mardi 16 novembre 2010

Un soffiu…

Una nuvella di
Battì Albertini





Sò più di vinte minute ch'ellu corre oramai ; alzendu sempre di più u ritimu, allunghendu u passu è saltendu cum'è una muvra à mezu à i scogli à l'occasione ma ùn a face micca à avanzallu.
U chjassu u cunnosce à mente ; duie volte à settimana ci vene à fà u so footing di matinata, nanzu ch'elli ghjunghjessinu i turisti. Di sta costa benedetta di l'Agriate ne cunnosce ogni cala, ogni passeghju ind'è a rena ò à mezu à i sciappali ; nimu u puderebbe supranà nant'à stu parcorsu eppuru...

Eppuru dipoi ch'ellu s'era fattu l'arrestu à l'arice di u stagnu di u Lotu, dipoi ch'ellu avia intesu stu trostu spavintevule à mezu à e canne è ch'ellu era scappatu à trunchera di collu, stu soffiu ùn u cappiava più. Stu rimore orrendu chì paria sempre di più vicinu è prontu à sfracicalli u capu contru à i pentoni di matticciu arrutati da u mare, u sale è u ventu. Vultassi, ùn s'era pussutu vultà da tantu ch'ellu avia a paura, u telu ; da tantu ch'ellu ùn vulia micca vede u visu di a morte chì l'era apressu. U soffiu li paria sempre di più putente è uddiosu.

Francata a torra di a Mortella, smizata da l'Amiral Nelson in un' uchjata, vede i primi battelli di i ricconi chì ci anu passatu a nuttata à impuzzichisce u nostru mare. Spera ch'omu sia arrittu da pudè aiutallu, porghjeli una manu salvatrice ò puru chjamà à a riscossa i giandarmi in San Fiurenzu ma, techji di sciampagni è vinu nustrale, sò tutti addurmintati ind'è u lussu assuluttu mentre ellu prova di francassila da l'appetittu feroce d'un mostru misteriosu. Nimu annant'à i ponti bagnati da i primi ragi di u sole matutinu ; ci vole à sbrugliassi solu.

A cala di Fiume Santu stende oramai e so bellezze à i so pedi ; l'acqua culore di paradisu ùn hè ancu mossa da u ventu è pare d'oliu... l'oliu santu ch'ellu si dice mentre ellu cerca un' alternativa per burlà a bestia famita è angusciosa chì u seguita dipoi una mez'ora. Ad un trattu ecculu chì capiciotta in l'onda serena è nota à mezu à i battelli ma ùn c'hè mancu una scaletta da salvallu. Una bona hè chì sottacqua u soffiu s' indibbulisce, smarisce guasi ; u so cerbellu hè liberatu da stu pesu infernale ma ùn c'hè l'arte di gode di sta pace è si move tale quale à un pesciu sin'à a sponda vicina.

In quattru è trè sette, manchendu di sguillà è truncassi l'ossi nant'à i scogli crosci, ritrova u chjassu chì s'infrugna sott'à i machjoni è riparte in più bella. Ma u soffiu, chì paria d'avè smaritu una stonda, volta pianu pianu, spietatu, È più si spiccia, più u rughju di morte si face prisente, si face crudele. U visu è i bracci stafilati da e scope, u coghju stracciatu da l'albitri è i muchji chì falanu sin'à u mare, lascianu una striscia di sangue chì pare d'azzizzà a zerga di u mostru ch'ellu hà scumudatu è chì pare d'avvicinassi sempre di più. Più a so corsa si face rapida è più li pare chì Falcina hè pronta à taglialli l'anche è mandallu ind'è una cala sott'à u chjassu à fassi manghjà da i granci famiti è voraci.

Pigliatu da a fatica è l'addisperu, pinsò ancu d'abbandunà a so corsa scema è ritruvassi ochji à ochji, pettu à pettu cù stu dimoniu, per more cù curagiu è onore piuttostu chè di fassi tumbà ind'u spinu cum'è un vigliaccu scappaticciu. Face per piantà quandu a vista di i primi pumataghji, marchjendu à strascinonu cù i so sacconi più grandi chè elli à dui passi, torna à dallu u curagiu necessariu pè salvà a so vita. Luntani ùn sò più tantu luntani è si dice chì, mischjendusi à u gruppu, unu puderebbe forse piglià a so piazza prumessa di preda discimpiata da i denti d'acciaghju di a bestia. Ind'è un' ultimu sforzu, cum'è un' ultimu stridu di vita ; s'affretta cum'è mai, u core à sbattagliera prontu à schiattà è veloce quant'è un cignale feritu. Indarru. Sta volta u soffiu pare di ghjunghje à u so livellu, guasi à accarizzallu cù u so alitu funestu ; cusi forte è schifizzosu ch'ellu li pare guasi d'esse u soiu. Inciampa nant'à una petra tradimintosa è casca cum'è una pera merza à l'orlu di u mare...

Quand'ellu apre l'ochji u lindumane, hè subbitu abbagliulatu da u lume è a bianchezza di i lochi in giru à ellu. A morte ùn si rivela cusi trista è nera in fine di contu. Abbambanatu è debbule quant'è si pò esse quand'ellu si face u viaghju à l'altru mondu ; li si pare quantunque di vede unipochi d'omi riuniti accant'à ellu. E voce puru dolce è serene di l'anghjuli l'intronanu u capu ma prova di capì ciò chì si dice: " L'anu trovu chì s'annigava guasi ind'u palmu d'acqua ; si vultuliava è mughjava cum'è s'ellu fussi assaltatu da una banda di lupi". U duttore chì risponde :"Crisgia di deliriu, ch'ellu s'arripusessi è feremu u bilanciu dumane."

7 commentaires:

  1. Vi lacu apprizzià 'ssu testu di Battì Albertini, chì vo truvareti ancu annant'à u foru corsu.

    Ma intantu pirmittiti di dì : dumani sarani 20 ghjorna di seguita chì 'ssu bloggu metti o mancu un testu in linea ugni ghjornu !

    E oghji varcaremu i 3 000 pagini letti, pà pensu una trentina o una quarantina di visitori diffarenti (m'appoghju annant'à i sundaghji è i diffarenti ritorni di littura ch'e t'aghju).

    Pensu chì u situ vivi è faci à pocu à pocu a so piazza.

    Ma ùn esiteti à scriva è à prupona d'altri testi. A scumissa hè di tena 'ssu ritmu u più pussibuli, buschendu sempri i novi peruli !

    RépondreSupprimer
  2. U scrittu ùn hè mancu male ma l'autore quant'ellu hè goffu ! Ma chì faccia !!!

    RépondreSupprimer
  3. o MM hè vera chì ghjè interessente. l'idea è u ritimu mi piacenu assai. si pò dì chì stu scrittu (è a faccia di l'autore) anu trovu a so piazza nant'à stu belli situ ;)

    RépondreSupprimer
  4. Nasciarà una litteratura fantastica corsa ?
    s'avvia pian pianinu.
    Cumplimenti à issu mazzulu d'autori.

    Micheli

    RépondreSupprimer
  5. I had a dream... chì no arriuniamu annant'à stu situ una vintina d'autori... C'era a robba nova tutti i ghjorna... buddia l'imaginazioni... i putenzi nasciani quì... chì si ni parlaria in u Mimuriali di i Corsi vulumu 45 in 2369... "A scola fantasista" di l'anni 2010, diciani in l'articulu... u mumentu chì u vulcanu criativu hè sbuttatu di colpu... Attirendu l'illustratori, i critichi, i senaristi... libarendu i futuri currenti gore, trash, gottichi, extatichi o postmuderni corsi cunnisciuti à modu univirsali... O puttana ! Chì dreamu !

    Amministratori

    RépondreSupprimer
  6. Tremendu cume tutti i to scritti,caru MM.Mi piace sempre a cumpania di i to scritti.:)

    RépondreSupprimer