samedi 27 novembre 2010

L'alchimistu

Una nuvella di
Petru Felice Cuneo-Orlanducci


Eramu u 3 di maghju di l’annu di grazia 1285 dopu à a nascita di u Nostru Signore. U veranu puru principiatu più d’un mese nanzu ùn paria micca troppu manifestàssi, è u fretu era firmatu, ancu s’è a neve si ne era andata di a cità di Valderesca.
À l’attrachjata, un omu, solu, s’avanzava, à l’appiattu. Era vestutu d’un largu mantellu cupertu d’una cappa bruna. Nienti ch’è à vede a so vistitura, s'induvinaia ch’ùn era tantu riccu. Ellu, si chjamava Ghjuvacchinu, è era cunisciutu cume aputicariu. Puru, a so vera passione, una passione pruibbita, era altra. In fatti, Ghjuvacchinu era alchimistu.

E so brame ùn eranu, cume tutti l’altri alchimisti, di trasfurmà u piombu in oru, ma una cosa più seria : truvà una medicina contr’à e malatie di stu tempu, tale a pesta, a lepara o u culerà chì sfragellavanu tantu a ghjente.

Ma qual'ellu fussi u so scopu, era ubligatu di piattàssi di a « Santa » Inquisizione per ùn fàssi micca tumbà di crudella manera.

Tandu, l’alchimistu si ne rientrava in a so stanza, purtendu sott’à u so mantellu arbe scarsulate colte à l’appiattu in a furesta. Culà, in una carciula bughja ingombra di stuviglii pieni o vioti, di libri, di cartapecure è di transigli diversi, l’aspettava u so discepulu Friziu, un ghjuvanottu pienu di bona vulintà, chì vense à u so incontru incù e so parole :
« O Maè ! Infine ! Principiava à esse inchietu ! »
« Sò in ritardu, ma ùn aghju persu u mio tempu. Aghju infine trovu l’Arba Divina è a Petra di Vita ! »
« O miraculi ! Ci site infine maestru ! Dopu à tant’anni. »
« Iè. Infine. Aghju tuttu ciò ch’ellu ci vole. Da quì à dumane, u rimediu universale serà prontu ! »

I dui omi eranu in un statu vicinu di l’apoteosa. Infine u fruttu di più di quarant’anni di travagliu, senza parlà di u travagliu di li so denzani, era ghjuntu à maturà. Infine l’umanità seria liberata di a malatia. Un ghjornu novu si pisava !

Senza più aspettà, Ghjuvacchinu cacciò u so mantellu è ne escì tutta a robba preziosa ch’ellu pose nant’à u vechju tavulone in alzu. Aiutatu da Friziu, Ghjuvacchinu principiò a priparazione ultima. Riscaldendu un lambiccu, un tianu, pigliendu u cuntegnu d’un caraffone, d’un altru, facendu riscaldà un altru tianu, tagliendu un pezzu d’un arba, facendu riscaldà un misculeghju, viotendu u cuntegnu d’un badrettu o d’una buccetta in un tianu bullendu, aghjustendu una polvara à una priparazione, o ancu un pocu di rena.
Più di cinque ore d’un travagliu accanitu dopu, tuttu era compiu. In un lambiccu, a medicina universale era pronta.
« Ci simu ghjunti ! Infine ! Site statu meravigliosu o maè ! » Si schjamò Friziu.
« Innò o Frì. Ùn averia fattu nunda senza tè è senza u travagliu di li mio antecessori. U tintu cuntinutu di stu lambiccu ùn hè nunda s’ellu ferma orfaniu è s’è nimu ùn u pudissi mai riproduce. Per quessa, aghju scrittu stu librettu, in cartapecura, chì spiega tuttu. Cusì, si puderà priparà à vulintà, sta medicina universale, s’è l’Inquisizione a mi lascia fà. » Spiegò Ghjuvacchinu, porghjendu un libru artisgianale à Friziu.

Tandu, Friziu pigliò u librettu, fighjulendulu cun ammirazione è teme, ma allora ch’elli s’alluntanavanu tramindui per andà à ripusàssi, colpi coci ribumbonu in a stanza sana, è una voce forte stridò :
« Aprite ! Aprite ! In nome di u Nostru Signore ! In nome di u Vescu ! »
Spavintatu, Ghjuvacchinu sussurò pianu pianu à u so discepulu :
« Fughji. Piglia u libru. Ùn ti rigirà micca. Fughji. »
U tintu Friziu averia vulsutu chì u maestru venissi cun ellu. Ma u tempu ùn era quellu di u cuntrastu. Senza risponde, pigliò u libru, u piattò in u so mantellu, è si ne fughjì per a seconda porta di a casa, in i chjassi scuri di a cità.

Poche seconde dopu, a porta principale fù sbundata, è una vintina di suldati di l’Inquisizione entronu in a stanza. Cun poche parole, reducinu u corciu Ghjuvacchinu à l’imputenza, è d’una zerga ebbria, sciumpulonu tuttu in a piccula carciula, lambicchi, caraffoni, badretti, buccette, è ancu mobuli. È malgratu i stridi, Ghjuvacchinu fù purtatu, di forza, fin’à e prighjone di a cità.
Quallà, fù prestu turmentatu è ghjudicatu per strigaria, è u Tribunale di l’Inquisizione u cundannò à morte. A so sola sperenza fù di sapè chì Friziu si ne era scappatu incù u libru chì permetteria di tumbà per u sempre ogni malatia.
Tutti i suldati chì eranu venuti, stu famosu ghjornu, à arrestà à Ghjuvacchinu è à sciumpulà badretti senza sapè cosa cuntenianu, morinu pochi ghjorni dopu di a pesta.

Friziu riescì à fughje in furesta, duve si piattò parechji ghjorni. Pò, decisu di vultà in cità per vede cosa pudia fà per aiutà u so maestru. Fù tombu nant’à u caminu da latroni.

U libru era statu messu qualchì ora nanzu in un coffanu metallicu è interratu in a furesta. Fattu di cartapecura, u preziosu documentu era statu cuncipitu per francà u tempu.

È fin’à oghje, ùn hè micca statu ritrovu.

10 commentaires:

  1. 331 pagini visti arimani !

    U pricidenti record era di 293 (dui volti). Hè dunca sbuttatu in pisticciuli l'anzianu record.

    RépondreSupprimer
  2. Currettu "vense" è "pose" o Petru Filì.

    Aghju fattu u ghjiru di a Corsica pà fammi cunfirmà u passatu simpliciu di u Cismonti !

    RépondreSupprimer
  3. Currettu dinò "qual'ellu fussi", è tandu a possu dì : eccu un testu magnificu di Cuneo !

    RépondreSupprimer
  4. Storia assai murale chi quella...
    Pensate a Hahneman, l'inventore di l'umeupatia, e perseguitu in u so tempu, a Andrew Still, l'inventore di l'usteupatia, perseguitu anch'ellu a a so epica.
    Pensate dino a Georges Soulie de Morand, ambassadore di Francia in China chi
    scupri l'acupunttura chinese e a fece cunnosce in Francia, e chi fu perseguitu, nanzu chi Mao ellu stessu fece interdisce l'acupunttura traduzionale. Pensate
    ancu, eppuru a Benveniste e a e so ricerche cuntruversate
    su a "memoria di l'acqua", di cui u prufessore Montagnier dice
    oghje ch'ellu un meritava isse cuntruverse, chi
    e ricerche muderne su u VIH ghjunghjenu a un
    risultatu paghjese...
    Chi prupostu universale chi quellu di issa nuvella ! Bravu a Cuneo !
    Chi l'Inquisizione, in Corsica, inghjunu a cunnosce !

    RépondreSupprimer
  5. Bravu o Pe
    E lettrici subbacate si campanu a nutriscesi di e fantasmagurie di l'autori pellighjovani e sanguifreschi...
    A prupostu, pe festighja l'anniversariu di u primu mese di a rivista, chi penseriate
    d'urganizzacci un fistonu cannibali in a furesta di l'Uspedale ?
    In u Cismonte, pe disgrazia a tradizione cannibale s'he persa...

    Zipura M

    RépondreSupprimer
  6. Beddi riffarenzi o anonimu, in più cussì t'avemu d'altri pisti aparti pà a criazioni, u fantasticu è u tremu...

    Vurriu dì una parolla annant'à a qualità di 'ssu testu di Cuneo : par mè ci hè un passu in avanti à niveddu stilisticu è a vurriu fà rimarcà.

    Mi piaci monda l'imaginariu di 'ssu ghjovanu scrittori, è avali ùn si pò chè suttilineà u prugressu literariu lighjindu 'ssu nuvellu testu...

    Aspittenduni d'altri di stessu suchju !

    RépondreSupprimer
  7. Dicu anonimu ma vicu avali a signatura : Zipura M !

    Un (altru) testu à vena o Zipura ?

    RépondreSupprimer
  8. Parlendu di i testi à vena : vi possu dì chì ci hè torra a robba di qualità in i ghjorni futuri...

    RépondreSupprimer
  9. Ha da vene un testu, chi svilera u segretu d'Arganam e a sorte di l'Ishim, l'anghjuli di u focu...
    Zipura M

    RépondreSupprimer
  10. Chì tanti Paulo Coelho...

    JYA

    RépondreSupprimer