità è pudia piscià quant’ella li paria.
Cusì, Maria, a brava Maria, pudia sorte, spenserata, à beie un caffè cù Ghjuvan’ Carlu.


Passendu à u caffè chì Maria avia sceltu vicinu pè pudè andà ci à pedi, s’hè fatta ringuarscià da una vitura ch’ellu cunducia un certu Ghjuvan' Carlu chì era pressatu di ghjugne à l’ora à u so appuntamentu. Infine hè ciò ch’ellu hà contu à i pulizzeri.
 
Bella sicura, pè via d’iss’accidente Ghjuvan' Carlu hè ghjuntu in ritardu à u caffè è à Maria ùn l’hà trova. D’altronde sò avà trè mesi passati ch’ùn hà più avutu nisuna nova d’ella.

Sempre ciotta ind’un prufondu comà, a memoria di Maria si disceta ogni tantu è d’un colpu a donna pare rassirenata ! Zia Agata hè in securità, chjosa in camera, incù u catinu, ùn li pò accade nunda… Cum’ell’hè brava Maria...


4 commentaires:

  1. stu catinu devesse strapienu, avà? iscia...:))

    RépondreSupprimer
  2. Brava o Angelica !
    Issa nuvella hè degna d'un scenariu di Almodovar !
    Zipura M

    RépondreSupprimer
  3. À tutti :

    Ci hè du' o trè nuvelli chì sò ghjunti (Franceschi, Graziani, Meiran), è faci piaceri.

    È sicondu mè sò scritti di gran qualità ch'ani da truvà a so piazza quì.

    Ma imburcatu annant'à certi travaddi impurtanti di traduzzioni, ùn trovu u tempu di fà tuttu è vi dumandu d'avè pacenzia s'e so troppu longu à publicà i scritti.

    Ma vinarà a vi prumettu !

    MB

    RépondreSupprimer
  4. Vi filiciteghju anch'eiu, chì m'hà da veru tinutu in àlitu sta nuvella vostra ! Attaccate voi quì cù briù prubleme oghjinche micca tantu fàciule à solve. L'appena "d'inforse" - vogliu dì quì di 'suspense' - chì vo aghjunghjite poi à u vostru racontu u rende ancu di più forte. Mi pare dinù chì stu scrittu discrivi cù pertinanza, acutezza è, ben intesu, appinuccia d'imbrogliu amurosu cum'ella si deve a scelta "curniliana" ch'ella hè aspessu quella di campà cù di le personne malate è/o addebulite, ch'ella sìa per causa di l'alzheimer o d'altre malatìe debilitante è avviliscente. Vogliu quì dà di capellu è filicità [ senza puru manca appena cundannà à l'altri ] tutti quelli è quelle chì à dispettu di a suluzione di facilità ch'ella pò pare l'uspitalizazione scèglinu l'alee è i scoglii inaspitatti di u "mantenimentu in casa soie" di parenti vicini in nome d'un certu rispettu è d'un pocu di dignità da guardà.
    ... Per disgrazia à le volte u troppu stroppia è, ancu quand'elli sò fatti à fin' di bè, l'affari s'imbrùttanu è tandu nasce a litteratura... ! È voi in fatti di scrittura, d'ìndule di a lingua è di e manere diverse d'impinnalla per cuntà e vostre, site a parolle vostre una tercana ch'eo priziu. È datu ch'ellu hè oghje u ghjornu tinutu caru è benedettu vistu ch'ellu si dice u più longu di l'annata vi pregu una serata spampillente di mùsica, di canti è di spemi à l'usi vostri ! Scialàtevila è ch'ellu duri quant'è lu sempiternu u gèniu vostru pè scrive a vostra ! cù amicizia Carole

    RépondreSupprimer