Tarrori è Fantasia

U Tira G (5/5)

2012-03-03T04:26:00.000-08:00

Una nuvella di

Paulu Franceschi

VI. Turghjeta, u 13 lugliu 2084, deci ori di sera

Anghjula Santa aia appughjatu annantu à u buttonu di a scatuledda chì era posta annantu à una piccula tola, in u so curridori. U surrisu annantu à i so labbra alluminava u so visu. Fighjulava a scatuledda. Un incantu... Era tamantinedda 'ssa scatula, alta un centimu è larga trè. U cuparchjulu era beddu frustu, è annantu ci era marcatu : « Tira G ». Po ci era dinò dui disegni, chì riprisintavani un masciu è una femina. A luminedda di u disegnu chì currispundia à a femina era accesa.

'Ssu tiraghjastema, u 'dd'aia lacatu diciottu anni in daretu, in 2066, un stughjanti tedescu in linguistica. Hans si chjamava. Anghjula Santa vidia sempri u stughjanti caccià u tiraghjastema da una piccula cascetta chì cumprindia sei càntari. In a cascetta, di quissa Anghjula Santa si n'invinia bè, ci era una cantara biota. U stughjanti biondu biondu aia cacciatu a scatuledda è l'aia dumandatu di pruvà la. À u principiu, ci era marcatu « Tira Ghjastema » annantu. Ma cù u tempu, u tiraghjastema era diventatu frustu è l’ultimi lettari erani torri sfassati. L'aia spiigatu dinò Hanzu ch'è u tiraghjastema pudia funziunà in dui modi: masciu o femina.

– « Una mascina cugnitiva » l'aia spiigatu Hanzu. A vi lasciu, aia dittu u stughjanti. L'emu fattu incù uni pochi d'arrighjistramenti è di scritti antichi antichi, ch'emu ritruvati. N'emu coltu a struttura semantica. Pruveti lu, dopu mi diciareti... Vultaraghju, da quì à calchì mesi.

Ma u tedescu ùn aia più datu nutizii. Ùn ci era mai più vultatu. Anghjula Santa aia aspittatu parechji sittimani, è ancu parechji mesa, ch’è Hanzu si ni vultessi, ma quiddu ùn s’era più vistu. È Anghjula Santa s'aia tinutu u tiraghjastema. Eppo quandu eddu era mortu Ghjaseppu di Tassu dodici anni fà, era ferma sola à sapè parlà a so lingua... À u veru fondu, ùn sapia micca tuttu à fattu s'edda era sola, o sì par furtuna, ci era dinò calchissia d'altru chì parlava sempri u corsu. I prima tempi, Anghjula Santa aia fattu a so inchiesta da par edda ed aia chersu in parechji paesi di u circondu par veda s'è ci era sempri calchissia chì parlava u corsu, ma ùn aia più truvatu à nimu. Eppo dopu i ricerchi apprufunditi erani stati fatti da i scentifichi in l'isula sana. Ma 'ss'ultimi deci anni, ùn s'era più trovu à nimu. In l'isula, era dunqua ferma sola à parlà a so lingua. Bon'parechji chjami erani stati lampati, ma senza risultatu. Po aia spiratu Anghjula Santa ch'eddu ci fussi sempri calchissia fora di Corsica chì parlessi sempri u corsu. Ancu in altrò è à u stranieri, l'inchiesti funi fatti. Ma senza dà nissunu risultatu. À u capu di parechji anni, i richerchi funi abbandunati. L'aiani pubblicati i Reti d'infurmazioni chì Anghjula Santa era ferma sola. Ci era ancu u so ritrattu annantu à certi publicazioni.

– Chì sarà diventatu, 'ssu tiraghjastema chì mancava in a cascetta ? pinsava Anghjula Santa. Era un beddu sapè... Sarà statu lampatu in calchì rumenzulu, fà chì, pinseti Anghjula Santa. Forsi Hanzu u si tinia par eddu in Alimagna. Era podarsi dighjà sciappatu o ancu brusgiatu. Si pudia dì ch'eddu ùn esistia più...

Anghjula Santa fighjuleti annantu à piccula tola. U “G” era in traccia di sfassà si à pocu à pocu. Po Anghjula Santa spignì u lumu. Era tardi è t'avia u sonnu. Si pudia dorma avà.

U Tira G (4/5)

2012-03-02T04:15:00.000-08:00

Una nuvella di

Paulu Franceschi

V. Barcilona, u 13 lugliu 2084, ottu ori di sera

U sguardu d'Anghjul'Antonu si punì in terra. Ci era una vanchjera incù una cuppetta di risu, un picculu pezzu di carri, un troncu di pani, un bichjeri d'acqua è dui pìdduli rossi. Ùn aia tanta fami ma si sciaccheti un pocu di risu. U restu u pudia lascià par dopu. Par quissa ùn u lacavani micca mora di fami. Da bia è da manghjà, ci era sempri. I dui roboti verdi li purtavani a cuddazioni è a cena. Ci vulia ch'eddu fussi in bona saluta. Hè vera ch'à sissanta novi anni, è malgradu 'ssa vitaccia di prighjuneri, Anghjul'Antonu era sempri in bona forma. Un miràculu ghjera. Erani avà quatordici anni ch'eddu era statu catturatu da quidda scenzimaffiaccia chì s'era cullucata in 'ssa Gauditorra Aluta di Barcilona. Faciani i sperimenti incun eddu. A so esistenza misaredda ùn era altru nienti cà quidda di un tupanchjinu di laboratoriu. Li mittiani l'alitrodi è l'attrazzi in capu, podarsi par analizà u so capu o u so ciarbeddu. Ciò ch'eddi faciani asattamenti, ùn a sapia micca Anghjul'Antonu. Chì ùn a 'ddi diciani micca. Fà chì era un gruppu di scentifichi scemi chì vuliani u puteri è tarrurizà la ghjenti. Faciani i ricerchi annantu u ciarbeddu umanu. Ma aia capitu bè Anghjul'Antonu ch'eddi u studiavani.

Dui anni fà, era ghjuntu un'antru prighjuneri duranti dui mesa in 'ssa piccula stanza. Era un tipu di a Nuvella Guinea. Era urighjinariu di un paisolu persu di 'ssi cuntrati. Ma u tipu era di capu è di coda, è si pudia ancu discorra incun eddu in spagnolu. Ci capia, mì. Juspè, si chjamava. Aia spiigatu à Anghjul'Antonu chì sicondu ed eddu, 'ssa scenzimaffia facia spezia di trafficu incun eddi. Ciò ch'eddi vindiani, ùn si sapia asattamenti, ma t'aia calcosa à veda incù u ciarbeddu. Dicia quiddu chì a scenzimaffia li surpavani calcosa in u ciarbeddu, li prilivavani calcosa in a so menti. Dopu u si vindiani, à prezzu altu, ch'eddu dicia Juspè. T'aia l'aria di cunnoscia. In fini di contu, pinsò Anghjul'Antonu, tuttu quissu ùn era ch'è un'iputesa, ùn ci era nienti di sicuru. T'aia l'aria sicuru, Juspè, ma à u veru fondu, chì provi t'avia ?

Anghjul'Antonu pigliò in manu u picculu ugettu di plasticcu è l’accarrizzò pianu pianu. Po cuminciò à caccià pianu pianu una chjappeda in un scorru di u sulaghju di a so stanza, incù i so ugni. Anghjul'Antonu punì a scatuledda in a so piattatedda, eppo rimissi a chjappedda annantu. Dipoi tanti anni ch’eddu era quì, i so vardiani ùn si n’erani mai avvisti ch’eddi si tinia ‘ssa scatuledda. Quali hè chì a sà s’è li saria piaciutu. Incù quissi, incù i so sperimenti bistrocchi, ùn si pudia mai sapè...

Dipoi tantu tempu, Anghjul'Antonu ùn aia più avutu nutizii di a so famiglia. Chì sarani diventati, tutti ? Ùn passava un ghjornu senza ch'è Anghjul'Antonu pinsessi ad eddi è l'imaginessi. U diviani cunsidarà com'è mortu. Sparitu. Purtantu, era vivu. In quiddu catagnonu. Ma chì vita. Quidda di u prighjuneri. Manghjà, bia, fà si metta l'alitrodi in capu par fà avanzà 'ssa scenza tonta. Eppo ùn ci era nimu chì si pudia parlà...

U Tira G (3/5)

2012-03-01T04:10:00.000-08:00

Una nuvella di

Paulu Franceschi

III. Furesta Nera, u 6 uttrovi 2067

Hans si sintia faticatu persu. Aia studiatu mori ‘ss’ultimi ghorna eppo ùn aia durmitu cà dui ori. Ùn era micca stata una bona idea di studià à tempu a linguistica è i scenzi cugnitivi. Ci era troppu travagliu par priparà i dui asàmini. Hans sintia i so ochja chì pinnulavani. Ma ci vulia ch’eddu ghjugnissi in tempu ed ora in Custanza par piglià u Magnettrennu. Era un pocu in iritardu. Ci vulia à accilirà un pocu. T’avaria u tempu di dorma dopu, una volta in u Magnettrennu. Ma ùn ci vulia micca à mancà lu. Forsi u stradonu aerianu aia da essa più beddu dopu. Par avà, incù 'ssi nivuli neri, si vidia pocu affari. Era piuttostu bughju. Eppo aia cuminciatu à candiddà. Si sintia ancu sunità avà. Di tantu in tantu, una accendita alluminava quiddu ariali di a Furesta nera, vicinu à u lavu Titisee, in i circonda di a Fossa Rinana. Ma fà chì da quì à deci minuti, s'aia da sbuccà in u chjaru, pinsava Hans. Tandu si pudaria andà un pocu più lestru.

‘Ssa vintata, Hans ùn l’aia micca antivista. Una vintata trimenti, furtissima, putintissima. Vinuta da ùn si sà induva, da un cantu di celi ignuratu. Ùn a s'aspittava mancu stampa, Hans, quandu fù avvampatu. Fà chì navigava dighjà appena troppu lestru incù u so propulsori à u zirconiu, in quidda timpistata. Hans si sintì bulà in aria com'è una sbarrabàttula, prughjittatu ch'eddu fù à deci metri in davanti. Di u ditu grossu, appughjò à fondu annantu à u frenu... Ma aia dighjà persu u controllu di u propulsori chì di colpu, si ribuccò. Hans si ritruvò à capu in ghjò, com'è una magacciula in preda à a timpistata. Feci tuttu par ridrizzà u propulsori, ma in vanu. Quandu pichjò in ‘ssu pinu altissimu è fustilargu, è chì a vita li fù tolta, u fumaccionu intugutuppò à Hans è u so brionu di tarrori, è u so propulsori rottu.

IV. Barcilona, u 13 lugliu 2084, sei ori dopu meziornu

In 'ss'appartamentu di u sittant'unesimu pianu di a Gauditorra Aluta di Barcilona, Anghjul'Antonu aia compiu a so siesta. Aia durmitu una mez'uretta. Si sintia arripusatu.

– Erani beddi 'ssi ghjastemi. In i tempi, s'imprudavani mori. Ti n'inveni ? Ùn ha micca un 'antra ? dissi Anghjul'Antonu, cù u so verbu altu.

– Ancu secchi tù incastulatu !

– Ah, quissa, ùn a cunniscia micca. U vedi, oghji aghju amparatu calcosa. Eh ! Si n'ampara tutti i ghjorna. Aiò dì mi un'antra...

– Ch'è t'asciuvi !

– Quissa hè bedda cunnisciuta. L'aghju intesa beddu suventi. Dì mi ni ghjà un'antra, ma allora di quiddi beddi, a sà, di quiddi cumplicati chì si diciani in i tempi...

– Ch'è tù scioppi !

– Ma allora, quissa hè simplicia... Ié parlu di quiddi beddi cumplicati, abbastanza longhi, a sà... Si sintiani, à l'ebbica. Aiò, rifletti un pocu. T'ani da rivena...

– Ancu perdi tù u ciarbeddu !

– Quissa d'accordu, ma si senti po à spessu. Ié dicu una bedda ! Aiò, fà u picculu sforzu..., dissi Anghjul'Antonu.

– Ch’è tù lampi u ciarbeddu è fà ni una frittata pà una banda di sturneddi orbi !

– Ah quissa sì ch’hè bedda ! A sapia bè ch'è tù i cunniscii, chì t'aiani da rivena. Aiò dì mi ni un’antra, par piacè...

– Ancu buli tù senza l'ali !

– Ah quissa mi piaci assà. Avà vecu ch'è tù sè lanciatu. U vedi, l'ha poca a mimoria ! Aiò, dì mi ni un'antra, và...

– Ch'è tù fussi bagnatu da i lacrimi di donna !

– Quissa dinò mi piaci abbastanza. Allora và bè cusì. Mi n’ha amparatu uni pochi di beddi. Cunnosci mori affari, quantunqua. Quant'è tù ni sa...

Eppo ci fù u silenziu in a stanza.

U Tira G (2/5)

2012-02-28T03:59:00.000-08:00

Una nuvella di

Paulu Franceschi

II. Turghjeta, u 13 lugliu 2084, sei ori dopu meziornu

Anghjula Santa aia compiu i so faccendi. Par oghji, li bastava. Aia zappittatu un pocu in u so urticeddu. A menti era in fiori è muscava chì era un incantu. Eppo Anghjula Santa aia castratu dinò uni pochi di peda di pumati. È ci era ancu vulsutu à inacquazzà i so zucchetti. Era cuntenti, Anghjula Santa, di u so travagliu è si ni vultava, pianamenti è bè, in casa soia. Li piacia à fà 'ssu travagliu dopu meziornu, versu cinqui o sei ori di sera, ma prima di a trabucinata quantunqua. Vinia bè tandu. Chì l'eria era cusì bona à st'ora. Ùn facia nè caldu nè fretu. È avali, Anghjula Santa si ni pudia ghjentra pianu pianu in a so casa.

In u circondu, si sintia un bisbigliu d'aceddi. Chì 'ssu locu era veramenti u paradisu di l'aceddi. Primamenti, ci era mori arburi casciuti. Sicundamenti, era beddu pulitu in terra. À l'aceddi, li piacia u pulitu. È in più Anghjula Santa lacava sempri pà l'acidduchji uni pochi di graniceddi. Quissa, piacia mori à l'aciddamu. Faci chì cusì, à pocu à pocu, l'acidduchji s'erani arrighjunati. Uni pochi, erani mansi tonti. Quì ci era meruli, ghjandaghji, currachji, capineri, pettirossi. Ci era guasi tuttu u bulamu chì friquintava quiddi loca. Sicond'è l'aceddi, faciani à l'appiattu o à palesu. Chì ogni razza d’aceddu t’avia u so carattaru. In certi staghjoni, da luntanu, si sintia ancu u cuccu, a puppusgiula, è di i volti, ancu u pichjaronu. Ma quiddi ùn s'avvicinavani tantu. Inveci quì in piazza, ancu a cardalina è a codizzennula ci ghjunghjiani. Di i volti, 'ssi acidduchji si sintiani tutti à tempu. Uh chì cuncertu, tandu. Sintiati vo i trilli ! Tamanta lachedda ch'eddi t'aviani ! Ognunu vulia fà sapè ch'eddu era quì, è ch'eddu t’avia a più bedda boci. Anghjula Santa cunniscia ogni cantu è ogni boci d'aceddu l'era famigliari.

Anghjula Santa francò u purtonu incù u sopraporta in petra zuccata di a so casa, si tirò l'usciu è sbuccò in u curridori. Ci fù u silenziu, eppo si sintì:

– «Allora, ùn ti s'hè micca intesu, oghji», dissi a boci chjara è schietta d'Anghjula Santa. Ùn ha dittu nudda. Fà chì mi faci u musu. Mi faria piaceri di senta un pocu a to boci... »

– Eh... ! Ch'è t'asciuvi !

– Ma fà mi u piaceri, ùn cumincià micca à ghjastimà com'è tù faci sempri, dissi Anghjula Santa. Cerca di perda 'ss'abitudina, una volta par sempri.

– Ch'è tù perdi a trippa è u biddicu !

– Ah ! Cummenci dighjà ? A faci apposta allora. Hè par fà mi mantagà... Mi vò imbambuliscia, sì Mi vo fà intuntiscia, aghju capitu.

– Ch'eddu ti piglii un ventu !

– Ùn ti si senti micca di a ghjurnata è a sola cosa ch'è tù dici, hè par fà mi ...

– Ancu lampi tù i dita è divurà si li u falcu neru !

– U vedi chì mi taglii a parola. Lascia mi finiscia, omancu, ciò ch'è dicu. S'è tù parli à tempu à mè !

– Ch'è t'imbuffi !

– Povar'à tè ! Ùn a sa micca chì a ghjastema voglii è ghjira, volta in capu à chì la tira ! risposi Anghjula Santa.

– Ancu fussi tù nata tarantedda è marità ti si u cateddu muntaninu !

– Ùn parli micca duranti un'ora è ùn trovi cà quissa à dì mi !? Ah sè bravu, si pò dì ch'è tù sè bravu incù mecu !

– Ancu fussi natu tù ghjumenta di preti è manghjà ti si a to donna à l'aperitivu !

– Com'è tù sè gattivu ! risposi Anghjula Santa. Sè veramenti malvaghju !

– Ch'è tù lampi u fecatu è a melza !

– Ah ! I pulmona i mi lasci... Com'è tù sè bravu ! Ancu i pulmona, u cori è u stomacu, mi sbrugliaraghju sempri. Eppo, pà u fecatu, ùn mi leva nudda, chì n'aghju quattru da cantu in u cungelatori. Unu, u mi faraghju insittà. Allora, ùn mi piglii altru nudda ?

– Ancu perdi tù u ciarbeddu è i dita !

– Ah, ùn ti bastava micca. S'è tù mi cacci po u ciarbeddu, allora tandu sò lecca. Quì po ùn mi ni sortu mancu in flacchina.

– Ch'è tù sii castigata !

– Pesta ch'è tù sè ! Ùn sa dì ch'è gattivi paroli.

– Ch'è tù lampi u fecatu è divurà si lu i corba famiti... !

– U m'ha dighjà cacciatu u fecatu, o tontu ! U mi vò livà dui volti, u fecatu ? Povaru à tè ! Ùn sa mancu cuntà ! Vecu chì sè bonu à ghjastimà è basta. A t'aghju ditta milla volti ! Ùn si pò micca avè una discussioni incù tecu.

– Iiih... ! Ancu... !

– Fora di a ghjastema, ùn sè micca capaci di dì calcosa di seriu, d'assinnatu. Aiò ch'ùn sè bonu à spiigà ti è fà cunnoscia u to parè comu tuttu u mondu.

– Ch'è t'imbuffi !

– Quissa l'ha dighjà ditta ! Cambia un pocu di discorsu ! Ripeti sempri listessi affari... Basta, basta. A vedi bè ch’ùn si po micca raghjunà incù tecu. Auh, t'aghju intesu abbastanza par oghji. U troppu stroppia ! Ùn dì più nudda, và. Cheta, cheta ! Ùn ti vogliu più senta.

Eppo ci fù u silenziu. Avali, si sintia dino u cantu di l'accidumu. Po a boci d'Anghjula Santa ripresi.

– «Ti lasciu. À prestu, u me tisoru...».

A boci d'Anghjula Santa s'era fatta dolci, tennara tennara...

U Tira G (1/5)

2012-02-26T03:39:00.000-08:00

Una nuvella di

Paulu Franceschi

I. Roma, u 9 aostu 2080

Facia buddonu in quidda tarrazza di caffè di a piazza Campu di i Fiori. Si sdrughjiani i baddini in istacca, à st’ora ! A piazza era bagnata da u soli è tuttugnunu era in brama d’un bichjeri o d’una rinfriscata. Pianareddu, l’omu pichjeti di ditu annantu à a tola.

– Allora quantu ?

– Cinqui millioni panscudi l'unu, risposi Felipe.

– Sò cari !

I dui omini fighjulavani i dui cilindri turchini posti annantu à a tola, affascinati. I dui ugetti erani longhi sei millimitri. Ed erani inturniati d’un alu turchinu intensu.

– Deci millioni panscudi in tuttu. Hè u prezzu. Par avè 'ssi neuroscanni, ci voni parechji anni di travagliu. Certi volti ancu parechji dicennii... Eppo ùn facciu micca minzioni di i risichi... A sapeti ch'è i nosci, i neuroscanni, sò unichi. Hè ropa rarissima, eccizziunali. Un cucapá d'America Cintrali è un budibud di l’isuli Salomoni.

– Pudemu pagà u prezzu. Ma chì garantita t'aghju annantu à a qualità ? Attenti chì ci voli ch’è a ropa fussi d'ottima qualità. Chì s'ùn cunveni micca, vogliu essa rimbursatu subitu subitu.

– Hè tuttu ropa garantita, dissi Felipe. A garantita, ci hè à centu par centu. S'ùn cunveni micca, si cambia. O si rimborsa, com'è vo vuleti. Ma a noscia, a ropa, hè di prima trinca. Ùn hè mai successu, ch'eddu ci fussi statu bisognu di rimbursà. Di i nosci neuroscanni, i clienti sò sempri cuntenti.

– Sò cumpatibuli incù i Russii è i Sluveni, omancu ? Parchì t'avemu i clienti in Russia è in Sluvenia Suttana.

– Sò cumpatibuli incù ogni sterpa umana. I nosci ingeniori a poni accirtà, chì i sperimenti apprufunditi ch'emu fatti l'ani dimustratu. L'emu missi à a prova, più d’una cintunara di volti. Par quissa, ùn emu mai avutu un prublemu.

– Allora cumpraraghju 'ssi dui. U cucapá è u budibud.

– Eppo l'indici di metacugnizioni hè altissimu: 121 pà u cucapá è 117 pà u budibud ! Sò stati misurati incù a famosa scala P-II-45-Davidson.

– Và bè. Vi dumandaraghju dinò una discrissioni assuluta. Semu d’accordu ?

– Ben’intesu ! Và senza dì si.

L’omu fighjulava annantu à u screnu tridiminsiunali olugraficu. À u capu di calchì stonda, feci parechji muvimenti di ditu annantu à u screnu, à spiccera, eppo capizzò:

– Hè fatta. V’aghju mandatu i solda.

Felipe cuntrullò annantu à u so screnu. À quandu compia a virificazioni, i dui cilindrini cambietini di mani.

– Allora t'avaraghju podarsi un'antra cummanda, da quì à un mesi o dui. A vi cunfirmaraghju. Mi ni ci vurria unu incù una lingua di i circonda di u Mari Tarraniu, l'isuli di prifirenza. Hè pussibuli?

– T'emu calcosa chì pudaria cunvena in priparazioni. Ghjustu appuntu pò essa prontu da quì à calchì mesi. Ma hà da custà caru. Emu pigliatu mori risichi par quissu ! Ma hè ropa d’altissima qualità, eccezziunali.

– Pagaremu, s'edda hè ropa bona.

– Hè bunissima. Ma ci hà da vulè à aspittà dinò un'ugna, ch’è tuttu fussi in ordini. Ma sarà prontu in tempu ed ora.

Annovra (2/2)

2011-12-17T04:21:00.000-08:00

Una nuvella di

Ghjuvan Francescu Rosecchi

Passò in lu salottu è si stracquò annant’à u soffà largu ch’edda supranava una tappizzeria d’una scena di caccia medievali. Pinsò à l’affurtu à u racontu d’un tussicumanu dund’era quistioni di l’antecristu in una vadina, aghju vistu l’Antecristu in una vadina, dicia spessu u drugatu, ma ùn aghju avutu a paura micca, l’aghju dettu pscitt !! ed hè mossu. A sapia, almenu, ciò ch’eddu era l’antecristu ? Serghju ùn la sapia tantu manch’eddu. U ghjornu di l’intarru di quiddu tippu, i so cumpagni d’eruina aviani piantatu i sciringhi in u legnu di a cascia. A famidda ùn avia mancu riagitu à quiddi onori pustumi. U babbu durmia mentri a messa. Hè in tutti casi ciò ch’eddu si conta.

Joanna vensi à righjunghja lu saltichjendu com’è a ghjatta, allisciava contru à l’orlu di u soffà a ciuffa grassa di u so amanti è ridia. U so corpu duttili gallizava in u so largu tee-shirt. Mai li dumandava di mintuvà i so pinseri di u travagliu, ùn sapia mancu esattamenti quant’anni ch’eddu avia, Serghju, ùn sapia nemmenu com’eddi si chjamavani i so parenti è mancu in chì locu ch’eddu era natu, ùn parlava chè d’edda stessa, di u liceu, di i so cumpagni è di i so vanochji. Era bella è eguista, a so peddi era magnifica, cuglia a luci. Ben chè stancu mortu, eddu, truvava sempri a forza di ghjucà, li pigliava i pugni di capeddi pà fascialli a faccia, li facia i tricci, un palmu, li pizzicava dulci a punta di i tituli. Edda ridia è cuglia torna tutta a luci di quidda matinata d’uttrovi. Da sopra à u soffà, quiddu servuchju di a scena di caccia paria stantaratu da a so billezza.

Quand’edda fù partita, Serghju s’addurmintò appaciatu, di stu sonnu di l’omini ch’ùn tumbani micca l’aduliscenti dopu ad avelli furzati salvatichi, ‘ssi mostri ch’eddu saria megliu à ùn scruchjà mai quandu a parsona t’hà sedici anni ed hè una biunduchja. S’addurmintò com’è un omu chì i so pulsioni sò sani è nurmati, chì faci l’amori cù tinnarezza, è chì si lia à l’essari debbuli è ch’ogni suffrenza li dà u schifezzu.

Esisti o menu un mondu pussibuli in qualissu Serghju è Joanna sò un coppiu filici, ancu s’eddi ni chjamani à i chjachjari, suveta i corsi di liceu in prima ed eddu avvinghji l’autostradi à cunducia un camiò tamantonu di parechji dicini di tonni. ‘Ssu mondu hè un mondu pussibuli è trà l’infinità di i so intrecci Diu ebbi à sceglia a più parfetta, in a so saviezza immensa, a scelta di l’Armunia Maiori. In u mondu ch’eddu hà sceltu, Joanna riposa dipoi vint’un annu sott’à una dalla di marmaru rosulu, faccia à l’uceanu atlanticu. Serghju è mortu dinò pocu dopu, d’un accidenti. In ‘ssu mondu sceltu da Diu, a cumpagna Sylvia s’impidisci di pinsà ci, è chjama spessu à i so dui picci chì venini d’ottena i risultati straboni à l’università. I voli bè cù un amori senza misura.

Annovra (1/2)

2011-11-29T13:26:00.000-08:00

Una nuvella di
Ghjuvan Francescu Rosecchi

Si conta chì Apulloniu hè in rilazioni cù una strana cuntrata di u sittantrionu dund’eddi campani l’Iperburei, zuffi di canti è di baddi è scantati da a vichjara è a morti.

Anciclupidia di i Rilighjoni

À u ritornu di quidda nuttata di cundotta faticosa, un beddu spuntinu l’aspittava, à tempu à un pacchettu novu novu di Gauloises cù i filtri. A so faccia russiccia accusava una stancaghjina fisica generali, solu u surrisu anghjelicu di Joanna vinia à dà li qualchì ricunfortu. Vinia d’abbuchjà si sei centu ottanta setti chilometri à cunducia u so camiò, è c’era vulsutu à livrà à Morlaix in extremis, i cumandi avendu presu u ritardu dopu à un errori di pagamentu. Ci vularia po’ ad avè cuscenza di l’ingratitudina di ‘ssu lavoru, di i prissioni pirmanenti, senza parlà di a cuncurrenza di i scioffori slavi chì filani nant’à i stradi, ch’ùn dormini mai è chì pisciani in i buttegli.

Biscotti, dulciumi, buttiru, latti friscu, suchju di raghjoni si spachjavani da livanti à punenti nant’à a tola di a cucina. Mentri ch’eddu circava d’ingutta si u so cunculeddu di latti, s’allampò annant’ad eddu pà circà d’abbraccià lu è d’appughjà i so capeddi biondi contr’à u so pettu, a chjoma luminosa si ni falava è s’atturcinava annant’à a so tamba addurata, ùn purtava chè un calzuneddu rosu scialbidu è un tee-shirt di notti annant’à qualissu era stampata l’imagina d’un’ acquarella chì raprisintava una filucca in altu mari nant’à un fundu turchinu. Nantu era scrittu Atlantica. Ùn mancava nemmenu di fà li senta u calori di u so sessu contr’à u so ghjinochju. Asciuvò i so mustacci neri è s’accesi à modu miccanicu un’ ultima sigaretta, decisu ch’eddu era ad offra si i pochi ori d’un sonnu riparatori. Joanna sarà in corsu da quì à un’ uretta, faccia à u so prufissori di scenza ecunomica, affiancata da a so cumpagna Sylvia, fendu neci di piglià i noti nant’à u tema di a crescita è di u sviluppu. Sylvia hè una femina sfacciata, ma ridona, amichi pocu è micca, fora chè quissi filtrati à colpi di prumessi zitiddeschi. Ùn triga à schirzà a virilità nascenti di i masci chì a temini. U tintu Thierry a s’era intesa bè, u s’era strascinatu in camara dund’eddi s’erani scantati mentri una festa, ch’eddu surtissi a robba, po’ l’avia un pocu palpulatu senza cunvinzioni. U lindumani avia intrunatu i lochi chì non solu u minchju di Thierry era minori chì ni siamu salvi, ma ch’in più era moddu è ch’eddu puzzava. Vi pudeti figurà chì u ghjuvanottu, sucialmenti, era mortu pà uni pochi d’anni. Sylvia si risirvava pà dopu à u liceu, u so tippu saria bidduchju è astuttu, astuttu sopratuttu. Si pudia permetta ‘ssu genaru di sonnii, era bella in tuttu è t’avia u spiritu, ni duvia fà bavià à dicini, masci è femini, par tutti i mutivi pussibuli.

- Chì ai u me cori, stamani ?

- Ecunumia, è dopu matematichi. A sa’ stu prufissori di matematichi, quiddu minori… ùn arresta di fighjulà mi u culu, ùn si sgena mancu, com’è s’e’ era una femina in carrughju. Allora m’arcu quand’e’ m’arrembu à a tola l’aria di nudda, è quantunqua u frasturneghja. È fighjula ancu u culu d’Alina… È sa’ ci cuntavamu i sonnii incù l’altri, vedi, par mè ciò ch’hè bizarra hè ch’e’ sunnieghju in silenziu, infini, in i me sonnii l’aienti si dispiazzani, pensani à certi cosi, a sò ch’eddi pensani à certi cosi, hè troppu bizarra… ma ùn parlani micca, hè com’è in i filmi d’innanzi, hè troppu bizarra…

Serghju pinsava à u prufissori sporcu, n’eru fieru ancu puri primittindu d’andà à spaccà li a tencia cù u criccu di u camiò, ma quissu chì n’era ghjilosu da veru era piuttostu quiddu tippu di l’ecchitazioni. Trenta sei o trent’ottu anni, à pena più ghjovanu chè d’eddu, mancu di più, bellu è atleticu, cù a riputazioni di u cunsumadori di ghjuvanetti. I poltri erani abbaraculati, com’è privi d’ogni albitriu, è pronti à lascià si fà. Ciò chì u stunaia era l’assenza di scrupuli di ‘ssu ghjacaracciu, è ùn timia mancu di piglià si una tribbia da un babbu o un frateddu. Forsa ch’eddu era più immaturu chè carranciu. Serghju sapia chì ‘ssu tippu t’avia i maneri d’un gurù, è ùn li piacia mancu appena ciò chì, da più à menu, s’assumigliava à un parlaccionu. Eddu stessu era piuttostu di quiddi muti, burbuddonu ancu di i volti, à u puntu di passà pà u zotticu parfettu, o meddu, pà una rubbaccia antipatica è brutali. U so aspettu fisicu ùn aiutava mancu, era abbastanza quatratu, rossu di peddi, i capeddi lisci lisci è castagni chjari, i so ochja erani sempri à achià, circataghjendu da partuttu com’è quissi di i cateddi.

U buddeddu

2011-11-19T03:57:00.001-08:00

Una nuvella di

Francescu Rossi

U sangu mischiatu di pisciu currìa longu 'llu stradò. Vinìa da 'ssu buddeddu tamantu fattu da l'omini par risparmià tempu è qualch'anima...

In 'ssu ghjornu casticatu, à quiddi chì franconu a Foce à bughju, li si parìa di veda un ovni postu più 'n ghjò, prima d'affaccàssi in Bucugnà.

Postu ch'iddi c'erani tutti avali i so lumi accesi 'nu tunellu, succorsi, ciandarmi è altri flicchi pudiani veda oramai u spaventu... Pinciulaiani quì, da sopra ad'iddi, l'ombra di l'impiccati. U neru era u culori di « Corci Libari », u rossu quiddu di « Secte à part » è di l'ACA, u verdi utilizatu da « les Clodos », u turchinu adupratu da i « Finuchjeti glandechtini » è di u Sporting. Quiddi di « Sfemu a Corcia » si ghjuvaiani di u giaddu, u « cumitatu Invisibuli » iddu, utilizaia u biancu è u culori castagnu era impiigatu da i « Magna merda ».

Tutti quissi erani in guerra tra d'iddi. A guerra di u palancatu à chjamaiani. Ogni riquatru, ogni panò, ogni muraddonu ogni petra è ogni strada era un campu di battaglia accanitu. Bombasgi, taghi è spinnillati à chì n'hà avutu n'hà avutu.

Quandu imparonu infini l'apartura di l'opara di Bucugnà, tutti i sgaiuffi infrebbaiani. Dui volti 400 metri di muri puliti puliti da ricopra di motti biati... c'era da scimìscia. Eppò u tunellu t'avìa un valori simbùlicu tamant'u mondu; era quì ch'era significatu u partimentu di i tarritorii. È ciò chì capitò, capitò.

S'apruntò dunqua tutti l'arnesi. Pinnelli, bombi di pittura, stagnoni, affissi è d'altri affari chì omu arrica quand'iddu t'hà a paura.

À qual' pinsaia d'essa u primu sopra locu si sbagliaia assai. S'incuntronu tutti 'nu bughjiconu di u buddeddu è tandu pudìa cumincià u tarrori.

I giaddi, i neri, i bleu, i verdi è i rossi s'intazzaiani avà com'a sola. I castagni, svaculiti, ùn c'erani, chì si sbaglionu di canza par ritruvassi in San Quilicu. I bianchi, iddi, ùn si vidini...

Una volta sfrumbata a pittura in faccia à u nimicu, si minò tandu di pugni di pinnelli è di stagnoni. I capibanda, più anziani è cumbriculoni, aviani subitu marcatu u passu sperendu avvizzassi à a situazioni. Ma videndu a baruffata tarribuli chì criscìa, sappini subitu chì 'ssa volta quì, ci vulìa à andà à l'ultima.

Unipochi erani dighjà à carrò quandu i pal di farru cumincionu ad apra i ciarbedda è à truncà l'ossi. I culteddi anch'iddi faciani a so òpara ma più squìsita. Unu parìa di badda incù à so cultedd' in manu. Sgueltru com'un matadore, pizzicaia, scannaia, sdunzaia è pulsaia à qual' s'avvicinaia. Par disgrazia si presi addarettu una biacculata tosta chì li feci saltà l'arichja è cascò vicinu ad unu chì briunaia i so Cristi, tinendusi a cannedda pugnendu di ritena u pocu di sangu chì li firmaia.

Unu chì persi i so spichjetti è un ochju, currìa mughjendu versu a bucca di 'ssa trappula par salvà i so vint'anni... Si piddò una mazzighjata trimenda chì li truncò l'anchi. Straquatu com'un lumacone, era uffertu avali à u so bòia.

Più luntanu un zitiddonu firmaia qui, solu è stantaratu à mez'à 'ssu maceddu, l'ochji sciuppati... Vinìa di fassi imbruccà da unu tamant'è quì ch'era stesu avali d'avant'ad iddu, a trippa da fora. Unu sbarazzinu affannatu u feci cascà à calci par caccialli u broccu d'a civa... li pudìa serva à salvà a so pedda bagnata di sangu.

Postu chì u ghjocu era d'essa piu tonti ch'à i tonti, sortini tandu i pistoli...
Parà una palata o un piombu ùn era micca listessu. A si sà quiddu còrciu stesu com'un ghjacaru à l'intrata di u tunellu ; a trimuledda 'ni so anchi era u cennu di à so fini subitània.

À chì pugnaia di scappà, à chì di mettisi à l'agrottu di un corpu stesu, à chì di riplicà, à chì di cascà è d'ùn arrizzasi più... ma mancunu pinsò à sciaccàssi una baddi 'ni ciarbedda di fronti à 'ssa tumbera.

Unu, arrimbatu in cucculoni à a salma di u so frateddu , parìa impippassini di a caccufunìa spasimata è di u capu d'opara russicciu ch'era spalmatu è imbarnasgiulatu annant'a pareta di u buddeddu di merda ; a so primura era di sapè s'iddu pudìa sofra di più. Ossi da truncà è carri da intazzà ni firmaia pocu è micca oramai.

Quiddi chì à si franconu appruntaiani avà i funi è l'ancini...

L'ordini di u prifettu Stronzu erani d'impedì l'accessu di u tunellu à tuttugnunu è sopratuttu à i ghjurnalisti. Ufficialmenti, c'era statu un accidenti eccizziunali. Par disgrazia, dui carri di sustenitori di ballò s'erani avirsati quì.

U tistamentu di Dick Silver (9, 10 / 10)

2011-11-15T02:50:00.000-08:00

Una nuvella di

Jean-Yves Acquaviva

Una furesta di u Northumberland, u 7 di maghju di u 1972, un'ora di u dopu miziornu.

Fox Youngsand aspittò qualchì minutu nanzu d'avvicinà si di u tafone. Ciò ch'ellu vinia di sente è vede senza mancu riasgisce l'avia datu u tremulu, li ci vulia à richjarà si u spiritu. Accugliendu tuttu u curagiu ch'ellu sapia, fece i qualchì passu chì avianu da svultulà a so esistenza. Ùn ricunniscì micca subitu l'omu chì i pulizzeri circavanu, prima ùn vide cà una salma inerta cuparta d'un catastu di petre. Senza pinsà ch'ellu s'avessi da intrappulà anch'ellu, si lampò in u tafone. Sgaggiò pianu pianu e petre chì piattavanu u visu di a vittima, ebbe un muvimentu di ritiru scuprendu a faccia scunfitta da e panculate. Ma dubitu ùn ci n'era, era bè Dick Silver, u strippadore di u Northumberland, quellu chì spavintava a ghjente di quì è ghjucava à a risa à Scotland Yard. Paura ùn ne facia più, era solu u so sguardu à parè esse sempre vivu, un sguardu neru, fissu, colmu d'odiu è di gattivera.

Sintendu u rimore di "l'armadà" chì vultava, Fox risintì dui sintimi un pocu cuntrarii, avia da pudè sorte si di 'ssu tafone ma li si paria di passà à cantu à qualcosa. Caccendu torna una pochi di petre, s'arvidì chì u bracciu mancu di Dick era stinzatu, chì a so manu paria di circà à chjappà qualcosa. Infribbatu, principiò à ritirà e petre di u scornu ch'ellu paria insignà Dick di u so ultimu gestu. À tempu ch'ellu cacciava u saccu rossu, bruttu è inciacciatu, Fox sintì cullà in ellu a panica, senza sapè veramente perchè. E voce s'avvicinavanu, u cumbugliu criscia in u capu di Fox, à l'orlu di u svene aprì u saccu è ùn pobbe ritene un mughju.

L'ispettore Matt Matthews, u rispunsevule di l'inchiesta, porse una manu à Fox è u tirò fora di u fossu. Li passò un bellu savone stupendu li in faccia ogni ghjastemma ch'ellu sapia. Asciuvendu si a fronte, Fox si ritirò à pena per lascià a piazza à i sperti di Scotland Yard. Ognunu si facia una teuria per spiecà a fine di l'assassinu è tutti si vidianu digià in u giurnale u lindumane.

Più nimu ùn vardava à Fox Youngsand è nimu ùn lu vide alluntanà si piattendu sottu à u so mantellu u saccu rossu.

Circondu di London u 21 di farraghju di u 1990, un'ora dopu miziornu.

U primu à lampà si nant'à u saccu fù Steven è avà, mentre ch'ellu rindia e so trippe in un scornu di a pezza, Mark si calava per scopre ancu ellu u misteru. Stava in dinochji senza parlà, si lasciava annigà da u ricordu di 'ssa ghjurnataccia, invade da 'ssa culpabilità chì li rudia a cuscenza dapoi tandu. Si vultò ver'di Bernie cum'è per chere una spiicazione. Quella, s'era messa torna à pusà, avia cruciatu l'anche è s'era accesu una sigaretta. I sfidava à tutti è tutti da l'altu di u so sdegnu è di a so certezza. Lighjendu in i so ochji, Mark avia capitu ch'ella sapia digià per u saccu, ch'ella avia dicisu, quellu ghjornu, chì tuttu ciò chì era cascatu in u tafone ci avia da stà, mostri cum'è nucenti. A voglia di strangulà la li vense, a brama di piglia la per u collu è strigne à sin'à vede smarisce 'ssu surrisu scrianzatu chì a rindia ancu più bella ma u facia scimisce. S'arrizzò, fighjò à Bernie è à l'omu chì era ammutulitu, aspittendu forse ancu ellu di sente à ella pente si di a so scelta. Volse parlà, ma l'omu, chì avia ritrovu a parolla, l'impedì dendu li l'ordine di sorte di a casa tutt'à trè.

Dopu à una pochi di passi nant'à un andatu di cote per fà u giru di a casa, si truvonu di pettu à un fossu chì s'assumigliava assai à quellu di tandu, prufondu è neru cum'è u piccatu. L'omu s'era piazzatu da l'altra parte è, cum'è s'è una spiicazione fù nicissaria, li fece u riassuntu di ciò chì avia da accade li. Steven piingnia, Mark rispirava forte è Bernie ciuttava u so sguardu in quellu di l'omu, torna a sfida, torna u ricusu di a disfatta. L'omu, persu in un discorsu pazzu, ùn vide micca à Bernie chì ricuglia una cota. Ùn avia persu nulla di a so precisione è a li sfrumbulò in bocca, l'omu mancò di cascà sottu à a viulenza di u colpu. Si ripigliò è fece per tirà nant'à Bernie, una pistulittata scuppiò è po duie, l'omu cascò in dinochji, cappiò a so pistola è si ne falò in u tafone.

Bernie fece u giru di u tafone, fendu casu à ùn sciappà si un taccu è ricosse u saccu rossu. Senza mancu dà una uchjata nentru u lampò in u fossu, ebbe un ultimu sguardu à l'omu, stupò nant'à u so baschicciu, chjappò a vanga appughjata à u muru per lampà la in pede à i dui masci è si n'andò senza mancu un sguardu per elli.

Mark turnò à mette a so pistola in a so borsa, pigliò a vanga suspirendu è disse à voce bassa : " ciò chì fala in u tafone ùn colla mai più."

U tistamentu di Dick Silver (7,8/...)

2011-10-16T04:10:00.000-07:00

Una nuvella di

Jean-Yves Acquaviva

VII

Una furesta di u Northumberland, u 7 di maghju di u 1972, miziornu è quartu..

Omi è cani eranu passati senza vede à Dick in fondu à u so tafone. S'era statu senza rispirà, fendu si u più chjucu pussibule, acciuncatu da u fraiu ch'elli avianu fattu saltendu sopra u so capu. Era un veru miraculu chì nimu ùn sia cascatu, chì nimu ùn si sia arvistu di a so prisenza. Pianu, pianu u silenziu si facia torna, solu in u luntanu si sintia qualchì abbaghju. Un strappittime di frasca cacciò Dick di u so turpore, prima sintì e voce senza sapè da duve vinianu è po i vide. Eranu trè, trè zitelli d'una dodicina d'anni, una femina è dui masci. L'omu è i zitellacci si vardonu senza dì nulla qualchì minutu è a femina s'avanzò.

- "Aiutate mi." Disse Dick d'una voce chì circava à esse dolce.

I dui masci fighjonu a femina l'ochji carchi à dumande, u più maiò li volse parlà ma quella li tagliò a scicca d'un gestu di u bracciu.

- "È perchè chì v'emu da aiutà ? Hè a ghjustizia divina chì v'hà purtatu quì. Avete da pagà per e vostre colpe, ciò chì fala in u tafone ùn colla mai più."

A voce di a zitella era stata chjara, avia parlatu senza a minima incisa. Dick a vardava intransanditu, ùn ci cridia, s'era surtitu d'una trappula tamanta per finisce in manu à trè mirdosi. Era u so ghjocu è ùn ci pudia nulla.

- "Sapete quale sò ?"

- "Site quellu chì hè cascatu, quellu chì u distinu hà purtatu quì è ci basta."

Dick capì, à 'sse parolle, chì i denti di i cani sarianu stati dolce carezze in paragone à l'odiu fretu ch'ellu lighjia in u sguardu di 'ssa zitelletta bionda. L'omu sentì a pena, si tuccò u lapru è fighjò e so dite taccate di sangue.

VIII

Circondu di London u 21 di farraghju di u 1990, miziornu è quartu.

L'usciu s'era apartu è un omu si tinia di punta à elli minaccendu li cù una pistola. Era fittu, longu, capelligrisgiu è purtava un paghju di spichjittini tondi. Era vistutu d'un mantellu marrunicciu, frustu quante ellu. I trè giuvanotti pinsonu à tempu a listessa cosa, ùn sapianu quale ellu era 'ssu tippu ma un affare era sicuru, ùn era micca Dick Silver.

Funu cinque minuti di piombu. Nimu à apre bocca, nimu à vulè rompe 'ssu silenziu è po l'omu parlò.

- "Sò sguasi vint'anni ch'o vi cercu è avà, vi tengu mansa d'assassini. Hè vinuta l'ora di pagà."

Bernie, Mark è Steven sentinu a stessa frizzura carizzà li a disca'u spinu, ùn cunniscianu l'omu ma capianu ciò ch'ellu dicia. Mark pinsò ch'ella era forse l'ora di scioglie 'ssu nodu chì li strignia u corpu dapoi tant'anni, forse u mumentu di fà i conti. S'era vulsutu arrizzà ma, una volta di più, Bernie s'era messa trà ellu è a so vuluntà parendu lu cù u bracciu. Steven ellu, stava mutu, ochjisburlatu, vardendu un colpu à unu, un colpu à l'altru, azzinchendu si à u so futtogliu.

- "È pagà ch'è ?" Disse Bernie di a so voce tagliiva.

- "U vostru crimine, ùn v'arricurdate, quellu ghjornu di maghju in 'ssa furesta, ùn v'arricurdate ?" Rispose l'omu mughjendu.

- "Ùn era cà ghjustizia, era un mostru !" Steven s'era cappiatu, sudava, era rossu inciabannatu è suffiava cum'è un boie.

- "Forse chì Dick Silver era un mostru, ch'ellu meritava a so sorte ma di què, chì ne pinsate ?" Dette 'sse parolle l'omu lampò u saccu rossu ch'ellu tinia in a so manu manca in pedi à i trè amichi. Cascò nant'à u marmaru cù un rimore seccu da ghjaccià li u sangue.

Carnavali di i Cori Persi (1/...)

2011-10-10T08:16:00.001-07:00

Una nuvella di

Marcu Biancarelli

(In mimoria di u pueta Anton Ghjuvanni Aliberti, 1871-1909)

Venite o passanti currite o vagabondi

Ascultate zitelle cù niscentre figure

Ghjunghje u carnavale da i lochi prufondi

Scunnisciute cunfine in quelle bughje alture

Duve nascenu scemi, mostri di tragedia

Essari stranamente impazziti à a Luna

Strigati da bivende, chjappi da a magia

Chì i face ballà corci nant’à a cruna

D’un acu di scimizia da Diavule tinutu,

Sintite o sgaiuffi, è belle giuvanette

In u vostru paese oghje si n’hè vinutu

U Carnavale tontu cù e strane incette.

Quandu avia persu u so cori, Aliberti ? Bella quistioni in verità.

Aliberti l’avia fatti tutti. Par dì. È quand’e’ avanzu ch’iddu l’avia fatti, voddu fà capiscia ch’iddu l’avia cumissi tutti. Chì a so estru insuddisfattu li cumandaia d’agiscia cussì, suvitendu sempri un bisognu frenèticu di cunquistà i citadelli i più indòmiti, i furturezzi i più inalzalati.

Tandu, è par quissa, l’aviani amatu i donni di tutti i cuntrati, di tutti i sterpi ancu. Da i ribaldi sputriti di i mola, sappiuti par avè un’ ànima rutta, è impussìbuli da cunverta à a rilighjoni di i sìntimi, à i ghjuvanetti curtesi di i quartieri nòbili, vardati da matrigni sticchiti, ghjuvanetti chì à prima vista erani chjusi in un mondu di bedda crianza, ma chì infatti erani pronti ad infiarassi à chì li faria mirà i stesi infiniti di l’amori scioltu … Si cuntaia ch’iddi aviani succumbutu i lavandari quant’è i musicanti, i servi quant’è i cuntessi. Ancu una maestra di scola, à senta dì, una pracitrici di i più siveri, è una rilighjosa chì puri s’era vutata à Diu cù tenacità, ùn aviani sappiutu schisgià i so reti. È, malgradu l’ingannu, malgradu u disonori, mancu quisti quì pariani d’èssasi lagnati mai di a so dibbulezza.

Chì li truvaiani à Aliberti ? U so sguardu stranu forsa, unu sguardu abitatu duva paria di curra l’acqua d’un fiumu in ribulionu… O a so andatura altiera, sta inquatratura di viaghjadori chì li facia attravirsà i folli è a sucità cù a maistà d’un falu… A so boci, dinò, era di i più inabituali, appena arghita, una boci di bassu, ma calurosa, chì l’avaria fattu passà pà un attori di teatru… U fattu staghjia ch’iddi li falaiani à i peda, tutti quant’iddi erani, è li mandaiani indirizzi sicreti è biglietti infiarati, u si vuliani sparta, com’è un truffeu, cun ardenza è niscentria. Cù paura è ingurdizia. Ch’iddu ci fussi statu un prezzu à pagà ? Chì l’infamia è l’abbandonu l’avissi aspittati tutti à a sciuta di st’avvintura ? Pariani di sapella, ma suvitaiani cechi è spinsirati i violi di a so pirdizioni, è accittaiani u casticu finali com’è u sboccu lògicu di u so distinu.

Aliberti viaghjaia in u carrughju, notti bughja, è una lumera s’accindia. I so passi erani stati intesi nant’à u tighjatu. Da luntanu. Aspittatu era. Pichjaia à l’usciu, un cennu cunvinutu è a porta s’apria. Mancu u tempu di cuddà i scali chì ghjà una bucca u divuraia, u so capeddu lampatu in tarra, u so visu cupartu di basgi. A passioni, eccu ciò ch’iddu suminaia u pueta ind’iddu sbarcaia, a passioni scema è a dannazioni.

Aliberti vattaia i so predi mentri i so raprisintazioni, in tutti i salotti d’Auropa chì l’accuddìani. Ricitaia à menti i so cumpusizioni, è puntiddaia u ricitali cù versi di Leopardi, o cù traduzzioni dilicati di Goethe, o ancu cù adattazioni quantu fini di Keats.

Or chì sarà chì ti culpisci, cavaglieri armatu,

Tù solu è sciàlbidu paciaghju ?

U ghjuncu piega longu à u lavu

È ùn si senti abbaghju.

Or chì sarà chì ti culpisci, cavaglieri armatu,

Cussì bàmbulu ed acciaccatu ?

Di fenu hè carcu u trastoghju

Ricoltu u suminatu.

Ugni volta era un cirimoniu appruntatu cù minuzia, candeli accesi è accumpagnamenti musicali varii, sunata in sì minori di Liszt à u pianoforti o arranghjamentu di u cuncertu 2 di Rachmaninov ch’iddu avia pinsatu da par iddu, pà rèndalu ancu più prufundu è tenebrosu. Sapia dà à ugni pruduzzioni soia un ambienti rumànticu, è lìricu, è surrialistu è tràgicu sicondu i gusti d’un publicu ch’iddu sapia sempri anticipà. Aliberti era forsa più chè un pueta, era un artistu chì mischiaia i gènari, è chì si sapia fà ancu à l’occasioni unu spezia di pristidigitatori. O di magu, in una forma d’esaltazioni pagana chì incantaia quant’è ch’idda spiritaia u so auditoriu.

I so laccia era dunqua tandu, mentri i so pruduzzioni puètichi, ch’iddu i punia. Un’ attrici russia vinissi à ascultà una raprisintazioni ? Aliberti avaria bittu u sciampagnu in u so scarpinu priziosu nanzi à a fini di a notti… Una zitedda di famidda avissi assistutu cumossa à i so intarpritazioni infieriti ? Finia a mani à l’alba in i braccia di u siduttori.

È cussì andaia a vita di u nosciu pueta, cussì cumparia in a so lighjenda, vistutu di successu è di disideriu, ammiratu, cillibratu, è purtatu in bucca in tutti i lochi famosi di i grandi cità, da quinci è da mari in ddà.

Ma lachemu corra par avali, parchì socu stancu di cuntavvi sti foli. A sèguita di a storia maladetta d’Aliberti a vi palisaraghju un’ altra notti, sì Diu voli. È in più mi chjamani par veda ciò chì succedi à l’elefanti, culà in u curtili. Tinti animali, sò tribbulati è nimu riesci ad appacialli. A so, elefanti in un curtili hè una cosa chì vi faci rida. Ma sò elefanti un pocu com’è mè : elefanti nanni.

Ed hè ghjusta ciò chì vo diti, ùn mi socu ancu prisintatu. Piripichju, dunqua, mi chjamu, Piripichju u nannu, quissu di a canzona. M’accupu un pocu di tuttu in quissu cìrculu. Di parlà à l’animali, certu, ma dinò di rimetta l’òrdini trà l’aienti. È ancu, l’avareti capita, m’accupu di cuntà i storii.

Ma pà stasera, o ghjenti, n’aghju ghjà dittu troppu, è tandu vi salutu, è mi ritirgu.

U tistamentu di Dick Silver (4,5,6/...)

2011-10-09T06:56:00.001-07:00

Una nuvella di

Jean-Yves Acquaviva

Circondu di London u 21 di farraghju di u 1990, 10 ore di mane.

Mark ùn avia durmitu a notte nanzu è s'era lasciatu andà à a penciula, u rimore di l'usciu l'avia toltu di 'ssu mezu sonnu. Prima, ùn a cunniscì, eranu quindeci anni ch'ellu ùn l'avia vista è i so ochji ùn eranu ancu richjarati bè. Sculinava solu una macacciula imprecisa viaghjà versu ellu, è po a vide, bella, ancu di più cà in i so ricordi. Era stata per ellu, u primu fantasimu, a prima emuzione, u primu basgiu. Longu l'annate scorse, l'avia imaginata, piantina fatta alburu, zitella fatta donna. È, avà chì i so ochji eranu belli aparti, ùn era mancu à pena dillusu. Bernie, Bernie Highstone, a cumpagna di i ghjochi zitelleschi, a fiura di u primu amore intintu d'una sessualità nascente, era quì, di punta à ellu. Grande, bionda, cù un paghju d'anche fine è longhe, un paghju di petti cum'è duie culline di a Silicon Valley è vistuta per fà nasce u parapiglia in ogni calzunettu. Una bomba attomica, ancu megliu cà tuttu ciò chì Mark avia imaginatu dumandendu si ciò ch'ella era pussutu turnà a zitella scrianzata cù quale avia spartutu tantu. In una strana fiumara, i ricordi l'annigavanu u ciarbellu, l'invadianu lascendu lu incapace di parlà o di move si. Bernie s'avvicinò torna un pocu è si calò ver'di ellu, li chjappò a faccia à duie mani è ponse e so lapre rosse nant'à a so fronte. Tandu, quand'elli eranu criaturi, facia sempre cusì s'ella sintia chì Mark si lasciava andà à u timore o puru l'impacenza è torna oghje, 'ssu basgiu l'avia assirinatu.

A vardava intransanditu, s'era messa à pusà nant'à u futtogliu cintrale è senza una parolla, avianu addunitu i so sguardi cum'è per cuttighjà megliu a ghjunta di quellu ch'elli aspittavanu tramindui.

Una furesta di u Northumberland, u 7 di maghju di u 1972, miziornu.

Fox, appughjatu à a so vittura varda u spitaculu. Omi in arme, camiò, cani, una mostra di forza spripusitata. Una armata pronta à mette l'assassinu à tallozzu, à buscà lu è à tumbà lu cum'è l'animale ch'ellu hè. Dapoi un'ora, sanu quale hè l'omu ch'elli cercanu, si chjama Dick Silver è tutt'ognunu u cunnosce quì. Hè una spezia di cumediante mancatu chì campa di travagliucci trovi à diritta è à manca. À chì u stà à sente, conta e so prove passate, e pezze di Shakespeare ch'ellu hà ghjucatu in a so giuventù è a so decisione di ritirà si in Blyth per curà a so vechja mamma. Sta mane, hè un antru rollu ch'ellu deve ghjucà, quellu di a preda nù 'ssa tamanta mossa à l'omu.

Dick corre, sente i cani appressu à ellu, spatansceghja, stupa, tossa è corre sempre di più in furia. À nant'à a so spalla manca, porta un saccu rossu, li pesa, u ritarda ma pare liatu à ellu, pare chì nisun'forza ùn li pudaria fà cappià. Cù a so manu libara, s'apre una strada à mezu à u frascume sarratu di a selva duv'ellu hà trovu rifugiu. D'un trattu, a tarra li scappa sottu à i pedi, incappuccia, casca è si trova imprigiunatu in un fossu prufondu. Passata a suspresa, varda in giru à ellu è capisce chì senza aiuta ùn ci surtarà. Stinzendu l'arechja, li si pare di sente voce, ghjente chì s'avvicina. Omi è canaria li ghjugnenu addossu, l'abbaghji, i mughji, Dick aspetta cum'è u cignale strangulatu da u cappiu. Li si pare di sente digià i denti di i ghjacari ficcati in a so carne, a sà chì pietà ùn ci ne sarà. A sà chì 'ss'omi assitati di sangue è di vindetta ùn circaranu à piglià lu vivu. S'incagna cum'ellu pò in fondu à u tafone, strigne contru à u so pettu u saccu rossu è aspetta.

Circondu di London u 21 di farraghju di u 1990, miziornu.

Un'ora è mezu chì Mark è Bernie stanu fighjendu l'usciu, à a mutesca. A so impacenza si cunnosce à a so manera d'appinzà l'ochji, di pichjà cù e mani nant'à l'appughjatoghji, parenu dui ghjudici aspittendu un accusatu per significà li a so cundanna à morte. Era digià cusì tandu, passavanu u so tempu à aspittà lu, stava sempre quattru passi in daretu, paurosu di tuttu, sempre à l'orlu di scappà à a minima cosa. È l'usciu s'aprì torna, pianu pianu, in un stritu longu. Mark è Bernie strinsenu l'appughjatoghji in un stessu muvimentu, cum'è dui lioni pronti à lampà si à nant'à qualchì gazella ghjunta à dissità si à u pozzu d'acqua fresca.

Eccu lu à Steven, Steven Caesar, magranchjinu, chjocchirascatu, una piccula barbetta per invichjà un pocu a so faccia d'eternu zitellone. Si vardanu tutt'à trè, u sguardu carcu à dumande l'unu per l'altru. Fù Bernie à rompe u silenziu, à dumandà ciò ch'elli facianu quì, torna inseme dopu à più di quindeci anni senza vede si. Caccionu ognunu a lettera signata da Dick Silver o u so fandoniu è a pagina di giurnale annuncendu a so fine in quella furesta di u Northumberland in u 1972. A parolla era sciolta avà, Bernie parlava assai è i dui masci stavanu à sente e so teurie, eranu cum'è nanzu, strinti cum'è e diti di a manu, in ordine di battaglia. Mark sintia a brama cullà in ellu, 'ssu desideriu ch'ellu avia piattu in un scornu di u so capu è chì oghje brusgiava d'un focu novu. L'avaria vulsutu cappià a bestia chì durmia in ellu, si saria vulinteri lampatu nant'à Bernie per una volta, una volta sola, supranà la.

U stritu di a porta, sei ochji sburlati, trè cori à sbattera, forse qualchì risposta...

U tistamentu di Dick Silver (1,2,3/...)

2011-10-07T03:43:00.000-07:00

Una nuvella di

Jean-Yves Acquaviva

Una furesta di u Northumberland u 7 di maghju di u 1972.

A prima petra ùn si sà quale hè chì l'avia lampata. L'omu in fondu à u tafone piscò in bocca, u so lapru suttanu scuppiò è un filu di sangue li corse nant'à u bavellu. I trè zitelli u vardavanu mezu intransanditi dapoi una bella stonda senza sapè chì fà, 'ssa prima petra fù ella à decide di a seguita. Ùn era a prima volta ch'elli tumbavanu, di regula eranu animali à falà in u fossu, prede faciule stanche d'avè cercu à arrappacà si per fughje 'ssu lacciu. I pigliavanu à panculate à sin'à fà ne stracci inerti è dichjangulati, i stirpavanu à pitrate è ùn ci era mai statu bisognu di sapè quale hè ch'avia sfrumbulatu u primu, a facianu d'un stessu lampu. Dui masci è una femina, trè zitillacci chì avianu trovu, in 'ssu ghjocu crudellu, una manera di culmà l'annoiu ch'elli cridianu di pate.

Dopu à a prima, nascì u dilughju. L'omu s'era indinuchjatu è pruvava à parà e petre cù e so bracce. Difesa vana chì n'affaccava da ogni parte, grosse, chjuche, pinzute è ognuna li tazzava a carne. Avia finitu per stracquà si nant'à u spinu, stava cum'è Cristu in croce, paria d'accittà a so sorte. I zitelli piantonu quand'elli funu sicuri chì l'ultimu soffiu di vita avia tralasciatu l'omu. Firmonu un mumentu ingutuppati da un silenziu di piombu, era cum'è s'elli intrissinu in cumunione, cum'è s'elli sugillessinu u pattu taciutu chì avia da lià li per u restu di a so vita. In a campagna, ùn si sintia cà u dolce rimore di a vita, l'acelli à chjuchjulà, u frascume di l'alburi stuzzicatu da u trattu è u sussurime di l'onda dolce di u fiumicellu vicinu. Tuttu era pace avà, una pace chì paria assuluta è eterna, u calmu dopu à u furore ch'elli avianu scatinatu senza mancu pinsà ci, eranu solu zitelli in brama di culmà u so annoiu. È si n'eranu andati à d'altre primure, lascendu l'omu marturiatu, incrucifissatu per sempre in 'ssa pustura strana, mai più ùn ne parlarianu, mai più ùn amintarianu 'ssi fatti. Ùn avianu mancu vistu u saccu rossu mezu cupartu da e petre.

Circondu di London u 21 di farraghju di u 1990, 8 ore è mezu di mane.

Mark Littlewhite stava cù l'angoscia in corpu. Prima di puntà u purtone di u casone tirò di a so borsa i scartaficci ch'ellu ci avia infrugnatu una oretta nanzu è i lesse un'antra volta. " Puttana, sguasi vint'anni à circà à scurdà mi di tuttu què è avà mi vene torna in bocca." Parlava solu, era una abbitutine ch'ellu avia è chì u facia passà per scemu qualchì volta. Tinia in manu, un pezzu di giurnale vechju, ingiallitu da u tempu è una lettera chì paria, ella, esse stata scritta a viciglia. Era quessa dinù chì li dava affanu, vista a signatura in fondu à a pagina, ùn pudia esse stata fatta di pocu. Era un testu cortu, ziffratu da un nome chì Mark ùn avaria cridutu di sente o leghje torna un ghjornu.

London, u 5 di farraghju di u 1990.

Caru amicu, sò passati l'anni, sò corse e stagione ma sò sicuru ch'in un scornu bughjicosu di a to mimoria, ghjace a salma di u mio ricordu. Ùn pinsà ch'o ti scrivu da l'aldilà, a socu ch'è tù mi credi mortu, sò custì, vicinu, vicinu è da quì à pocu ci scuntraremu torna è ti piacerà di menu cà l'ultima volta, a ti prumettu.

DICK SILVER.

"Dick Silver ! Puttana vercia, sicura ch'o ti credu mortu, chì t'aghju vistu cappià u to ultimu suspiru ! " Intrì in a casa, fece dui passi è trasaltò da u rimore seccu di l'usciu chì s'era sarratu daretu à ellu. Rimesse a lettera in stacca è pose u so sguardu nant'à a pagina di u vechju giurnale, un tamantu titulu ci era stampatu : "A fine di Dick Silver, u strippadore di u Northumberland". Scuzzulò u capu, piigò u fogliu in quattru è u ficcò dinù in a so borsa. Pisò l'ochji, fighjò in giru à ellu per scopre a pezza immensa duve ellu si truvava. Una sala d'una cinquantina di metri quatrati, inchjappillata di marmaru, dicurata di statule è di pitture è supranata da una volta d'una altezza scema. Un domu urnatu d'una fresca turchina è oru chì riprisintava un celu spurgulatu è prufondu à svene si. In faccia à ellu, un muru biancu cù nant'à i so lati, duie scale smisurate chì cullavanu cum'è dui catalorzi senza fine. In pede à u muru biancu, un tavulinucciu è trè futtoglii culor'di sangue. Un suspiru è Mark s'era avvicinatu à passi lenti, stallatu in u futtogliu di manca, postu e so bracce nant'à l'appughjatoghji è appingatu u so sguardu nant'à l'usciu di l'intrata, cum'è s'ellu s'appruntava à aspittà à qualchì sia.

III

Blyth, piccula cità di u Northumberland, u 7 di maghju di u 1972, 8 ore è mezu di mane.

Fox Youngsand cridia d'avè una vitarella tranquilla pigliendu 'ssu postu in una piccula cità campagnola. Era statu dui anni pulizzeri in Manchester è l'eranu parsi seculi. Ùn suppurtava micca a viulenza, u cuntattu di a miseria è di u crimine. 'Ssi pochi ghjorni, si dicia ch'avaria fattu megliu à stà si ne quallà cù i ladri, i sciuttati è e puttane di i carrughji foschi.

Ogni mane, dapoi una simana, era chjamatu per custattà chì u schifeghju campava ancu in i lochi i più chieti. Ogni mane, scupria e prove di quellu chì a stampa naziunale avia digià battizatu : "U strippadore di u Northumberland" è ogni mane ne pirdia l'appitittu. Sempre a listessa scena, un omu stracquatu nant'à u tavulinu di a cucina, un cultillone ficcatu in pettu è u corpu apartu cum'è un purtellu à u mese d'aostu. Sei ghjorni, sei baschicci svintrati à l'ora di u caffè à latte è sta mane u settimu. C'era quantunque un picculu cambiamentu nant'à a 'ssa scena quì, a vittima era una donna è à sente i vicini, u so ciucciu era smaritu. Era una femina chjamata Tess, avia solu sei mesi, un bellissimu surisu è ùn cappiava mai u so orsu neru. À sin'à 'ssa mane quì, Fox, ancu per esse statu stumacatu da ciò ch'ellu avia vistu ùn avia intesu nè cumpassione nè tristezza per e vittime ma una ciuccia in manu à un mostru cum'è quessu, 'ss'idea u marturiava. L'avia furzatu à toglie di a so mimoria certi ricordi di a so zitellina, à turnà à apre certe piaghe ch'ellu cridia chjose per sempre.

À u terzu mortu, l'omi di Scotland Yard eranu scalati, cù tutta a so putenza di focu lascendu Fox à rent'à strada è fendu li capisce senza dicoru ch'elli si passarianu di a so aiuta di fliccu campestru.

Agorafobia

2011-09-28T03:01:00.000-07:00

Una nuvella di

Jo Antonetti

Venimu di ghjunghje in San Fiurenzu. Un sò ancu surtitu di vittura, chì digià aghju u stomacu annudatu. A sapia, ùn ci vulia à cullà. Quand'ella hè ghjunta in casa dui mesi fà, dicendu mi, "aghju e piazze per Ben Harper", aghju fattu u baullu, Bernard Peur ? quale hè quessu ? Pensa, a sapia qual'era, è sapia dinù chì ci avia da esse un mondu scemu, ma ùn li pudia palisà a mo fobia, allora aghju fattu cum'è sempre, aghju baddalatu dicendu chì à mè a musicaccia americana mi rumpia e stacche, è chì di statina ùn si pò viaghjà nant'à e strade è un canapu è l'altru.

Ma, ùn li possu ricusà nunda à ella, dunque sò cullatu. Digià, per istrada mi ghjunghjia a frebba, infilarate di vitture chì andavanu à u passu, turisti sgalabbati chì piantanu per un sì o per un nò. Aùù, ma chì veneranu à rompe ci e stacche.
Infine, simu ghjunti, in carrughju aghju l'impressione chì e croci chì m'anu fattu cacà in vittura si sò varcati à tempu à mè, per fà mi cacà torna, nunda chè u s'accente hè un suppliziu per mè, è poi e so tenute, quant'à mè li si pare chì perchè ch'elli sò in vacanze, ci vole à veste si male. Ma, avemu l'altru latu, i bastiacci è l'aiaccini, tutti vestuti cum'è s'elli fussinu di battezimu o di matrimoniu, omi è donne tutti in tichetta. Aiò, per andà à vede à Ben Harper à mez'à tarra è pulvariccia. Mi colla a frebba in capu, cercu di calmà mi, quandu sentu un rimore chì s'avvicina, chì serà torna ?

Musicanti di carrughju chì ghjocanu u tamburu nant'à vechji containers in plasticu, sicuramente un messagiu ecologistu, è tutti l'altri conni in giru chì i piglianu in fottò, o chì ballanu cun elli, mi dicu chì ùn vale à inzergà si, si staranu nantu à u portu. Innò, hè prevista ch'elli accumpagninu a ghjente sin'à u cuncertu. O per la miseria, m'accadenu tutte. Eccuci à u cuncertu, per andà à beie si un colpu, hè una vera spedizione, puntate di spalle, pedi calpighjati, puzza di sudore è d'ansciu, un infernu. U cuncertu ùn hè megliu, simu tutti aritti, imbugnati, à a puzza di sudore è d'ansciu, s'aghjusta quella di sigaretta è di u tizzone. Aghju da craccà, a sentu, u solu affare chì mi cunsola hè chì u tippu a li sciacca à a chitarra, a musica hè bona. Ma què dinù m'arrabbia. Ié m'arrabbia di vede ch'eo spartu i listessi gusti chè 'ssa banda di capre ingiru à mè, pensu anch'eo cum'è Desprosges chì dicia " Quand quelqu'un est d'accord avec moi, j'ai l'impression de n'avoir plus qu'une demi opinion", allora, pensa quì cun cinque milla persone chì sò d'accunsentu cun mè.

A u capu di quattr'ore, sentu vene à fine di u mo suppliziu, u cuncertu hè finitu, pigliemu a stretta chì parte da a citadella sin'à u portu, infine appena di calmu, micca mondu ingiru à noi, solu eo è ella apperlamanu. È tandu sò sbuccati da u portu, sempre cù i listessi containers, sempre listessa musicaccia, sempre i listessi conni à inturnià li, è elli chì mi vulianu fà ballà. Era troppu, è u troppu stroppia dicia quellu, eo ùn l'aghju struppiati, aghju cacciatu a pistola ch'avia à a cinta è l'aghju tombi tutti.

A pace. Più musicaccia, più rimore, più conni ingiru, ié a pace.

Entre mariposas negras (3/3)

2011-09-19T15:57:00.000-07:00

Una nuvella di

Francesca Graziani

U zitellu si precipitò senza altru mentre chì Moune, u core affannatu, pigliava à l'insù. Avvicinendusi da a chjesa, si ghjacciò u so sangue : sentia i mughji di terrore di Juan, è e rise di l'altri. Rise ? O Signore, ma chì li facianu ? Jorge era longutiratu davanti à a porta di Santa Croce. Di sicuru, avia pruvatu à impedisceli di entre è s'era fattu pistà di colpi. U so visu era in sangue, u nasu sciappatu. Paria acciaccatu, ma rispirava, chirchinnendu. Li accarizzò u fronte cù una tennerezza chì a susprese, parlenduli per chetallu :

- Anu da ghjunghje i succorsi, ùn ti ne fà Jorge, t'anu da purtà à l'uspitale, veneraghju cun tè, tuttu anderà bè... Jorge si vulia ridrizzà, ma cappiò un stridu. Mustrò u so bracciu : paria troncu.

- Stà fermu, cerca d'ùn move, aspetta i succorsi, ghjunghjenu...

In Santa Croce, Juanito, nudu in Cristu, era mantenutu contru à u muru da dui cugini di Moune. Anch'ellu era in sangue, ùn si ricunniscia guasi più u so visu imbuffatu. Mughjava, supplicava guasi, è l'altri ridianu, ùn li paria vera à Moune, l'era insuppurtevule di vede u so idulu trimà davanti à uni pochi di paisani rozi.

- BASTA o tonti! Site scimiti, lasciatelu! Ghjunghje a pulizza, vi privengu, futtite u campu !

Lavighju, cù un sguardu allucinatu, tenia un cirone accesu ch'ellu avvicinava da a zira di u Gitanu, tuttu scherzendu.

- Dopu à u mo "trattamentu", ùn ti ghjuverà più tantu u to minchjone o Gitanacciu. T'amparerà à ingannà una zitella nucente. T'aghju da uscià cum'è u porcu chè tù sì.

Quand'elli eranu ghjunti, u giuvanottu n'era à u culmine di a gudera è ùn si era mancu pussutu staccà da a so amante à a vista di l'assaltanti. Infuriati, l'avianu agguantatu, mentre chì Millie ritenia a so figliola chì si sbattia cum'è un diavule, l'avianu lampatu in terra è presu à calci in i fianchi, in u capu, specialmente in u capu. L'avianu conciu à ottu contru à unu, ùn pudia chè pruvà à prutegesi cù e bracce. Avia u corpu insaghjatu, i sopracigli è i maschetti aperti, è piccule piache sanguinulente fatte da i scarpi da tutte e parte. Nany i precava di piantà, stridava indernu, pruvendu à scappà da a strinta di a mamma. Avia solu a so tunica corta addossu. E so coscie bianche cum'è u latte eranu maculate da u sangue di u so fiore svirginatu.

Avà Juan contru à u muru si liccava calci in u ventru chì li tagliavanu u fiatu. Si piecò in dui, ma Lavighju li pisò u capu chjappendulu pè i capelli è d'un gestu seccu li brusgiò a punta di u cazzu cù a fiamma. U puvaracciu lentò un rughju inumanu prima di vene menu è di cascà in pianu. Cù a forza di l'addisperu, Nany si liberò infine da a mamma è si lampò nantu à u corpu di u so innamuratu.

"POLICE! Mais qu'est-ce qu'il se passe là-dedans? Bande de sauvages! Ouf! Avec ces Corses, on est jamais tranquilles, quand est-ce que je vais avoir ma mutation, moi? "

I paisani firmonu imbasgialiti, parianu di sbriacà d'un colpu. Lavighju guardava stupitu u cirone chì s'era spentu à a sbattulata di a porta, quant'è ch'ellu ùn capiscissi più ciò ch'ellu facia in a so manu. Funu tutti imbarcati cù e manette in a camiunetta di a pulizza, ancu Millie è e figliole, malgradu e so prutestazione. Si guardavanu tutt'à trè cù un odiu chì paria definitivu. Pè u finestrellu, Nany ebbe u tempu di vede ghjunghje u SAMU, accoltu da u Merre.

Nany ùn hà mai ricivutu risposte à e lettare ch'ella hà mandatu à Juanito. Solu Jorge hà rispostu una volta pè u so amicu : "Juan hè partutu in America latina. Ti dumanda di pardunallu, vole sminticà tuttu. Dice ch'è tù sì una principessa è chì ellu hè un povaru tippu." Ùn li firmava più chè e foglie di marijuana assiccata in un quaternu, cù i puemi d'amore ch'ellu li avia scrittu. Un bel'ghjornu, lampò tuttu in u focu, francu un ritrattu ch'ellu avia fattu di ella, cù sta legenda, stratta di un puema di Garcia Lorca :

"Entre mariposas negras

va una muchacha morena

junto a una blanca serpiente de niebla "

Jorge è Moune cuntinuvonu à scrivesi, à scambià puemi è disegni, è una volta si sò ancu trovi in Nizza pè una piccula scappata amurosa, po e so strade si sò alluntanate à pocu à pocu. E duie surelle ùn si sò mai più parlatu. Moune hà scrittu parechje volte à Nany per chere u so pardonu, senza mai buscà risposta. Millie hè firmata sola, e duie figliole avenduli giratu u spinu pè a vita.

Entre mariposas negras (2/3)

2011-09-18T02:11:00.001-07:00

Una nuvella di
Francesca Graziani

Ghjunti in a chjesa, pusonu annantu à i sacchi da dorme è Juan cumenciò à priparà u "tizzone". U muscu di a marijuana empiia a chjesa, n'eranu digià esaltati. Juan avia gesti precisi è dolci, intricciava l'erba tavacca cù a marijuana pianu pianu. Nany era ciuttata in a so cuntemplazione beata, ùn vidia nunda altru ingiru à ella. À Moune li facia male sta passione ch'ella vidia nasce trà a surella è Juan: bastava à guardalli, murianu di desideriu! Si vulia cunvince ch'ella circava di prutege à Nany, ma in u so core sapia chì a vera ragiò ùn era quessa.

- O Nany, ùn la sò sè tù duverii fumà "erba"... Dopu, ùn si cuntrolla più nunda !

- Moune, accupati di u toiu u culu, ai capitu ? Ùn sò più una ciuccia. A sò ciò chì ti face scimisce, ma ùn ci poi nunda.

È li tirò una lingua longa longa. Moune s'arrizzò d'un colpu è agguantò à Nany pè u bracciu :

- Voli una sciappata o chè ? Alè, rifalemu subitu !

Ma Nany a puntò cun viulenza. Jorge ùn ebbe chè u tempu di chjappalla prima ch'ella si scialbessi contru à u muru. I dui masci ebbenu u so da fà à calmalle, eppo Juan fece passà u tizzone è prestu messenu à ride per un nunda : per una macula nantu à a camisgia di Juan, per un ragnu chì Jorge mettia fora cù delicatezza invece di sfracellallu, per n'importa chè... Pè i travagli, a chjesa era stata viutata di tutta a so mubiglia è e so rise ci ribumbavanu, strane strane. Moune fece un puemu in corsu, longu, liricu, chì Jorge, persu d'ammirazione, vulia ubligalla à scrive per ùn perdelu. Truvò una penna è un fogliu in un saccu d'armone è a fece cupià u testu, ma ùn s'arricurdava digià più chè di a metà.

Juan è Nany, ch'ùn si lentavanu più, s'eranu scantati in a cappelluccia di a cunfraterna, Santa Croce. Videnduli sparisce, Moune avia torna avutu l'ochji impazziti chì spaventavanu à Jorge. Pruvò à accarrizzalla, à basgialla, ma u schjaffitò è scappò currendu versu u Suttanu, lascendulu stantaratu è furiosu. Ghjunse à u Bar briunendu, paria ch'ella fussi perseguitata da u Diavule : " Fate prestu, in furia : Juan hà da abusà di Nany !"

Subitu, rializò ch'ella mettia in anda una mascina infernale. Ma era digià troppu tardi ; daretu à Lavighju, l'omi presenti s'eranu lampati in a chjappata, seguitati da Millie, in piena crisa d'isteria : "Tumbatelu ! Oh ! a mo figliulella ! Tumbatelu !" Moune si lasciò cascà in pianu dananzu à u Bar. Sbuttò à pienghje senza pudè piantà, signuzzendu tantu ch'ùn ne pudia guasi più rispirà è martellava u tighjatu cù i pugni, à sciappassili, senza sente u dulore.

Tuttu era andatu di male dipoi sempre in a so vita, tuttu ! Dipoi quandu ? Dipoi i so sei anni, da ch'ella era nata sta muccicosa. S'ella avessi riesciutu à sciappalli u capu in u so veculu tandu, quand'ella avia buscu quellu zocculu, chì mamma li avia cacciatu di manu ! Nimu a vidia à ella, ancu i visitori in casa si smaravigliavanu : o Nany, Nany ! Ella ? Ùn sapianu mancu ch'ella esistia. È avà Juanito, u tippu u più desiderevule di a terra, chì l'avia cuttighjata a prima è dopu, da ch'ellu avia vistu à Nany ùn l'avia più guardata... S'era passata cum'è sempre ! È si lagnava cusì di ciò ch'ella cridia a so sorte di mal'amata.

Di colpu, intese una manuccia lebbia lebbia chì li accarizzava e so buccelle bagnate è li allisciava i so capelli. Quale ci era ? Un'anghjulu ?

U visu d'anghjulu di Tuninu li surridia à traversu e so lacrime, fendula vultà a e rialità ! Si pisò in un saltu.

- Tuninu! Vite, cours chez Jeanjean, dis-lui d'appeler le Samu et la police et d'aller tout de suite à Santa Lucia, vite, dépêche-toi, ils peuvent le tuer !

- Mais qui ?

- Juanito, mon ami !

Entre mariposas negras (1/3)

2011-09-14T21:57:00.000-07:00

Una nuvella di

Francesca Graziani

Stu paisacciu paria carcu à ustilità da ch'elli eranu ghjunti i dui Spagnoli chì rifacianu e pitture è l'invitrate di a chjesa Santa Lucia, in u Poghju Supranu. Eranu ghjunti di Lugliu, unu grande è magru, barbutu, chì paria u Cristu dopu à i so quaranta ghjorni in u disertu, Jorge, è un'antru chì si dicia Gitanu è chì s'assumigliava un pocu à James Dean, Juan. I paisani l'avianu subitu cugnumatu "Jésus" è "James Dean".

Pè i vechji, eranu andacciani è basta : Lavighju cuntava ch'ellu l'avia vistu in Nizza fà i disegni nantu à e piazze per guadagnà trè soldi. Invece, piacianu à e giuvanotte: eranu "artisti", facianu disegni strasurdinarii nantu à e tuvaglie in carta di i risturanti, in terra, nantu à a rena, n'importa induve. Cantavanu è sunavanu di ghitarra dinù, cum'è nimu in paese. U più chì piacia era Juan, cù i so ochji infrebbati è a so legenda gitana, ch'ellu intrattenia cù fervore. Eppo era bellu è garbatu.

Cum'elli piacianu à e femine, i pullastroni li avianu prestu giratu e spalle è ùn piattavanu u so disprezzu. Quellu ghjornu d'Aostu, à l'ora di l'apperitivu, l'unicu Bar di u paese era pienu. N'eramu digià à a quarta o quinta servuta di pastizzu.

"Sò andacciani, ti dicu ! ripetia Lavighju à u Merre, "è tù o baullò, l'impiechi, quandu ci sò tanti giovani Corsi à circà un travagliu!" Jeanjean, u Merre, si difendia cum'ellu pudia : "Credi ch'ùn appia cercu ? Ma ci vole un minimu di qualificazione artistiche, figurati ! Credimi puru, sò veri artisti, anu un CV chì parla per elli, in Barcelona anu fattu parechji travagli cum'è quessu. Eppo, vai à truvà giovani Corsi pronti à travaglià d'aostu invece di cuttighjà e turiste in stringu nantu à e spiaghje ! Elli s'arrizzanu à 6 ore di mane, quandu i nostri ghjunghjenu briachi à tappu da e buatte, s'elli ùn si tombanu, à st'ora.

- È perchè faci fà u travagliu d'aostu ?

- Perchè aghju una data limita, o perdu l'aiuti di e cullettività. I pacherai tù i 90% di suvvenzione, cù a to impresa in bancarotta ! Lavighju trasaltò è fece per mette un cazzottu à u Merre, ma a patrona, Millie, si messe à mezu : "Aiò! aiò! Site scimiti o chè, ùn v'ete da batte per dui vagabondi ? " I cunsiglieri municipali pigliavanu pratesa pè u Merre, puru senza avè nisuna simpatia pè i Spagnoli. Cù l'alcollu, i spiriti cumenciavanu à scaldassi.

Lavighju era scatinatu. "O Millie, ferii megliu di guardà a to figliola Nany, ch'ùn hà mancu 17 anni ! Mi pare innamurata persa di 'ssu "James Dean"... Fideghja bè ! Millie ùn rispose nunda, paria impenserita da veru.

- È si sò stallati in a chjesa stessa, voi chì ne pensate o sgiò curà ? Truvate chì sò faccende què ?

- Ah, o figliolu, s'è tù i voli allughjà in casa toia, eiu ùn dicu di nò... Albergu cù e stanze libere quì ùn ci n'hè ... A chjesa per avà ùn serve, è a casa di u Signore pò accoglie à tutti, disse u prete Anghjulu Maria, cù un surrisu ironicu chì infuriò à Lavighju un pocu di più.

- Ebbè, ùn ci metteraghju più pedi in a vostra chjesa, a vi dicu eiu, per chjappà e so cimice è i so pidochji !

- Ma fatela finita, cù e vostre scimizie, ùn pudete imaginà chì e ghjente sianu differente di voi ? Moune, a figliola maiò di Millie, avia mughjatu. Era rossa imbacarillita. Era venuta à piglià e sigarette è ùn era pussuta stà zitta ; fora l'aspettavanu Juan, Jorge è a surella. Per una stonda, nimu aprì a bocca, tutti fissavanu i giuvanotti. Lascionu passà à Moune cù sguardi pisivi. Solu Millie alzò a voce : "Moune, attente à Nany !" A figliola alzò e spalle, cappiendu solu : "Nany, Nany...! ùn ci n'hè chè per Nany" è righjunse à l'altri.

I quattru giuvanotti piglionu a chjappata chì cullava à u Poghju Supranu. Jorge piantò davanti à Tuninu, un masciu di 9 anni chì paria di annuiassi solu sulettu. Cacciò calcinelle à culori da a so stacca è dumandò à u zitellu :

- Qu'est-ce que je te dessine ?

- Une corrida !

In quattru è trè sette, sottu à l'ochji sburlati di u masciu, disignò nantu à u tighjatu un toru à capu inghjò è un torero cù u so stracciu rossu. Olè ! disse, scarmigliendu e ciuffe negre zeppe di Tuninu.

Juan è Nany s'eranu alluntanati è Moune aspettava à Jorge, fendu u musu. A righjunse, ma stendu à bona distanza da ella. Era un pocu frasturnatu, li paria d'ùn capisce nunda, o allora troppu bè ; hè vera chì a cumunicazione era difficiule trà di elli, imbulighjavanu tutte e lingue, spagnolu, corsu, francese è ancu inglese... À principiu, cù Moune ci era statu una cumplicità maravigliosa : li facia scopre e puesie di Garcia Lorca è si era presa di passione pè 'ssu pueta ; u leghjianu inseme, li spiecava e parolle, li ripetia a prununcia, si campavanu ! Moune ridia dinù cum'è una scema quand'ellu facia e caricature di i paisani, o disegni fantastichi nantu à e tuvaglie. Pigliava tuttu : "o Jorge, i mi dai quessi, i vogliu tene !" Avia cridutu un mumentu ch'ellu li piacessi. Li avia dettu chì e femine in Barcelona ùn eranu belle cum'è in Corsica, è chì u so tippu corsu li piacia assai à ellu. Ma avà s'era avvistu ch'ella guardava sempre da u latu di Juan è Nany, cù un sguardu lucicante, tontu, chì li facia peura...

Chjuditura di T&F pà dui mesa

2011-07-01T01:37:00.000-07:00

Cari tutti,

Tarrori è Fantasia chjudi a so prima staghjoni. Da uttrovi 2010 à ghjunghju 2011 seti stati numarosi à participà, autori è littori, cù più di 38 000 pagini visti, è guasgi un centu d'intrati diffarenti. U contu di i testi ùn l'aghju micca fattu, ma credu ch'hè unu sprupositu, chì hà fattu di 'ssu bloggu una riescita chì mancu pinsaiu ch'idda era pussibuli.

Luddu è Austu sarani dunca i mesa di u riposu, è à tempu pirmittarani di ricarcà i battarii, ancu sì i testi in riserva n'avemu uni pochi pà a riintrata. Frattempu, pudeti sempri mandà i vosci testi à marco.biancarelli@orange.fr. Senza missi in pagina particulari pà facilità u travaddu finali d'edizioni. Parlendu d'edizioni, pudemu attaccà quì, sì vo vuleti, una discursata annant'à i pussibilità di buscà un editori pà publicà un mischiu di 'ssa prima staghjoni.

Eccu, vi ringraziu à tutti pà a voscia participazioni. È intantu vi docu un appuntamentu pà sittembri 2011.

À prestu !

L'albaru (3/3)

2011-06-30T01:00:00.000-07:00

Una nuvella di

Paulu Franceschi

À u capu di una ora, Diana era sempri sottu u purtonu di l'Uffiziu di u Patrimoniu. Era un pocu incheta Diana. « Ma d'avè po quantunqua datu u listinu à un tipu ch'ùn cunniscia mancu ! » s'inchitava Diana. « Hè vera chì t'aia l'aria seriu, 'ssu tipu. Aia dittu un' ora, ma par avà po ùn ci hè nimu. Saria po ora ch'eddu ghjunghjissi. Uh ! La me sorti ! Uh ! La me sorti nera ! » pinsava Diana. « Ciò ch'aghju fattu ! M'hà scruccunatu, sì. Quissu, era un beddu bebbè ! M'hà arrubatu vinti anni di travagliu è di ricerca ! Uh salva, salva ! Socu stata cusì tonta di dà li u listinu »! À mumenti, Diana aia da metta à pienghja. Ma di colpu, sintì un rimori è difatti, ci era calchissia chì s'affaccava à u purtonu. Era ieddu ! Era l'impiigatu ! Li dissi:

– T'aghju una bona nutizia ! I paroli sò stati validati ! I cumpremu. I vi pudemu cumprà, ma a sola cosa hè chì ùn i pudemu micca cumprà à trenta milla euroni, ma à vinti milla. Và bè quantunqua ?

– Andarà listessu, dissi Diana.

È u tipu li purghjiti un sceccu di vinti milla euroni.

– Allora eccu u vosciu sceccu.

– Vi ringraziu.

– È s'è vo t'aveti altri paroli, pinseti à no !

– Isiè, isiè...

Annantu à a petra liscia, u telefuninu di Diana prughjittò a so luci putenti. U granitu grisgiu sparì è lasciò a piazza à un screnu culuritu tridiminsiunali. Diana feci corra i so dita annantu à a petra antica. Po Simonu s'avvicinò è intrì anch'eddu di ditu l'infurmazioni in u telefuninu, par via di a petra liscia. Po Diana purghjiti vinti milla euroni à Simonu. Quiddu cunteti i solda à freccia à freccia eppo i missi in istacca. Da quì à pocu, aia da essa fatta. A lenza di a tupizzola di l'ortu di a Strimina aia d'essa d'Anghjul'Antonu. Aia da essa a soia, sputica. L'attualisazioni di u cadastru, a publicazioni è a parcizzioni di i tassi, tuttu aia da essa fattu à tempu da quì à dumani, par via di u telefuninu è di u Ritonu.

Anghjul'Antonu era puri ghjuntu à quidda casetta. A porta, cù u so sopraporta in petra scalpiddinata, era chjusa. Annantu à a porta, ci era a mani morta. Anghjul'Antonu pichjeti trè volti à l'usciu. Ùn irispundia nimu. Ùn ci era nimu. Anghjul'Antonu intesi un ghjacaru chì abbaghjava. Quand'è dà, in u vangonu, viditi un omu, cù u so ghjacaru à fiancu, chì si ni cuddava pianu pianu. Fà chì l'aia vistu da in ghjò. Era forsi Felicianu l'omu. A 'di aiani ditta, à Anghjul'Antonu, chì Felicianu cunniscia podarsi calchì parola antica antica.

– Salutu ! Socu Anghjul'Antonu. V'aghju chjamatu arrisera.

– Ah ! Seti vò. A mi sò pinsata. V'aghju vistu da in ghjò.

– Hè teppa quì.

– Vuliati sapè di i paroli rari. Ci n'hè parechji chì i m'ani cherti. Li n'aghju dati bon'parechji. Ma faci dighjà parechji anni. Avà po ùn mi ni ferma più. Mancu una.

– Ùn cercu micca i paroli sputichi. Ma s'è vo t'aveti calchì parola chì ùn si senti più o ancu s'ùn si sà micca ciò ch'edda hè, par esempiu, m'intaressa listessa. T'ani u so valori, 'ssi paroli quì. Vi pagaraghju u prezzu.

– A primura di u prezzu ! Ma aspitteti ch'e cerchi. Ci poni ancu essa. Ah ! Mi pari d'avè intesu trè mesa fà una parola antichissima. Ùn m'invengu più bè quali hè chì a m'hà ditta. Socu vechju, t'aghju uttanta novu anni. M'hà da rivena... Aspitteti un' ugna...

– Piglieti u vosciu tempu, ùn ci hè nudda chì pressa. Ùn semu micca po in bocca à i ghjacari.

– Ah ! Avà ci socu. 'Ssa parola a cunnosci zi Anton'Santu chì stà in u paisolu di Turghjà. Hè vechju zerricu, quant'è mè. Ùn ci hè più cà i vechji cucchi com'è no chì poni sapè 'ss'affari quì ! Li dumandareti. Diti ch'è vo viniti da a me parti. A vi hà da dì, ieddu.

Anghjul'Antonu travagliava dipoi una meza ora in l'ortu di a Strimina. Aia riparatu i sarrenduli. Diana u fighjulava surridendu. Po Anghjul'Antonu vensi à pasà accantu ad edda. Diana missi a so mani in quidda d'Anghjul'Antonu. Eppo li dissi:

– Ci vulemu avvicinà un pocu di a tupizzola ?

– Com'è tù voli.

Eppo muvìni tremindù pianareddu versu a tupizzola. U locu era adumbratu, chì ci era mori arburi. I dui sposi erani avà accantu à 'ssi arburi. I fighjulavani.

– Quissu hè tamantu ! dissi Anghjul'Antonu, fighjulendu u fustu di l'arburi.

– Hè vera. Hè beddu maiureddu ! Dighjà, ti piaciaristi ch'edda fussi a toia, 'ssa lenza ?

– Comu ? Ma ùn hè micca a meia, a sa bè quissa.

– Isiè, ma pudaria essa a toia ? Ti piaciaristi o micca ?

Anghjul'Antonu ùn ebbi micca u tempu di risponda, chì Diana aghjustava:

– Ebbè à parta d'avali hè a toia. Tutti 'ssi arburi sò i toi avà ! I t'aghju compri ! M'hà vindutu a lenza Simonu. Avà ùn ci hè più nimu chì a pò cumprà. A lenza hè a toia par sempri !

Anghjul'Antonu firmeti stantaratu. Era sbiancatu di colpu. Paria chì u sangui fussi statu toltu da a so parsona. Diana fighjuleti 'ssa attitudina strana di u maritu, pinsendu ch'eddu era podarsi incausata da una troppa grandi gioia. Devi esssa affucatu da l'emuzioni è ùn pò dì nudda, ùn pò mancu parlà, pinseti Diana. Anghjul'Antonu fidiava l'arburi, ma paria chì i so ochji ùn i vidissini micca. Paria abbagliacatu da i fusti bianchi. Passetini parechji sicondi grevi, longhi longhi.

– Hè un beddu rigalu, dissi infini Anghjul'Antonu, à bassa boci.

– Ma chì t'ha, dissi Diana, incheta. Ùn sè micca cuntenti ? Ùn ti faci micca piaceri ?

– Ùn aghju nudda, nudda. Ben' sicuru, sò cuntenti. Hè un beddu rigalu, ti dicu.

– A sola cosa, ripresi Diana, aghju vulsutu venda calcosa. Era calcosa d'impurtantu, ma quì sò stata ubligata. Ùn ci hè statu mezu di fà altrimenti.

– È ch'ha vindutu ?

– Mi sò vindutu u me listinu di quattru paroli. Quì era ubligata, ùn ci statu versu di fà altrimenti, capisci o Anghjul'Antò, a capisci quissa ?

Anghjul'Antonu firmeti calchì siconda à ochji chjusi. Steti calchì siconda in u bughju. Diana sintia a mani di u maritu chì strignia a soia. Troppu forti.

– Mi strigni forti, dissi.

– Ancu eiu t'aghju fattu un rigalu.

Diana ùn vidia nudda. Chì Anghjul'Antonu ùn aia nienti in manu.

– Un rigalu ?

– U rigalu, l'aghju tinutu menti. È avà u ti docu. Hè una parola... Ma ùn avaria mai pinsatu ch'è tù avissi da venda u to listinu di quattru paroli.

– Una parola ? Qualessa ?

– Hè una parola urfanedda. Saria u nomu d'un arburi. Ma ùn si sà micca qualessu eddu hè. 'Ssa parola hè l'« àlbaru ».

– L'« albaru » ! Comu hè bedda ! Indù l'ha busca ?

– Hè Felicianu, un pastori chì stà in a Tassinca. M'hà dittu d'andà à veda un omu annosu chì stà in Turghjà, un certu zi Anton’Santu. È quiddu quà ùn aia più drittu di venda a parola nè di dà la, chì aia firmatu un documentu, ma m'hà datu l'adrizzu di un certu Saveriu chì stà in Bonifaziu. È quiddu, a m'hà vinduta.

– L'« albaru ». Quant'edda mi piaci, dissi Diana.

– Ma a sa, ié dinò aghju vulsutu venda calcosa par pudè la cumprà 'ssa parola chì ti mancava... Difatti, mi sò vindutu l'ortu di a Strimina...

Diana ùn rispirava guasi più. S'hà da vena menu fà chì, pinseti Anghjul'Antonu. Chì Diana paria com'è assuffucata. Anghjul'Antonu è Diana s'erani abbracciacati. Anghjul'Antonu sintia i lacrimi di a so donna chì falavani, caldi caldi, annantu à i so bucceddi.

Stetini un mumentu cusì, eppo i dui sposi si lintetini pianu pianu, vultendu si versu a tupizzola di l'ortu di a Strimina. Anghjul'Antonu fighjulava 'ssi arburi incù u so fustu arghjintinu. Ùn era micca leccia, ùn era micca olmu, nè quarciu, nè suvara, nemmenu tassu, nè alzu, nè frassu, nè quarciu, nè sorba, nè vetriccia, nè saliciu, nè tremula, nè mancu piobbu. Di colpu li parsi à Anghjul'Antonu d'essa accicatu è di senta com'è una musica arghjintina. U vintisgiolu s'era pisatu in a bucchetta è facia trimmà i casci di l'arburi... Anghjul'Antonu vidia quì un albaruchju, quà un albarettu, quinci un albaronu. quand'è dà un albarottu. Vidia dinò chì parti è più di a tupizzola di l'ortu di a Strimina era inalbarata, ma chì una piccula parti era disalbarata. Anghjul'Antonu fissava 'ssa albareta è ni vidia trimmà i casci. Li paria tutta un' organu trimendu chì sunava una sinfunia inedita, un capu d'opara trimenti, nienti cà par eddu. U vintisgiolu facia trimmà i casci di l'albari à più pudè è Anghjul'Antonu solu sintia 'ssa miludia maravigliosa, sunata da tutti 'ssi sturmenti arghjintini. À pocu à pocu, Anghjul'Antonu viditi i steddi chì s'accindiani, luminosi, in u sguardu di Diana. In a tuppizzola di l'ortu di a Strimina, cantavani l'anghjuli pà l'albaru è pà l'umanu ghjennaru !

L'albaru (2/3)

2011-06-29T03:04:00.000-07:00

Una nuvella di

Paulu Franceschi

Diana apriti a tiretta chì ci era in cucina, accantu à a meda. In a tiretta, ci era una scatula bidduchja incù uni pochi di frisgetti giaddi è russicci. Diana apriti a scatula. Indrentu à a scatuledda, ci era un' picculu fogliu di carta. Diana u piglieti è u si lighjiti. L'aia lettu ùn si sà quanti volti. Più di centu volti, più di dui centu, è podarsi più di cinqui centu volti. A primura... Allora u si pudia rileghja una volta di più. À ochji chjusi, Diana avaria ancu pussutu veda ciò chì era scrittu annantu à u fogliu di carta. Ciò chì era scrittu annantu, Diana u sapia à menti. Ma da chì tena u fogliu di carta, tandu ? Par nudda, pinsava Diana, ma ci vulia à tena lu quantunqua. Chì ùn a 'di facia micca à friscià lu. U si tinia. Annantu ci erani i paruletti. I paroli schersi, quiddi chì erani in traccia di spariscia. Ci ni era quattru. Micca trè. Micca cinqui non più. Ma quattru. Nienti cà quattru. Ma erani dighjà mori, quattru. Era un tisoru.

Prima, ci era « zizziddì ». Ma chì era po « zizziddì » ? Fà chì era un verbu, tandu si pudia dì dinò « zizziddiscia ». O allora era podarsi un locu, tandu « Zizziddì » saria statu un tuponimu ? Ma pudia essa dinò u numignulu di calchissia, à tempi antichi. Difatti, a rifarenza di « zizziddì » si era persa in u labirintu istrosu di u tempu. Diana aia intarrugatu mori ghjenti, ma ùn era statu nimu capaci di dì li ciò ch'eddu era po « zizziddì ». Firmava a parola, ma era mozza. Li mancava un pezzu. È senza 'ssu pezzu, « zizziddì » ùn pudia micca essa una parola schietta è rinviviscia.

Po ci era dinò « Chinnà ». Quissa era una parola chì Diana aia intesu mintuvà da u so missiavu, chì l'aia intesu prununcià da a so minnana. Era dunqua a purminnana di Diana chì a cunniscia. Ma chì era po « Chinnà » ? Era un beddu sapè ! Sarà statu una cità antica, o un paesi anticu ? Ùn a sapia più nimu. Si pudia fà parechji iputesi, ma a parsona ùn pudia essa sicura di nudda. « Chinnà » ùn era po micca a China. I dui paroli erani troppi diffarenti. O fà chì sarà statu un pezzu di sprissioni persa ? È voglii è ghjira, ùn si pudia dì ciò ch'edda era « Chinnà ». A parola ci era, ma chì vulia dì ?

Ci era ancu « Valdimbu ». Era una parsona anziana di Zèranu chì l'aia mintuvata à Diana, è chì dicia chì a tinia di u so cucinu di terzu chì l'aia intesu dì da u so arcimissiavu. Ma chì era po « Valdimbu » ? Drentu ci era « valdu ». Fà chì era un locu. Ma pudia ancu essa u nomu di calchì ughjettu. Era un misteru ciò ch'eddu era po « Valdimbu ». Aia chertu à parechji parsoni Diana ciò ch'eddu era « Valdimbu » ma ùn aia pussutu risponda nimu...

Eppo ci era dinò « pan da can ». Quissa l'aia intesa Diana da a so mamma, chì dicia ch'edda l'aia intesa mintuvà da a so minnana chì si dicia tandu. U prublemu chì ci era incù « pan da can » hè chì si ni era persu u sensu. Chì era po u significatu di « pan da can » ? Vinia forsi da « pani da cani », chì « panu da canu » o « pana da cana » ùn vulia dì nudda. « Pani da cani »: u pani da u ghjacaru... Quì era un beddu sapè ! Fà chì era un' esprissioni, o un pezzu di pricantula o ancu una parti di una canzona ? Ùn a sapia più nimu. U sensu si n'era persu dinò. Ancu quì, Diana aia intarrugatu bon'parechji parsoni, ma senza alcunu risultatu. Ùn si n'invinia nimu. Faci chì firmava « pan da can » ma ùn si sapia più ciò ch'edda vulia dì. Paroli com'è quissi erani paroli senza ughjettu, senza rifarenza. Erani esistuti, ma u sensu si ni era persu. Erani paroli urfaneddi, com'eddi i chjamavani à l'Uffiziu di u Patrimoniu.

Era pronta a cena in casa di Diana è Anghjul'Antonu. Suppa di fasgiolu è fasgiolu appressu. Era u piattu prifiritu d'Anghjul'Antonu.

– Ci chì Simonu si vurria venda a tuppizzola di l'ortu di a Strimina. Aghju intesu dì cusì in paesi, dissi Anghjul'Antonu à a moglia. Sarà vera ?

– Ma quali hè po chì hà t'hà ditta ?

– A m'hà ditta Paduvedda.

– Sè sicura ? È parchì a si vindaristi ? Hè chjucaredda 'ssa lenza.

– Devi essa par fà i legna. Credu chì t'hà bisognu di solda. Chì solda, li ni ferma pochi è micca.

– Ma ci hè calchissia chì a voli cumprà 'ssa lenza ?

– Ùn a sò. Ci chì ci saria Polu chì a vò cumprà, ma avaria trovu chì u prezzu fussi troppu altu, chì a lenza hè chjuca...

– Isiè. Sicura ! Chì disprezza vol' cumprà !

– S'eddu hè par fà u legnu, ci ani da essa la ghjenti intarrissati, ben' sicuru. Dumandaraghju à Paduvedda. A m'ha da dì, iedda. Ci voli à sapè. Subitu.

– Ma ùn ti pari micca ? Ci hà da arruvinà 'ssu affari quì. Ci hà da arruvinà l'ortu di a Strimina. Dopu a tramuntana s'hà da arrusta i nudeddi di l'arburi è lampà i so fiora. È 'ssu ventu m'ha da scimpià l'urtaglia. Emu da perda l'ortu. Ùn hà più da valè nudda ! Ti rendi contu ! Venda si a lenza di a tupizzola ! Ancu si cont' edda ! Ci hà da vulè ch'e vochi à veda à Simonu. Ùn ci vò micca ch'eddu fessi 'ssa bistialità.

I ricerchi aiani dimustratu chì u multilinguisimu sviluppava a famosa mitacugnizioni. Quiddi chì erani bislingui di nascita a sviluppavani naturlamenti è senza sforzu. Andava lindu lindu par eddi. È s'eddi ammaistravani dui lingui da ziteddi, dopu l'era più faciuli d'ammaistrà ni un' antra o ancu parechji. Comu si dici tali parola, da una lingua à quissa altra ? Chì hè l'equivalenti di tal' esprissioni in tal' lingua ? Era quissa a mitacugnizioni. Era par via di quissa chì par quiddi chì cunnisciani dui lingui da ziteddu, era beddu più faciuli d'acquistà ni una terza. Chì a mitacugnizioni, l'aiani dighjà, erani dighjà avvezzi. Era com'è un musculu chì era forti, chì era statu sviluppatu da a zitiddina. Ma par quiddi chì ùn aviani amparatu da ziteddu cà una lingua sola, era moltu più difficiuli di sviluppà 'ssa mitacugnizioni. È più divintavani annosi è più divintava impussibuli par eddi di pudè ottena 'ssa famosa mitacugnizioni.

Anghjul'Antonu francheti u zogliu di u baru di u paesi. Quà, ci era quattru o cinqui parsoni chì a si faciani una discutita. À mezu ci era Simonu.

– Sè bè o Simò ?

– Benissimu. È tù ?

– Si faci andà.

Anghjul'Antonu parleti un pocu di u tempu, di l'utimi avvinimenti successi in paesi 'ssi pochi ghjorna, incù Simonu. Eppo dopu aghjusteti:

– Par appuntu o Simò, ci chì ti vularii venda a lenza di a tupizzola di l'ortu di a Strimina. Hè vera quissa ?

– Sicura chì hè vera ! Cercu di venda la.

– È a vendi caru ?

– Micca mori. Vinti milla euroni.

– Vinti milla euroni ! Ma hè tropppu caru. A lenza hè chjuca, magari.

– Eh ! Ci hè u legnu quà. Socu ubbligatu à venda la 'ssa lenza, chì aghju persu vinti capri custannu. Faci chì a me banda di capri t'hà menu rindimentu. Eppo hè statu una gattiva annata di brocciu. T'aghju bisognu di 'ssi solda.

Simonu era pastori, capraghju. Era un Erculu, forti com'è un tassu. Simonu t'avia un centu di capri in 'ssi muntagni. Ed hè vera chì facia u brocciu bonu. T'avia a so cliantedda. La ghjenti si sariani dannati par tastà u brocciu di Simonu. Ùn facia micca una grossa pruduzzioni, ma si vindia tuttu. Senza mancu fà riclama nè corra appressu à u clienti. Campava di quissa. È li bastava.

Diana s'avvicinava da l'Uffiziu di u Patrimoniu. T'avia u so fogliu di paruletti in manu. U strignia. Era bedda dicisa. Aia da pruvà à venda lu. Aia da pruvà à venda si i quattru paruletti. Diana viditi u purtonu di u bastimentu di l'Uffiziu di u Patrimoniu. Avanzeti un pocu eppo vissi chì ci era un' impiigatu drentu.

– Bonghjornu O Madama, vuliati qualcosa ? dissi eddu.

– Isiè. Vulia sapè s'è vo cumpravati i paroli antichissimi ? Chì n'aghju qualchiaduna. Ci sò ancu beddi, midè !

– Ben'sicuru chì i cumpremu. T'ani un grandi valori. N'emu compru uni pochi 'ssi pochi ghjorna. Allora n'aveti bon' parechji ?

– Isiè. N'aghju uni pochi.

– Sò urfaneddi o sò sputichi ? A sapeti ciò ch'edda hè a diffarenza ?

– Ben' sicuru chì a socu. Credu ch'è sò piuttostu paroli urfaneddi.

– Chì i più ricircati sò i paroli sputichi. Di quissi n'aveti ? T'ani un' valori trimenti. Chì poni essa imprudati subitu subitu. Eppo servini à tutti. N'avemu pocu in 'ssu mumentu. Allora n'aveti paroli sputichi ?

– Ùn sò micca sicura, ma credu ch'eddi sò paroli urfaneddi. Ma ci hà da vulè à virificà la quantunqua.

– U cunnisciti u valori di una parola sputica ?

– Aghju intesu dì ch'eddu era veramenti caru. Ma quantu esatamenti ?

– U prezzu pò cuddà sin'à deci millioni d'euroni !

– Deci millioni d'euroni !

– S'adipendi i paroli, ma certi paroli, l'emu compri deci millioni d'euroni !

Po Diana spiigheti à l'impiigatu ch'edda t'avia quattru paroli à venda.

– Feti veda. Musceti ghjà. Chì ci poni ancu essa paroli sputichi, quì in drentu.

Diana li purghjiti u so listinu di paroli. L'impiigatu piglieti subitu subitu u listinu è u lighjiti pianu pianu. Po firmeti un pocu senza dì nudda. Par Diana, pariani ori, 'ssi stondi. Po l'impiigatu missi à parlà:

– « Pan da can » allora chì vol' dì ?

– Ùn socu altru. Socu altru assà !

– È « Chinnà » chì saria po ?

– Hè listessa. Ùn a sò micca. 'Ssi quattru paroli, à u veru fondu, n'emu persu u sensu. Ùn vi possu micca dì ciò ch'eddu hè.

– Allora quì sò tutti paroli urfaneddi. È quissi t'ani menu valori cà i paroli sputichi. Ma t'ani u so valori quantunqua. A sola cosa chì ci hè, hè ch'è quattru ùn bastani micca. Ni ci vurria alminu cinqui. S'è vo n'aveti cinqui, i vi pudemu cumprà. Allora vi cunveni d'aspittà d'avè ni cinqui. Vulteti puri à veda ci quandu n'aveti cinqui, è tandu i vi cumpraremu. Ma par avà, vi ni manca una. Quattru paroli urfaneddi, ùn si poni micca cumprà.

– Ma quantu mi dariati par cinqui paroli urfaneddi ?

– Ci voli à cuntà cinquanta o sissanta milla euroni. S'adipendi.

Po Diana si lucinzieti è surtiti da l'Uffiziu di u Patrimoniu. 'Sciuta ch'edda era da l'Uffiziu, era ancu più trista ch'è quandu edda era intruta.

Ma daretu à u purtonu di l'Uffiziu di u Patrimoniu, ci era qualchissia chì era arrimbatu à u muru. À quandu isciuta Diana, li dissi:

– Hè difficiuli à fà si cumprà i paroli, ùn hè vera ? Ùn i comprani micca tutti.

– Ah, diti la puri. Aghju pruvatu ma ùn ci statu versu. U prublemu hè chì t'aghju quattru paroli urfaneddi è chì i comprani à cinqui à cinqui. Mi ni manca una, quà.

– Allora pudeti aspittà mori, risposi eddu. Ùn eti micca d'avè subitu, 'ssa quinta parola !

– Quissa po a socu. Hè mori difficiuli di racoglia i paroli. Dighjà chì ci hè vulstutu guasi vinti anni par avè 'ssi quattru paroli ! Ni possu ancu avè par parechji anni. È sò ancu capaci d'ùn avè la mai, 'ssa quinta parola.

– A sapeti ciò ch'è vi possu prupona. V'aghju da arranghjà. Vi compru i quattru paroli à bon' prezzu. Vi cunveni ? Par cinqui paroli, quantu vi ani prupostu, à l'Uffiziu ?

– M'ani prupostu cinquanta o sissanta milla euroni. Dicini chì s'adipendi.

– Quissu hè u prezzu par cinqui. Ebbè, femu la trè libri incù u zaniu ! Vi prupongu trenta milla euroni par 'ssi quattru paroli. Vi cunveni o ùn vi cunveni ?

– Mi pudaristi cunvena.

– Allora s'è vo seti dicisa, deti mi u listinu incù i quattru paroli, lasceti mi u tempu di validà li è vi docu i vosci trenta milla euroni. D'accordu ?

– Socu d'accunsentu, ma quantu l'eti da tena u listinu, par validà mi i me paroli ?

– Micca mori, ma ci voli à capiscia chì t'aghju bisognu di un'ugna di tempu. Micca assà. Chì t'emu u nosciu scagnu di sperti, è quandu i vosci paroli sarani stati validati, vi pagaraghju i vosci trenta milla. Diciaraghju chì n'avemu par una uretta, micca di più. Allora deti mi u listinu è piglieti vi la un pocu in pacenzia. Vengu subitu subitu dopu à a spirtizia.

Diana li purghjì u so listinu. U fighjuleti una ultima volta. L'aia fidiatu tanti è tanti volti chì l'era fermu impressu, com'è zuccatu in a so menti. Ancu s'edda stava à ochji chjusi, u pudia sempri veda. Eppo u deti à l'impiigatu.

L'albaru (1/3)

2011-06-28T01:37:00.000-07:00

Una nuvella di

Paulu Franceschi

À Francescu Antona (Capurali)

The magi, as you know, were wise men--wonderfully wise men--who brought gifts to the Babe in the manger.

O. Henry

Anghjul'Antonu fighjulava u so ortu. 'Ssu ortu era probiu magnificu. Era una biddezza ! L'arburi fruttevuli, ci erani in quantità. Chì ci era prugnoli, prasculi, peri sanghjuvannini è fichi nieddi. Ci era ancu l'uva sciaccaredda. È l'arburi davani i frutti à l'ingrossu, in a frutteta. Oh li miraculi di fica ! Erani tutti fichi fiurunaghji. Ancu i fiurona erani boni di lugliu ! Incù a so forma più lungarina cà quidda di u ficu, erani cusì boni è sapuriti, i fiurona. È i prugnoli ! Di ghjunghju, erani carchi imbardati, chì i raniculò, ci erani à buzeffara quì ! Eppo ci era ancu l'urtaglia. Ci era ciuvodda, aglia, porra, pumati, zucchetti, poma, è cetara è cetara. Tuttu à l'ingrossu. Tutti ligumi sapuriti è colmi di soli è d'acqua linda. Priparati è accunciati comu si devi in i tiana, ci era probiu da liccà si ! A diciani la ghjenti di u circondu chì « A terra di l'ortu di a Strimina hè a più bona di u cantonu ». Anghjul'Antonu fighjulava 'ssa terra. Era nera nera. Bastava à pona. Eppo dopu isciiani i ligumi tamanti !

Anghjul'Antonu era andatu à torcia l'acqua è dava una annacquata à i so vica. L'acqua curria in ogni sulcinu è infundia quidda terra. A terra a si biia tutta. Risplindia.

– « L'acqua hè u sangui di a terra » pinseti Anghjul'Antonu. Era cusì fieri, di i so arburi, di i so ligumi, di u so ortu.

Erami in 2047. U mondu aia cambiatu mori 'ssi ultimi anni. A perdita di a diversità linguistica era diventata un pinseri maiò par tutti. I Reti d'ogni sorti, u Ritonu - a Reta di i Reti - ni parlavani à più pudè. In ogni paesi di u mondu, ùn passava una sittimana senza chì 'ssu tema particulari ùn fussi discutitu in i dibattiti publichi, in i ghjurnali o in i loca di discussioni d'ogni sorti. Difatti, à a fini di 2030, ci fubbi una presa di cuscenza generali chì a diversità umana andava di mali. Micca a diversità umana basata anantu à i razzi. Innò. Quissa era una cridenza di u XXesimu seculu passatu. Ma 'ssa cuncizzioni di a diversità umana fù prestu abandunata, chì i biulugisti si n'erani avvisti chì ci era puchissima diffarenza trà i razzi umani, ch'eddi fussini bianchi o neri o giaddi. Innò. Ci fù à parta di 2025 un cambiamentu prugrissivu di paradigmu. Prima, ci fubbi a cunsidarazioni chì a diversità linguistica facia a diversità culturali, è chì a diversità culturali inghjinnava dopu a diversità cugnitiva, è chì a diversità cugnitiva era a diversità umana probia. In fini di contu, ci fubbi una presa di cuscenza chì l'umanu ghjennaru era in traccia di perda a so diversità. Duranti a fini di u XXesimu seculu è u principiu di u XXIesimu seculu, l'umanità s'era impignata par difenda a diversità di u regnu animali è vegetali, è à fà sforzi tamanti par difenda i spezii di fauna è di flora minacciati di sparizioni. Par furtuna, uni pochi di successi erani stati ottinuti. Ma quanti fiaschi dinò ! Bon' parechji spezii rari erani spariti à pocu à pocu, senza ch'è nienti fussi pussutu essa fattu par impidiscia 'ssa perdita. È in l'anni 2040, era tantu quantu a situazioni rispettu à a fauna è a flora. Una calata generali ci era stata. Ciò chì era vinutu più dopu, era u fattu d'avveda si chì a diversità culturali facia a diversità cugnitiva. Isiè, era stata una bona, ma podarsi troppu tardi ! Chì si ni erani avvisti à l'ultima, l'omini. Difatti, à u principiu di u XXIesimu seculu, ci erani guasi sei milla lingui annantu à a pianetta. Ma in 2047, ùn ni firmava più cà milla è setti centu cinquanta dui. È siont'è i sperti, ùn n'aia più da firmà cà setti centu à a fini di u XXIesimu seculu.

Tuttu andava d'incantu incù l'ortu di a Strimina. Ùn ci era mai statu ch'è un' prublemu. Difatti, a sola cosa chì aia datu u pinseri à Anghjul'Antonu à un mumentu datu, era chì falava à spessu a tramuntana da a tuppizzola. Quissa, a dicia dighjà u so babbu. Ma si n'era avvistu veramenti Anghjul'Antonu parechji anni fà. 'Ssu ventu fretu è ghjilatu chì falava da a sarra è chì ghjintria pà a tupizzola di l'ortu di a Strimina avaria pussutu fà i disguasti in i culturi. Dicia u pruverbiu chì a tramuntana hè « fresca è sana ». Sicura. Ma dicia dinò chì « Par i vechji ùn hè sana, è mancu par i ziteddi, chì l'arrusti i so nudeddi ». Pinsava Anghjul'Antonu ch'edda era listessu affari par l'arburi. A tramuntana ùn era tanta bona pà l'arburi, chì i pudia dissiccà. S'edda falava in 'ssu curridori, s'aia da purtà i fiora di l'arburi è l'aia da fà siccà: Anghjul'Antonu era in pinseri. Campa chì ci era una lenza in 'ssa tupizzola chì era piantata à arburi. 'Ssi arburi erani mori alti. È 'ssi arburi paravani a tramuntana. Parava da a tramuntana ma parava dinò di u sciroccu. À chì para fretu para caldu. U fustu di 'ssi arburi era drittu drittu. È guasi biancu certi volti. Paria d'arghjentu. Lucicava guasi. È 'ssi arburi erani mori casciuti. Com'eddu i facia trimmà 'ssi casci a tramuntana, quand'edda tirava annantu à quidda spadda ! È l'arburi arghjintini paravani l'ortu di a Strimina da u ventu. Anghjul'Antonu ùn era micca prubitariu di 'ssa lenza ind'eddi ci erani l'arburi. A lenza era di Simonu. Ma Simonu ùn si n'accupava di a so lenza. L'aia po a primura Simonu di 'ssa lenza di sopra l'ortu di a Strimina ! T'avia i so faccendi è ùn pudia dà capu à tuttu. Simonu lasciava fà. Facia cunfidenza à Anghjul'Antonu. Eppo era chjucaredda 'ssa lenza di l'ortu di a Strimina. Difatti, Anghjul'Antonu li dava una pulita di tantu in tantu. L'arburi d'arghjentu crisciani di annu in annu. Più divintavani maiori è più paravani da u ventu.

L'ughjetti immatiriali aiani oramai acquistatu un valori. À quiddi tempi, ùn ci era micca cà a ropa chì t'avia u valori, accadia dinò chì certi ughjetti astratti t'avissini dinò u so valori, u so prezzu. Prima era parsa strana à la ghjenti, chì certi ughjetti immatirali t'avissini cusì un valori. Ma à pocu à pocu, l'usu ni era statu adupratu è la ghjenti s'erani avvezzi. Quandu ci fubbi 'ssa presa di cuscenza chì u patrimoniu immatiriali t'avia un grandi valori par l'umanità, tandu i bè astratti com'è i puisii antichissimi, i raconti antichi, i pruverbii rari, i versi sminticati è ancu i paroli in traccia di spariscia, aiani acquistatu un valori trimenti. È fù cusì chì à pocu à pocu, i paroli rari divintetini ricircati è cumprati. Certi anu criticatu 'ssa manera di fà. Diciani tandu ch'eddu era par via di u matirialisimu: ogni cosa divia pudè essa vinduta, i bè matiriali com'è i bè immatiriali. Tuttu si pudia cumprà. È par via di cunsiquenza, sicondu ieddi, u mondu era più matirialistu ch'è innanzi. Ma certi raghjunavani altrimenti. Chì era piuttostu chì 'ssu cambiamentu s'era fattu di manera naturali è cù l'accunsentu di tutti. Diciani quissi chì u matirialisimu, era piuttostu ch'è i bè immatirali ùn avissini alcun' valori. À pocu à pocu i bè immatiriali inveci sò divintati apprizziati è stimati. Era una ropa spiciali, ma era ropa quantunqua. In fini di contu, era piuttostu 'ssu puntu di vista chì s'era spartu è chì la ghjenti aiani ammissu. Fù cusì chì u mondu s'apriti à pocu à pocu à u valori, fora di a materia. Era quantunqua un' cambiamentu trimendu par l'ecunumia. Tandu si scanvietini i paroli o i sprissioni rari, si cumpretini è si vinditini. A diciani certi ecunumisti chì i bè immatiriali erani divintati una marcanzia com'è l'altri. Uni pochi d'istituzioni è d'impresi, ingaghjati in a prutizzioni di a diversità linguistica è culturali i pagavani ancu cari, i paroli schersi. In Corsica, com'è dinghjalocu, ci era l'Uffiziu di u Patrimoniu, chì dipindia di l'Unesca, chì s'era incaricatu di racoglia tutti 'ssi paroli persi o in traccia di perda si.

Ci erani i paroli urfaneddi, chì ùn erani tantu ricircati eppo ci erani i paroli sputichi. Una parola urfanedda era una parola schersa, chì ùn era più imprudata, è chì u sensu si n'era persu : ùn si sapia più ciò ch'edda vulia dì. I paroli sputichi inveci, erani paroli schersi o ancu rarissimi, chì erani in traccia di spariscia, ma chì u sensu n'era statu cunsirvatu. Trà i paroli urfaneddi è i paroli sputichi, ci era una grandi diffarenza di prezzu. Chì una parola sputica era cunsidarata una maraviglia. Qualcosa chì pudia fà rinviviscia una lingua di manera trimenti. Chì incù i prifissi è i suffissi, una parola sputica ni pudia fà deci paroli, o vinti, o ancu di più. Era par quissa chì l'Uffiziu di u Patrimoniu, s'eddu aia da cumprà una parola sputica in traccia di spariscia, a pudia cumprà sin'à deci millioni d'euroni. Cusì s'era intesu dì. Quandu eddu aia cunniscenza di l'esistenza di una parola sputica, l'Uffiziu di u Patrimoniu a publicava subitu, a facia cunnoscia è publicava dinò i paroli dirivati. Subitu subitu, a parola sputica divintava cunniscitu è imprudata. Tandu era di tutti. Era com'è una firita chì era curata, com'è un' organu mortu in u corpu di una parsona chì era rimpiazzatu subitu subitu da una parti sana è piena di saluta. I paroli sputichi pudiani dà a vita à una lingua in traccia di mora.

Orcam

2011-06-25T03:14:00.000-07:00

Una nuvella di
Zipura Meiran

A sà chì a truverà in ghjò. A guardava dapoi qualchì ghjornu. A mezu à a so faccia salvatica, i so ochji rubini fatti pà a caccia s’illumineghjenu sott’à l’aria di a serata. S’infilza musculitesu trà e lamaghje, da silinzià u passu. S’alzanu e so spalle, una appress’à l’altra, mentre chì a cullina a fala à currera. Quandu li sembra d’avè persu a so traccia, si pianta allunghendu u collu. E rialzendu u capu, à l’agguattu. Dopu ripighja a falera versu à a valle, cù e so arechjetti chì riagiscenu à u minimu chjuchjulime.

A so vìttima hè quì, davant’à ellu, à fiancu à u pozzu. Azziuneghja a tagliola, a tinta, prestu prestu, da ricullà a sechja carca à acqua fresca. Allergheghja u so rispiru, à manu à manu ch’ellu cresce u so sforzu. Ma un muscu salvaticu a pianta, interdetta. Vurria bè fighjà in daretu, ma eccu chì ellu l’hà dighjà chjappata, e sgrinfie piantate in u prufondu di a carne. Mancu u tempu di gridà, è a so mastucatoghja putente a macilleghja. Pò mantene u so corpu di vìttima, sin’à chì u so soffiu l’abbia lasciatu. E infine, li taglia u capu d’una lerta sgrinfiata. Lascia u cadàveru è si porta solu u capu incù ellu. Ci vole à ritirassi in un locu scantatu, pè intrapende a fasa più dilicata, chì à a so maestra li piace ch’ellu sia perfettu u craniu, senza più tracce di pella, di sangue è di capelli. A rombu di praticà, hè riesciutu à spillà i crani da biutalli in tuttu di a so sustanza. Ghjè un ghjocu sapiente, chì chere un arte finu di lingua è di granci, à tempu cù una certa lertezza zampesca. Dopu, ghjè solu una quistione di misura. Bisogna à sapè alternà spillera, licchera è aspirazione, ammaestrendu u so stintu di feroce carnivoru. Eppò varda u megliu pè a fine, chì aspirà pianu pianu a materia grisgia li dà un goiu allucinante è un sìntimu d’elevazione intensa. Issi mumenti di stralucidità u mutiveghjanu, à ellu, Orcam, pè tumbà à ritumbà, torna è torna.

Asia era a più crudele di e regine di a linea di i Turreani. Avia fattu avvelenà u so fratellu, u Rè, è rignava sola annant’à à città. I citadini campavanu sempre in a paura di raprisaglia, sopratuttu chì a vuciata parlava di una bestia feroce chì casticava in u reame. Parechji corpi eranu stati trovi dizuccati. L’inchiesta ufficiale dicia chì i cadàveri eranu quelli di l’upposti à u pudè, di i ribelli sbanditi o di i falsi prufeti. Ma un ghjornu u primu prete fù trà e vìttime. I dodeci piuvani chì furmavanu l’Academia filitusiana eranu ammirati è rispettati da u populu, ma ghjelusati è timuti da i membri di u Guvernu, tutti sughjettati à a so Maestà Asia. I piuvani eranu i vardiani di a cultura turreana è inghjunu era u primu in un arte precise cum’è a filusufia, a musica o ancu a magia. Tutti funu tombi ind’è circustanze similarie. Si truvava sempre i corpi, ma mai i zucchini... E poi e tumbere si piantonu d’un colpu, cusì prestu ch’elle avianu principiatu.

“Veni à mè, Orcam”, ella disse.

Li piacia à s’achjichjassi contr’à ellu è ciuttà e so mani in a so criniera, rispirendu à tempu u so muscu di salvaticume, è à ellu l’aggradìanu isse stonde duv’ella era solu pè ellu è duv’ella a si allungava à la volte a notte sana in u sigretu di a so tana. I crani di i dodeci preti ghjacianu nant’à terra cum’è trufei nant’à i quali Asia attardava u so sguardu.

“Ai servitu bè a to maestra. Dumane ferai a to entrata triunfale in a Corte, induve serai u mo Rè”.

“ Povera tonta dirazzata !”

Asia rinculò, urrificata :

“Ma... parli tu ?”

Mughjò un ultimu rughju chì sunnò u requiem di a so vita animale :

“Mi socu nutritu di l’intelligenza d’ogni cerbellu ch’aghju divuratu, è a mo cunniscenza ùn s’hè mai piantata di cresce à manu à manu ch’o tumbava. Cunnoscu a natura ìntima è hè vinuta l’ora pè te di pagà i to crimi. Ai cridutu squassà u sapè di u to populu, ma l’ai cuncentratu in una persona sola”.

Asia stindò a manu è pruvò à agguantà a so lancia. Orcam si ghjittò à ella è l’incalcò cù tuttu u so sapè fà di cacciadore, a farfinghjana pronta à lancià l’ultima attacca.

In un illanciu addisperatu, Asia briunò :

“Un figliolu ùn pò tumbà a so mamma !”.

Quandu Orcam passava a girata maiò di u stremu meridianu, avia francatu u puntu di voltu. L’avia lasciatu a vita salva. Eppò cumu una bestia purria guidà l’omi, cusì sapiente ch’ella sia ? I chjami addisperati d’Asia li venianu à l’arichji, mentre ch’ellu camminava trà i lamaghji ghjitatti à l’azardu in e pianure. Fece l’arretta à a cima di un roccu. Faccia à u mare, vidia à u luntanu l’elpali bianche di a fine di u mondu. A voce d’Asia s’avvicinava. Ùn ci saria statu bisognu ch’ellu si vultassi. Ma vulia vede u so visu un’ultima volta. U so visu di quessa a mamma criminale chì ùn avia pensatu pè ellu chì a pussibilità ch’ellu firmassi un monstru. Ciò ch’ellu visse, ùn u puteti suppurtà è firmò petrificatu pè u sempru in u granitu, u sguardu spartu trà a terra chì l’avia vistu ingrandà è un impussìbule altrò.

U catinu

2011-06-11T04:21:00.001-07:00

Una nuvella

d'Angélique Bazziconi

Era longhitirata. Induvinava un odore d’etere ; li paria di sente i rimori, e voce, ma ùn pudia nè move nè parlà, li paria d’avè persu a nuzione d’ogni cosa. Più pruvava à capì ciò chì si passava menu ci capià. Facia sforzi tamanti pè ricurdassi, ma ahù. Ùn si ricurdava di nunda : u ghjornu , a stagione o puru l’annata... Nunda ! U solu affare chì li girava in capu era un catinu ! Chì sunniacciu !

Maria era una bella donna di cinquanta quatr’anni, primurosa di a so apparenza. Avia i capelli negri è luccicanti, a pella bianca, era fine è suttile. Di caratteru era dolce eppo’ cusì brava. O cum’ell’era brava….
Stava in un magnificu appartamentu à dui piani in un quartieru burghese di a capitale. Ùn travagliava micca, i parenti l’avianu lasciatu abbastanza ricchezze pè pudè campà quattru vite senza fà nunda. Ùn avia nè figlioli, nè fratelli, nè surelle, nè cugini, a so sola famiglia era Agata, a surella di a so povera mamma.

Qualchi mese fà, zia Agata avia cumminciatu à perde appena u cerbellu. I duttori avianu cunsigliatu à Maria di piazzà a so zia in un stabilimentu duv’ella serebbe suvagnata, perchè oramai era sicuru chì sta povera vechja ùn pudia più stà sola.

À Maria l’avianu sempre stumacata ‘sse ghjente chì mettenu i soi indè e case di vechji. Zia Agata l’hà fatta vene à stà in casa incù ella. Si n’occupava cum’ellu c’iole.

A malatia d’alzheimer hè una malatiaccia mì ! Sta donna cusì intelligente è indipendente era vultata à u statu di un cininu senza alcuna nuzione di periculu è senza più manc’appena di ragiunamentu.
Maria assumava a so carica notte è ghjornu. ùn avia mancu un rimpientu. Era brava, è ciò ch’ella facia, a facia vulenteri è di core.
Cum’ell’era brava Maria…

Un ghjornu ch’ell’era surtita un’oretta à fà qualchi cumissione avia trovu, à u so ritornu, zia Agata in terra. Era cascata da a scala. Stava in terra besgia besgia. Ancassai ùn s’era micca fattu troppu male : una sgranfiatura nant'à u bracciu, ma pochi affari. Si pudia esse tomba in sta scalaccia.

Da tandu Maria ùn hè più surtita è hà fattu stallà un sistema pè bluccà tutte e finestre. Ùn si sà mai sè à Agata li venia l’idea di sbalancassi à una finestra ! Pè apre ci vulia à fà un codice di quattru numeri. Ùn era micca cumplicatu eppo’ cusì o mancu era tranquilla Maria.
Zia Agata era in securità. U so penseru maiò eranu e scale ma survegliava, notte è ghjornu.

Ùn surtia più, durmia pocu è pè fà e so cumissione s’era fatta mette un urdinatore di quelli.

Si facia livrà tuttu in casa, chì putenza ‘ssu internet quantunque.

Li ci hè vulsutu pocu tempu pè imparà a manighjà l’urdinatore.
Eranu avà parechje settimane ch’ella discutava ogni sera, nantu un situ di scontri, incù un omu di i so anni. Avianu parechji interessi cumuni, Maria era brava eppo’ dinù colta è s’omu paria d’esse lu dinù.

Ben intesa quandu Ghjuvan'Carlu hà prupostu di scuntrassi, Maria hà dettu innò ! Ùn pudia lascià a Zia sola mancu un minutu. Ancu sì e finestre eranu assigurate bè, c’era sta scalaccia è Zia Agata chì pisciava quant’è sette vulia falà pè andà in cabinettu à ogni minutu.

Maria avia a brama negra di scuntrà à Ghjuvan'Carlu è qualchì ghjornu dopu s’hè fatta livrà un catinu ch’ell’avia cumandatu nant’à internet. Si trova tuttu nant'à Internet !

O tanti penseri ch’ell’avia pè Agata sta brava Maria !

E finestre chjose è assigurate, a porta chjosa à chjave, u catinu postu in camera, ùn c’era più prublemi nè penseri à avè !

Zia Agata era in securità è pudia piscià quant’ella li paria.
Cusì, Maria, a brava Maria, pudia sorte, spenserata, à beie un caffè cù Ghjuvan’ Carlu.

Passendu à u caffè chì Maria avia sceltu vicinu pè pudè andà ci à pedi, s’hè fatta ringuarscià da una vitura ch’ellu cunducia un certu Ghjuvan' Carlu chì era pressatu di ghjugne à l’ora à u so appuntamentu. Infine hè ciò ch’ellu hà contu à i pulizzeri.

Bella sicura, pè via d’iss’accidente Ghjuvan' Carlu hè ghjuntu in ritardu à u caffè è à Maria ùn l’hà trova. D’altronde sò avà trè mesi passati ch’ùn hà più avutu nisuna nova d’ella.

Sempre ciotta ind’un prufondu comà, a memoria di Maria si disceta ogni tantu è d’un colpu a donna pare rassirenata ! Zia Agata hè in securità, chjosa in camera, incù u catinu, ùn li pò accade nunda… Cum’ell’hè brava Maria...

Rituali sanguinosu (6/6)

2011-05-31T04:21:00.001-07:00

Una nuvella di Marcu Biancarelli

Faccia à Waterbright, intrunatu in u so futtogliu, Egerton si dissignaia stranamenti in l’inquatratura di a finestra, u bughju di a faccia rinfurzatu da u contraghjornu. Frasturnatu, u ghjurnalistu ùn si pudia impidì d’appaghjà st’imagina à quissa di u strionu barbaru di a narrazioni.

I rivilazioni di Lord Egerton aviani pichjatu com’è una mazza annant’à u spiritu di u tintu ascultadori, è avali, avali pisaia ancu più forti st’interruzzioni di u discorsu, chì lacaia suttintenda una fini di i più infami, una verità chì Waterbright avaria prafiritu d’ùn cunnoscia mai.

Ma, in ‘ssu spoddu di i sicreti arcani, priculosi, s’era andatu troppu luntanu. Malgradu una ingoscia oramai impussibuli à duminà, u reporter buddia di sapè tuttu. Scelsi di cuntinivà ad avvicinà, à u più strettu di a so abuminazioni, i strazii è l’umiliazioni chì Lord Egerton avia duvutu suppurtà in l’infernu di Nova Ghinea.

– Lord Egerton… Mi videti cumossu… afflittu da a voscia svintura ! Avali seti quì è…

– Mi socu salvu, iè.

– Aghju troppu cumpassioni par pudevvi dumandà di chì manera… ‘Ssa spirienza, a capiscu… avariati bramatu d’ùn vìvala micca… È u vosciu amicu, Flaherty… Hè da veru l’affari u più bruttu ch’avissi ma’ intesu…

– S’hè salvu anch’iddu, Waterbright.

– Ooh ! Diu ! V’assicurgu ch’e ni socu sullaghjatu !

– Hà vistu a luci, com’è mè.

– … ? … Mi scusu… ùn aghju micca capitu bè…

– ‘Ssa pratica, u me caru, ‘ssu rituali porta un nomu. I scentifichi u chjamani a « subincisioni ». Cunsisti à taddà u viscaru in tuttu u so lungori. L’usu hè accirtatu in certi populi cunsidarati com’è arcaichi. Da l’Australia sin’à l’isuli ritirati di u Pacificu. Arcaichi ma vicini à u statu di natura, u statu primieri, saria forsa più ghjusta à dì. U statu chì l’omu ùn si hè ancu staccatu in tuttu da i misteri di a criazioni. È ch’iddu cunnosci sempri i violi piatti, i rituali chì permettini di ritruvà, d’entra in cumunioni cù i putenzi supiriori.

– Eti dittu bè… a luci ?

– U dulori hè insuppurtevuli, Waterbright. À u mumentu chì u magu vi mutilighja, passeti in una diminsioni chì vo ùn pudiati imaginà. Hè un attu à tempu simbolicu è esteticu, ma dinò rigrissivu, pà entra in a transa, è nicissariu, par ghjùnghjani à VEDA ciò ch’ùn si vidi, ciò ch’ùn si sà. A faccia di Kuddù, Waterbright, hè à ‘ssu prezzu quì. Kuddù l’Unniscenti, Kuddù a Surghjenti, u Vardianu di a Verità.

Waterbright misuraia tuttu l’aspettu malsanu di ‘ssu novu discorsu. Più chè ‘ssu sintimu di culpabilità chì l’agguantaia, par avè circu, cù a so curiosità morbida, di sbuscà una intimità ch’ùn l’appartinia micca, era st’imprissioni dispiacenti ch’una minaccia li bulaia avali in ghjiru chì u stuzzicaia à u più prufundu di l’essa. Lord Egerton, à a stunda pricisa ch’iddu evucaia u sensu di u rituali, paria di vulellu scunvincia di calcosa, d’ùn essa più a vittima di u racontu tirribuli ch’iddu avia cunfissatu, ma incarnaia guasgi unu spezia di missaghjeri in adurazioni, un prufetta malmindosu chì discrivia l’orrori u più assulutu cù u tonu di l’addilittera.

Waterbright affucaia. Era com’è sì a pezza indu discurriani s’era ridotta di colpu. U sguardu fissu è neru di Davidson u inziffaia com’è una lancia arruttata. Beckett li s’era avvicinatu, si n’avvidia solu avali, è u subranaia in sudori, com’è un scemu chì s’appronta à cascà annant’à l’ughjettu di u so disideriu. Di manera mecanica, u ghjurnalistu ghjirò u capu pà circà un sustegnu illusoriu, o par sapè à chì n’era l’ultimu prutagunistu, u sirvitori James, chì à mumenti vardaia a surtita di u salottu. Quiddu s’era piazzatu, senza fà u minimu rimori, ghjustu daretu à u so futtogliu. È ùn vidia più avali chè ‘ssi bracci putenti, capaci di truncalli u coddu.

In u mentri chì Davidson s’arrizzaia, com’è par alluntanassi da ‘ssa scena ch’ùn l’intarissaia più, Egerton ripresi :

– I salvatichi ani fattu di no i so paghjesi, Waterbright. Parchì l’omu chì sà devi inizià l’omu chì mireta di sapè. Hè una regula chì l’aduratori di Kuddù tramandani dipoi chì a Verità li fù palisata, in un tempu di sprufundu abbiettu chì a mimoria ùn hà micca vulsutu ritena. Dipoi chì u nosciu vechju Ordini Divinatoriu fù fundatu…

– L’Ordini Divinatoriu… iè… l’aviu sminticatu… n’emu parlatu à principiu…

– È eti ghjuratu, John Irwin. Eti ghjuratu, par prezzu di a me cunfissioni, di suvità i reguli, d’essa iniziatu ancu vo.

– Aghju ghjuratu ? … Aghju ghjuratu ma… ùn sapiu micca… i reguli… hè unu scherzu, nò ? Hè pà taruccà tuttu st’affari ? …

– Eti ghjuratu Waterbright, d’essa iniziatu, era a voscia vulintà, è ancu sì vo ùn avissiti ghjuratu, saria listessi. Unu chì sà a verità ùn pò vultà in daretu, ùn pò vultà à u bughju. È quissu chì hà vistu u sguardu di Kuddù devi accunsenta ad abbracciallu. Par sempri !

Waterbright feci pà arrizzassi, di stintu, com’è pà sciodda ‘ssa prissioni psiculogica chì u strangulaia, com’è pà rumpa infini ‘ssa macagna chì li dispiacia di più in più…

– Ah ! Ah ! Aghju guasgi marchjatu… Ma avali femula finita chì hà duratu abbastanza…

James li strinsi u coddu cù u so bracciu putenti, è u furzò à pusà, senza dilicatezza, in u fundu di u so futtogliu. Beckett s’allampò dinò è u chjappò à i vinochja, impidindulu di mova cù tuttu u so pesu.

Davidson, in u fundu di u salottu, apristi calmamenti una porta, è un parsunaghju impinsevuli cumparisti in a sala.

– Eti ghjuratu, cuntinivò Egerton, è l’ora hè vinuta di righjunghja a noscia cunfraterna, l’Ordini di Kuddù ! L’ora hè vinuta ancu par vo di cunnoscia u rituali, di duvintà u nosciu paru !

Waterbright circaia u rispiru pà supplicà, tardaviddaia certi parolli patetichi chì a strinta di James impidia d’escia da a cannedda martirizata. È i sudini di tarrori li misciaiani da partuttu mentri chì u nuvell’ affaccatu, tirrificanti, s’avvicinaia cù u so pugnali d’ussidiana.

– Vi prisentu u nosciu preti maiori, dissi Egerton. Vi prisentu u maestru chì vi hà da trasfurmà, amicu, è chì v’hà da fà cunnoscia i dilizia di l’iniziazioni, i sciali chì vi farani veda u chjarori di a verità, a faccia limpida di Kuddù. Vi prisentu, u me caru, à Samuel Flaherty !

L’omu chì l’era prisintatu ùn avia più nienti à veda cù u spluratori chì l’era statu discrittu, più nudda di u filantroppu chì porta u lumu di a civilizazioni à i salvatichi di i furesti bughji. Mossu un ghjornu pà caccià da u so abruttisicimentu i primitivi i più bistiali, avia scontru una verità altra, ed era u salvaticumu chì u s’avia rosu, è palisatu à una vucazioni, un distinu chì nimu avaria pussutu priveda. Era iddu, oramai, u strionu, u magu sceltu pà purtà a parolla di Kuddù. Nudu in cristu, si prisintaia davanti à u futuru iniziatu, carcu à scarificazioni, tattuasgi malefichi, tarzarulatu cù l’ossa d’animali ripugnanti chì li tafunaiani u nasu, l’arichji, i subracidda… Ma l’urnamentu u più schifizzosu di ‘ssu ritrattu scandalosu, senza cuntesta, era ‘ssu sessu à pindulionu, mutilatu, taddatu in dui, chì paria d’avè a so vita propia, chì baddaia suvitendu i muvimenti di u preti, chì baddaia com’è un’ idra vilanosa, un mostru duppiu chì dicia l’anima di u dimoniu chì u viniraia.

À u mumentu chì Flaherty li taddaia u cazzu, Waterbright crezzi chì u dulori interu di l’umanità si fussi cristaddizatu in u so estru. Lampò unu stridu buinu chì intrunò i mura di sta camara di i so turmenti. Tuttu si missi à vodda in ghjiru ad iddu, com’è purtatu da a risa scema di Davidson. Vissi a tencia spavintosa di u magu, u pugnali sanguinosu ch’iddu drizzaia com’è pà offralu à i divinità abissali, vissi u sguardu pussidutu d’Egerton, mentri ch’iddu si daghjia à un abbuccu di prigantuli frenetichi, vissi à Beckett, è u sirvitori chì u lintaiani, com’è suddisfatti d’un’ uparata ben fatta, cumpiita, arrigalata à l’accuncera sulenna di u sprufundu. Po’ vissi u sulaghju chì muvia, chì si facia unu spezia di fuddettu senza fini, è chì u purtaia cun iddu versu ‘ss’altra diminsioni, virtighjinosa, indu tuttu, è a verità piatta di u sensu di l’universu, è di a noscia prisenza quì, ci hè palisatu infini.

Rituali sanguinosu (5/6)

2011-05-26T01:16:00.000-07:00

Una nuvella di

Marcu Biancarelli

Un’ umbra passò nant’à a faccia d’Egerton, chì vinia di compia u so discorsu. I so ochja, assenti, pariani di riveda un passatu di tarrori grevu. Waterbright ùn sapia chì dì. S’avvidisti ch’iddu tinia sempri un bichjeri avali biotu, è li simbraia chì st’ughjettu senza intaressu vinia di matirializassi à a siconda, in u mentri ch’iddu vultaia à u riali.

Beckett è Davidson erani sempri à a stessa piazza chè nanzi. U prima ùn pudia ritena un trimuleddu bizarru, com’è ch’iddu fussi statu intrunatu bè da u racontu. U sicondu, cuffatu in u so futtogliu, pussidia sempri ‘ssu sguardu neru è fissu di pridatori. Un etimu, Waterbright crezzi ancu di vedalu saltà da u futtogliu, disidarosu di chjappallu à a cannedda. Ma ùn era ben intesa chè una vista di u spiritu, influinzata da i parolli incridibuli di Lord Egerton.

È James, u sirvitori, sticchitu com’è un palu, è d’un flegmu sulennu, ùn pudia essa quì pà vardà a sciuta di u salottu. Quissa dinò era un’ imprissioni falsa nata da l’ambienti pisivu di u racontu.

Waterbright, trubbulatu à più pudè, pruvò quantunca di rumpa ‘ssu silenziu chì u lacaia di brama.

– Hè tirribuli, Lord Egerton… Mancu pudiu imaginà chì…

– Chì i rivilazioni ch’e vi pudiu fà erani cussì alluntanati da a visioni rumantica chì i ghjurnalisti si poni fà di i spluratori ? Chì i visioni pazzi di u vechju Rousseau annant’à u salvaticu bravu è bonu ùn valini un ficu ? Nò, Waterbright, ùn pudiati imaginà… ùn pudiati imaginà l’orrori chì dormi à u cori di i selvi luntani… ùn pudiati imaginà ciò chì ghjaci in l’anima crudeli di certi pupulazioni arrierati…

– Ma, vo, seti vultatu ! Seti riisciutu à scappà postu chì vo mi pudeti cuntà ‘ssi fatti… circu a parolla pà qualificalli… ‘ssi fatti…

– Ghjustappuntu, amicu, ‘ssi fatti sò indicibuli, impinsevuli ! È puri, l’abuminazioni ch’e vi ramentu sò successi… sò successi da veru !

– Collins, divuratu… com’è un insettu… una barabatula senza cuscenza… È vo, Lord Egerton, comu eti fattu à sòrtani ? È Flaherty… ùn mi diti micca ciò ch’iddu duvintò…

– Certu, John Irwin, manca calcosa à u me racontu. È vo seti quì, imprissiunatu è a capiscu, ma impacenti di sapenni di più, è quissa a capiscu dinò. Allora steti à senta, parchì ghjunghjimu à a fini di ‘ssa stodia, è ben chì u cori mi manchi par compia ‘ssa rilazioni, vi devu a caduta di ‘ssa tragidia…

* *

Com’iddu l’avia annunciata Flaherty, i guerrieri kukukukù ùn trigoni micca à furzà a porta di a noscia casetta. Dicu furzà parchì, disidarosi di ritardà u nosciu suppliziu u più pussibuli, è ben chè intravati com’è l’aghju discritta, aviamu fattu rutulà un muzziconu, unu spezia di troppulu ch’ùn voddu mancu induvinà à chì avia pussutu serva, aviamu fattu rutulà, dunca, ‘ssu muzziconu, sin’à l’intrata, è cussì prutighjiamu, appughjendu à a malavia annant’à ‘ssu pezzu di legnu, l’apartura di u nosciu agrottu.

Ma a noscia risistenza ùn pudia essa chè vana. Collins ùn era ancu tuttu inguttitu da i vituparati chì l’assaltu fù datu à a noscia prighjoni. I salvatichi bucaiani à parichji, è no circaiamu di tena u più chì no pudiamu, denduci curaghju cù a boci, circhendu in una rabbia furiosa l’ultima energia nicissaria pà affruntà i nosci numici. Par disgrazia, a prissioni di l’indigenii era tali chì no vensimu à ceda. A noscia furturezza fù invadita di colpu. I cintunari di mani ci chjapponi, ci tironi fora malgradu i calci addispirati è i capati chì no riiscìamu à lampà, dicisi à venda a noscia carri u prezzu ch’idda miritaia. È dunca, à capu di ‘ssa lutta furmidevuli indu brusgestimu a possu dì tuttu ciò chì ci firmaia di forzi, fuimu infini fora da a casetta, stracquati in tarra à mezu à quiddi semiprimati chì briunaiani d’eccitazioni quant’è mai. Ci appruntaiamu à a fini, Waterbright, ci appruntaiamu à ‘ssa missa à morti ch’ùn ci pudia oramai chè libarà. È mentri chì u strionu avanzaia in a noscia dirizzioni, cù u so passu particulari di rittili à l’agguattu, ci parsi di passà in un’ altra diminsioni, trà quì è l’al dilà. Sicuri di riceva ‘ssu colpu di grazia ch’ùn vinia più.

Successi calcosa d’impinsevuli è d’inaspittatu in tuttu. Di colpu a barabagna di i nosci assidianti si feci più allegra. I facciacci suzzi di i musginati si ricupristini d’un surrisu incumpriinsibuli. È fuimu ridrizzati l’unu è l’altru annant’à i nosci peda, basgiati è abbracciati da unu stolu d’essari disgustanti chì avali pariani d’essa duvintati tutti i nosci amici ! ‘Ssi mattaghjati ridiani, Waterbright, scaccanaiani com’è davanti à u spittaculu u più piacevuli, u più divirtenti ch’iddu si poschi prupona. Ci amasgiulaiani da veru, è ùn sapiu parchì, è ci cupriani di carezzi affittuosi com’è sì no eramu stati vechji parenti vulsuti bè di ritornu in casa soia… U strionu iddu stessu ci libarò da i nosci travi, è si missi à stringhjaci contr’à u so pettu cù un amori dispiazzatu. Ùn ci capiu più nudda, è mi diciu trà mè stessu chì st’accolta nova è filici ùn pudia raprisintà chè unu scherzu ultimu nanzi chì l’infernu si scatinessi. Lampendu unu sguardu à Flaherty, poti misurà ch’ùn paria sullaghjatu manch’iddu. È postu ch’e viniu d’intarrugallu cù u sguardu, u me cumpagnu pruvò una spiigazioni.

– L’emu risistutu, Egerton. Ani vistu a noscia forza di carattaru è ‘ssi discimpiati devini ludà u curaghju, un valori ottimu di a so cultura guerriera. Collins hà musciatu a so paura è n’hè mortu. Avali ci facini a festa, è ci permettini d’intigrà a so tribù. Ci cunsidarighjani com’è i so pari, i novi membri di u so populu… omini com’è iddi, s’e possu dì.

I paisani ci lacaiani cunvirsà, senza più nè intimizioni nè brutalità. À u cuntrariu s’avvicinaiani cù i prisenti d’ugni genaru, piumi di tutti i culori, peruli d’acqua dulci, braceddi di scadda… Dopu à i passati viulenti di nanzi, era com’è u nosciu trionfu ch’era fistighjatu. Un cambiamentu di situazioni incridibuli ch’ùn parviniu mancu à rializà.

– Ma, Flaherty, semu salvi… Tutti sti prisenti, sti liccaturi… S’iddi ci piddani avali pà omini com’è iddi, hè puttostu bon signu, nò ???

– Ùn la so, dissi Flaherty cù una inchiitudina ch’iddu ùn pudia sempri micca cuntena. In ‘ssi tribù, par essa un omu… ci voli à siguità un’ iniziazioni… Temu l’iniziazioni ch’iddi ci approntani, Egerton… Par essa sinceri, temu chì u peghju ci aspittessi avali !

Flaherty vinia ghjustu di furmulà ‘ssi dubbiti chì u strionu lampò torra un ordini chì rumpia più o menu cù i frappuli chì i salvatichi viniani di pòrghjaci. Di colpu a folla di i guerrieri in ghjiru à no, senza gattivezza, ma cù una insitanza evidenti, si missi à ristringhjasi in ghjiru à no, guasgi à attuffacci. A folla si missi in muvimentu, unu spezia di flussu lentu è ineluttabili chì ci purtaia malgradu a noscia vulintà, è ch’era ritmatu da certi canti chì pariani ughjuleri di gurigli pisati. I tamburi, muti dipoi un beddu pezzu, s’erani rimissi à risunà in tuttu u paesu.

Fuimu bucati in dirizzioni d’una casa alta, cù un tettu di padda chì paria di tuccà u celi. Pinseti subitu à u tempiu di ‘ssi furdani. Senza chì no ci pudissimu sciodda da a prissioni di a noscia scorta, ci truvetimu guasgi subitu in u tempiu. I dicini di guerrieri armati è mascarati ci aspittaiani dighjà, dicisi à impidiscia a minima prova di fughjera. U strionu ci avia dinò priciduti, è vinia d’impustassi, sulennu, i bracci pisati com’è in calchì prighera pagana, faccia à u totem di u so populu : un troncu scultatu, altu è largu, chì cuddaia sin’à u sulaghjolu di quissa casa cultuali, è un totem chì… iè… chì raprisintaia un cazzu, Waterbright ! Iè, eti intesu bè, l’idulu di ‘ssi prasciti era un cazzu ! Ma un cazzu tirrificanti, smizatu in tuttu u so lungori, spaccatu da a basa guasgi sin’à a punta, una punta sporca chì paria un anneddu tamantu è chì riliaia i dui parti spiccati di ‘ssu diu vargugnosu !

In u so sabiru di scimia, u magu s’adrizzaia à u totem tontu, è u chjamaia « Kuddù », vucabili chì l’assistenza ripresi com’è un omu solu, cù un fervori ripittitivu chì ci ghjacia u sangu. Po u preti ereticu si ghjirò di colpu, è, in un brionu istericu chì ripiddaia l’appellazioni malmindosa di a so divinità, musciò di ditu à Flaherty, è senza dubbitu pussibuli vinia di disignallu pà l’iniziazioni barbara chì ni faria… un omu com’è l’altri !

Flaherty fù strascinatu à u pe’ di u totem, mughjendu com’è un dannatu, mentri chì, dinò una volta, i bracci d’acciaghju di i me vardiani m’impidiani di mova, è d’intarvena pà succorralu sì ‘ssu curaghju quì era statu imaginevuli. Ma in fatti, Waterbright, è a ricunnoscu cù tamanta vargugna, eru incapaci in tuttu di pinsà à quissa pussibilità, è inveci firmaiu quì, stantaratu, à assista à u rituali schifizzosu, è sintiu u me amicu chì, in darru, mi mittia in vardia.

– Un’ iniziazioni, Egerton ! Una prova scema, una mutilazioni in l’onori di a so divinità malmindosa ! Fughjiti Egerton ! Fughjiti pà l’amor di Diu !

Liatu pedi è mani, Flaherty fù snudatu faccia à u Diu Kuddù. Resu à u so primu statu, tali ch’iddu era à u ghjornu di a so nascita. Un essaru verghjini prontu à essa mudificatu, prontu à passà a prova subrana nanzi d’intigrà u chjirchju di l’omini, u chjirchju di i guerrieri… Tinutu annant’à una petra di u sacrifiziu da l’aduratori spietati di Kuddù, Flaherty, u spluratori cussì rinumatu chì avia affruntatu tanti piriculi, chì avia subranatu a numicizia di i tarri scunnisciuti quant’è di i tribù i più rostici, Flaherty vidia avali, trimulenti ch’iddu era, in sudori, vidia u strionu chì s’avvicinaia è chì stringhjia, allucitatu, u so rasoghju d’ussidiana. Quiddu li presi u viscaru, è cù un gestu sicuru di maciddaru frettu, ziffò u strumentu criminali in u membru moddu, è u smizò da a basa sin’à u pumpò !

M’invengu di u sangu chì schizzaia à fiumu… M’invengu di u moghju pateticu di Flaherty, chì bruddicaia com’è un varmu trapanatu annant’à u troppu di petra… M’invengu di l’ughjuleri pazzi di l’indigenii, chì cantaiani u nomu maleficu di u so diu sanguinariu… È chì u duviani ringrazià pà ‘ssa nascita nova, st’affaccata filici d’un guerrieru di valori, d’un omu avali fattu…

È m’invengu di st’ultimu traghjettu chì mi purtaia, di ‘ssa funi chì mi tiraia sin’à a petra di a me mutazioni. M’invengu, com’è in calchì sonniu fumicosu, di ‘ssu dulori vivaci, di ‘ssa mursicatura acuta nanzi di vena menu, in un brionu abuminevuli di suffrenza, è chì facia di mè, oramai, un novu sirvitori fidu di Kuddù…

Rituali sanguinosu (4/6)

2011-05-17T10:46:00.001-07:00

Una nuvella di

Marcu Biancarelli

Quì, incagnati in ‘ssa casetta è intravati com’è animali, emu assistutu à l’impinsevuli, Waterbright. C’erani parichji inziffichi in i mura è pudiamu scedda ciò chì si passaia fora. Ben chì di pinsacci mi si drizza sempri u setanu, vi faraghju ‘ssa discrizzioni abuminevuli di ciò ch’idda fù a fini tragica di preti Collins.

Di u purtadori, ùn firmaiani ghjà chè pezzi di carri chì i salvatichi aviani missu à cocia in un pignattonu. Aviani appruntatu una fucara è missu a pignatta annantu. Una pappù femina facia vodda un bozzacu in u mentri chì i so cunginieri lampaiani i pezzi di u purtadori in u brodu. Vidistimu cussì un bracciu, i fitti di i cosci, u capu smizatu in dui, spariscia in ‘ssa suppa vischjosa. In tantu in tantu, a cucinara facia cuddà u cuchjaronu sin’à a so bucca sdintata, è tastaia cù un’ aria suddisfatta u mischiu intardittu.

Collins, dunca, era liatu à un pilastru, à mezu à a piazza di u paisolu, è faccia à a pignatta ch’aghju discrittu. Sutt’à l’ordini di u strionu, parichji guerrieri s’incaricaiani di falli pagà – pensu – a dibbulezza musciata. Primamenti, un Kukukukù mustruosu li taddò i dui tittuli cù u so pugnali di petra, po i si sciaccò crudi, cussì, appena taddati, mentri chì Collins raghjia com’ì vo a vi pudeti imaginà. U tintu ùn era chè à cummenciu. Fù privu ghjustu dopu, è senza dilicatezza, di a so tusa originali di missiunariu, u boia chì s’affaccindaia à staccà u coghju da u capu mittindu tuttu u so talentu à taddà sutt’à u chjirchju di i capiddi, prima di tirà tuttu d’un colpu pà lacà cumpariscia, à nudu, l’ossu di a chjeccula di u disgraziatu. Cù petri d’ussidiana chì pariani rasoghja, d’altri assidianti si chjimponi à u santu martiru, à chì taddendu à l’impruvista un pezzu di grassu di u corpu, à chì sighendu cù minuzia ciò chì avia cumpostu l’anziana virilità – certu inutili – di u curciu preti. Ma peghju chè tuttu, Waterbright, peghju chè u fattu d’avessi manghjatu vivu u nosciu cumpagnu di disgrazia, i primitivi u imbutraiani cù a so propia carri ! U furzaiani à manghjassi da par iddu !

Dopu à du’ o trè ori di ‘ssu trattamentu indegnu, Collins era sempri vivu, liatu à u so pilastru d’infamia, ma ùn tinia più rittu chè par via di i funi chì u stringhjiani à u burdinali. U so corpu, for di u capu inumanu cù i so firiti crudeli, for di u troncu da induva pindiani i minucci è battiani sempri l’urgani vitali, u so corpu marturiatu era dighjà duvintatu unu schelatru di i più oridi.

U colpu finali li fù porsu da u spezia di magu chì sirvia di sapienti à ‘ssu populu di maunati. U v’aghju ghjà discrittu più in sù. À a fini di i so strazii, è in u mentri chì u poru Collins paria oramai in un’ altra diminsioni, senza più l’energia di pienghja o di ribradissi d’alcun manera, u strionu infettu s’avvicinò è, tuttu fighjulendu u preti in i so ochja lacciarati, intristi una mani viziosa, indu i dita erani prulungati d’ugni longhi è pinzuti è disgustanti, intristi ‘ssa mani, micca d’omu, ma di rapaci s’e possu dì, in a panza scurticata di u supplificatu. Quì drintu, chjappò calcosa ch’iddu atturcinaia cù una gudera evidenti di discimpiatu. Collins briunaia com’è un persu. È persu era, d’altrondi, à tempu à a so anima, credu, chì u shaman vinia d’imprighjunà in i so artigli di pridaghju. Cacciò di colpu a so mani, quiddu, è ritirò di u corpu marturiatu u fegatu caldu chì li sanguinaia longu à u bracciu. U capu di Collins, stavolta quì, s’abassò difinitivamenti. A so agunia era compia.

U magu, Waterbright, è quissa faccia à i so ghjenti chì pariani più chè mai in una transa cullittiva di i più scemi, sciaccò un morsu ingurdu à ‘ssu fegatu chì era bè a sola cosa chì bruddicaia sempri di u tintu Collins. À ugni mursicata bistiali ch’iddu daghjia, l’indigenii mughjaiani com’è dannati, è lampaiani i so lanci versu u celi, è dinò i so pioli di petra, è tuttu ciò ch’iddi pussidiani d’armi rostici chì diciani u so stintu guerrieru quant’è a so arrierazioni assuluta.

Funi i donni à lampassi com’è un’ appiata annant’à ciò chì firmaia di carri è d’ossa liati à u pilastru. Intazzaiani, mittiani in pezzi, truncaiani l’ossa à quel versu, è in u mentri chì no assistiamu – liati a vi ramentu – à ‘ssa spiddera scimita di u nosciu amicu, in u mentri chì no vidiamu da a noscia casetta i pezzi di Collins parta ad unu ad unu versu a pignatta indu buddia quiddu brodu schifizzosu, chì forsa duvia essa ancu par no un ultimu sughjornu, Flaherty truvò a forza di subranà u so addisperu. Vultendusi versu mè, chì eru quì à fighjulà, tarrurizatu, a missa a morti abbietta di u preti, è a so minuzzera abuminevuli, mi dissi stringhjindu i canteghji :

– Quandu avarani finitu, è ch’iddi varcarani ‘ssu zuddu, da quì à pocu, battitivi Egerton ! Battitivi cù i denta s’iddu ci voli ! Cù u capu è i voiti o cù tuttu ciò chì vi pudarà serva pà imbuffalli i so facciacci di scimii… Ma feti di manera à falli pagà caru, è rigrittà, u so ripastu di mattaghjati !

Rituali Sanguinosu (3/6)

2011-05-11T03:10:00.000-07:00

Una nuvella di

Marcu Biancarelli

III

Chjamaiani dunca kampung u so paesu. Ma paesu… Caccetivi subitu da u capu tutti i raprisintazioni archititturali ch’idda v’hà imparatu a civilizazioni, Waterbright, chì l’aggruppamentu di casetti di ‘ssi stripusgi tinia più da a chjostra, u purcili, chè da un locu d’abitazioni degnu d’essari umani. Quandu ci vissini affaccà, no è i salvatichi chì ci bucaiani cù firucità, i paisani – i chjamaremu cussì – vensini subitu à u nosciu riscontru briunendu è saltichjendu com’è buffona. U spittaculu d’isteria chì c’era tandu prupostu era à a limita di ciò ch’un omu pò suppurtà. À chì minacciaia di ziffacci una lancia di petra in u cori, à chì ci esibaia senza vargugna unu stucciu pinianu di i più gruteschi. Ancu i donni s’avvicinaiani, sia pà palpulacci è arrendasi contu ch’ùn eramu dimonia, sia pà sgranfiacci senza ritinuta è dimustracci tuttu l’odiu chì ‘ssu pupulacciu risintia par no. Eramu in manu à i tonti, Waterbright, prighjuneri di i sioni i più arritardati, i più bestii, ma dinò i più crudeli ch’iddu si poschi imaginà.

Infini fuimu strascinati à u cori di u paesu, nant’à una piazzetta di tarra pista invadita da cintunari di salvatichi scimatuliti. Ci vulia po’ à vedali… baviaiani di rabbia, o d’invidia pinsendu à u ripastu chì l’aspittaia, è più andaghjia è menu u chjirchju di a folla si pudia cuntena di stringhjaci, pizzicacci i cosci è i petti com’è par tastà quantu no eramu pretti, o ancu licacci cù certi lingui puzzinosi imbuffati da a fami è u disideriu. A scimizia di carri umana, d’assassiniu gratisi, era talmenti forti inghjiru à no chì i mantacati si missini à liticassi tr’è iddi – forsa in disaccordu quant’è pà i pezzi à spàrtasi. Buloni i primi cazzotti, i mazzi di petra si pisoni è trunconi i spaddi è i cavichji à dritta è à manca ! L’indigenii, o caru, si battiani avali cù frenesia, in un cattamuzzu pazzu induva i più debbuli s’abbassaiani di nasu in a pulvariccia, trapassati forsa cù un’ ultima visioni di prisuttu gustosu o di custiglietta di biancu… Eramu in infernu, è prestu ci tuccaria à asciuvà tantu l’ira chè l’ingurdizia di ‘ssi malasciamè !

Un brionu putenti è annarbatu ribumbò da l’orlu di a piazzetta, è di colpu u chjirchju di i luttadori si sciolsi com’è d’incantu. A frenesia vinia di lacà a piazza à unu spezia di burbuddu generali, è un curridori s’apria à modu naturali trà i paisani chì pariani oramai intimiditi. In un silenziu grevu, un passaghju s’apristi in a folla, è un parsunaghju inchiitanti s’avvicinò. Era un indigeniu più maiori chè l’altri, chì purtaia certi piumi d’aceddu inditarminatu pà piattà i so parti intimi, è una mascara di tarra russa tirrificanti chì li daghjia l’aspettu d’unu strionu fantasticu. D’altrondi, à a manera ch’iddu suminaia u tarrori frà l’indigenii nienti chè à musciassi, capistimu ch’iddu era bè u magu subranu di ‘ssu populu.

Ghjunsi davanti à no, è ci fighjulò ad unu ad unu. Fighjulà s’e’ possu dì, chì a sola cosa ch’e vidiu di a so facciaccia erani i so ochji sanguinosi chì dui tafona tonduli di a mascara mi lacaiani traveda, cù tutta a scimizia è a barbaria ch’e’ pudiu leghja in quissu sguardu. Passò prima davanti à Flaherty, avvicinendu u capu sin’à tuccallu, è com’è s’iddu circaia di muscà, com’è un falu criminali, a paura di a so preda. Flaherty, imprissiunanti, ùn lacaia nienti traspirà da a so anima afflitta. Forsa dillusu, u mostru pruvò cun mecu. Calendu u capu, faciu l’impussibuli par cuntenami, è suvità l’andatura degna di u me cumpagnu spluratori. Ma a vi possu palisà, caru amicu, à ‘ssu mumentu pricisu u me cori battia guasgi à rumpasi, è timiu chì u culpadori ricivissi i vibrazioni nucivi chì dinnunciariani a me dibbulezza. U miraculu successi puri, è u capu di i primitivi s’alluntanò.

Firmò pocu davanti à u nosciu ultimu purtadori. Quiddu era troppu spavichjatu par pudessi cuntena. Trimulaia da capu à peda, è i lacrimi di paura misciaiani longu à a so faccia. U magu, chì duvia ricunnoscia un Motù è dissi cù spirienza ch’iddu s’agia quì di robba bona pà i so ghjenti, palpulò cù i dita a sciugna di i cosci è di i braccia di u purtadori. U tintacciu paria d’essa frisgiatu da una sarpi vilanosa. À ugni palpulera, si sutrinnaia cù una ingoscia ch’iddu ùn pudia ritena. U capu di i salvatichi lampò tandu un brionu, unu spezia d’ordini, in a so lingua preumana è schifizzosa, è dui guerrieri vensini à chjappà u disgraziatu pà strascinallu versu u locu di a so missa à morti. U vidistimu spariscia trà a turba scimiesca, è sintistimu i so ultimi moghja d’addisperu, mentri ch’iddu si facia sguzzà luntan’ da a noscia vista.

Infini u strionu si missi davanti à preti Collins, ripittindu cun iddu u so ghjocu bistiali di l’annasera è di i palpuleri. Collins era tarrurizatu, è trà mè stessu mi mittiu à prigà chì u sant’omu ùn si lachessi distabilizà. Ch’iddu ùn musciessi nudda di u so siscu. Ma u culpadori ni vensi à tuccà u crucifissu chì u tintu missiunariu tinia liatu à u coddu. Presu d’isteria, è com’è ch’iddu ricunniscia quì l’ughjettu u più numicu di u so paganismu zotticu, u barbaru strappò u cuddari sacru, è si missi à briunà di rabbia. N’era troppu pà Collins, chì sbuttò à pienghja com’è un ziteddu, è chì, peghju infamia pussibuli in ‘ssu mumentu indu tuttu si ghjucaia par iddu, ùn si poti tena di pisciassi addossu.

Mentri chì i guerrieri u tiraiani à u so turnu versu u pilastru di u so suppliziu, u puvarettu di Collins ghjanghjulaia com’è una fiminedda, lintaia di ‘ssi picculi stridi purcini chì ci ghjaccioni u sangu. Ghje’ è Flaherty, liati com’è becca, finistimu in una casetta puzzica, fatta di tarra è di padda troscia. Forsa missi da cantu, in riserva pà un prossimu pranzu vargugnosu.

L’Anticariu in u Borgu

2011-05-09T14:00:00.000-07:00

Una nuvella di Marceddu Jureczek

à Jorge Luis Borges

Forsa mai avareti fattu casu à quidda buttega, par cantu di stretta, à u par di terra di un palazzu qualunqua, in u Borgu d’Aiacciu. Forsa ùn vi sarà vinuta mai in cori d’arreghjavi di punta à a vitrina bughjicosa è, traversu u vetru bruttu, di abbadà i miraculi di baterchji pulvarosi chì impachjani u sguardu. Forsa ùn vi sarà ghjunta di francà quiddu zogliu strettu di u vechju anticariu scurdatu, inavvistu da tutti. Certi lochi, basta pocu da induvinà chì a storia soia hè longa è carca à passati strasurdinarii, à quandu ghjacondi, à quandu spiumbati. T’ani com’è razza di una parsunalità, sò vivi puri ‘ssendu tralasciati. Turrenduci, vi si pari à veru d’essa in casa à calchì divinità strana ed istrosa, chì saristi megliu à cunfaciasi cun edda, l’ansciu u vi tiniti in pettu da ùn dà da fà à nimu, da ùn rompa u silenziu, da ùn tarnalà i lari custodii. Drentu à quì, u tempu s’allena, vogli è scunvogli, i porti di a cuscenza, da in cantaroni ch’eddi sò in u cutidianu, si sbalangani, viditi tuttu, capiti tuttu, pudariati ancu, s’edda paria à vo, tuccà di ditu u misteru di l’universu, à Diu…

Tandu l’aghju vista, a buttega di l’anticariu. Infini, dicu cusì chì altru ùn sapariu dì.

In Borgu, c’eru praticu assai, criditi puri, ci sò natu. Quantu volti l’aghju avvintu, da l’alba à l’abrucata u carrughju. Anticariu quì, ùn ci n’hè statu mai. Ma l’aghju saputa dopu, a buttega, primurava pocu ch’edda fussi quinci o culandi, postu ch’edd’ùn si duvia truvà indocu. À li volti, sò i lochi i più cunnisciuti, i più intimi, chì vi poni stupiscia.

Indrentu nimu. Aviu chjamatu, aviu bucialatu, nisciuna risposta. À vedala da fora, paria chjuca a buttega, inveci chì u spaziu internu era sprapusitatu. Si pirdia u sguardu in un labirintu di parastaghji colmi à libri di tutti i maneri, chjuchi, grandi, spessi, fini. In ogni catagni, casci è cascetti, cartoni è ughjetti inguttupati di carta, com’è s’eddi aspittessini d’essa tramutati in altrò da quì à pocu.

Mi sò avvicinatu da u parastaghju u più à vicinu. Da sempri mi piacini i libri, moltu più i vechji cù quiddu adori piccanti di carta incastulata. Nantu à i vulumi, a pula facia com’è un mantu grisgicciu. Da quantu tempu ùn erani stati tocchi quiddi libri ?

A cuprendula di u prima ch’aguantò ùn mintuvava nè titulu, nè autori. Apartulu aghju lettu una paghjina scelta à l’isbaragliu :

« Indiaremu issa leva d’omini à a fundazioni di un pattu suciali novu, à l’amori di i nosci pari, quali voglia fussi a peddi o a fedi soia, è ad abulì a guerra. Ci pisaremu contru ad ogni tirannia, in terra d’America, o in altrò in u mondu dundi omini è donni sò ghjimbati par via di l’uppressioni. In issu ghjornu, pruclamemu chì a forza parti di u nosciu travagliu ùn hè ancora compiu è chì ci tuccarà curaghju è forza da fanni di di più… »

- Discorsu di l’invistitura, sicondu mandatu, scrittu da John Fitzgerald Kennedy. Avia dittu a boci daretu è mè. Ogni tantu m’accadi di rileghjalu, mi piaci assai.

Figureti vi à vo, Kennedy. Siccomu ùn a sapiu eiu chì l’avia tombu quiddu cannatu d’Oswald in Dallas. Ùn l’hà mai pussutu scriva issu discorsu postu chì sicondu mandatu ùn ci ni fù…

- Asatamenti. Avia parlatu un arcifalu d’omu, vechju, largu di spaddera, scafiulatu, u barbazali biancu à mezu pettu.

Chì libru mi stà tandu ? Razza di ucrunia, di scenza finzioni ?

- Innò. Di storia ? Dissi eddu calmu calmu.

Basta cusì, vi ni riditi di mè. Di regula mi piacini i tarocchi ma quissu…

- U tempu o amicu, si tratta di u tempu. Un’affari mal’capiscitoghju di fatti. Ci pari ch’eddu andessi drittu drittu, senza mai arreghjani, mai avvigna, mai inciampà. Inveci, unicu, u tempu, ùn hè, o piuttostu, i rialità poni essa parechji. Quidda ch’è vo cunnisciti, ch’e vo viditi è sparminteti, ùn hè micca a sola ad essa. Ma v’imbufaliscu cù tutti quanti i me cunsiderazioni sopra à i dimensioni spaziutimpurali…

Sangu la miseria.

- Micca ghjastemi in casa meia amicu caru. Sò di spiritu libarali assai, ma s’eddu ci hè propiu calcosa ch’e ùn possu pata, sò i ghjastemi. « Chì tutti i ghjastemi turressini pustemi » dicia un gran pueta di i vosci, ùn hè ?

Quì u fiatu mi vinia pocu.

- Cusì vi piacini i libri ? Tiniti, un asemplariu più cà schersu di Bram Stoker, “Dracula’s return”. Magnificu.

Stoker l’aghju lettu facci un pizzettu aghjà è l’hà mai scrittu issu libru ch’è vo ditti.

- Abbò ? Fà chì…

Abbò un corru !

- Ùn vi incaldamenti cusì è lagheti stà u curnutu ind’eddu hè pà piaceri. S’edda vi gherba di di più a litteratura rilighjosa, eccu un libru scrittu da un ghjuvanottu astutu è ribradutu, “u Vangelu di Ghjesù”, un antru, una maraviglia à possu dì chì u sughjettu l’ammaistreghju, hè iss’opara di Borges “La bibliografìa de Dios”, o tandu hè a pulitica chì vi cunfaci, eccu à Ernesto Guevara “l’omu novu è i cateni di l’alienazioni”. Seti un omu distintu, si vedi subitu, viniti à rimirà in fondu di buttega un quatru splendidu di Van Gogh “Les fleurs et le fermier” o u capid’opara di Bocklin « A Rinnascita ». Vecu à a voscia faccia chì ùn seti micca scunvintu. Podarsi a musica, un dischettu di Jimmy Morrison « Lessons of Chaos » ?

Indù semu quì ?

- Forsa chì calchì spiicazioni a vi devu dà. Ùn hè ? Allora asculteti, vi parlaraghju di l’opari, di l’uparati chì asistini prima di l’artisti. A statula hè quì aghjà in a sciappa di u marmaru nanzi chì u scultori zucchessi a materia di marteddu è di tagliolu. U so travagliu hè di libarà l’opara chì era in aspettu di vena à luci di mondu. U puema hè eternu è u pueta i versi i coglia par aria. Listessa pà a pittura, u rumanzu, infini, m’aveti capitu n’hè ? Quì, da arrispondavvi, saria u locu indù s’accantani l’opari, i travagli tutti quanti ancu ad essa stati rivilati, fatti da quiddi chì ùn l’ani pinsi ancora o tandu chì ùn l’hè stata cuncessa di compialli par bè… Canzoni, quatri, sculturi, puema, rumanzi, assaghji, storii, eccu li quì, opari magni è da finiscia, trattendu di spirenza. Vi possu prupona ancu unu rumanzu umuristicu chì Dostoievski l’avaria scrittu s’eddu ùn era statu cusì acciaccatu.

Aghju capitu. Ma chì facini quì tutti issi cosi ?

- Quissa po a dumanda ! Indù vuleti ch’eddi fussini, quì o in altrò intantu ùn hè listessa ?

Iè, ma…

- Ma mi rumpiti i stacchi cù a voscia incredulità. Da chì fatti cumpagni ùn pudariani accada in issu mondu ? Eppo, altru cà travaglià quì, eiu ùn facciu. Dogu una spulvarata di quandu in quandu, ricevu un cartonu è l’allocu in calchì catagnu fendu casu ad ùn fammi cascà nienti nantu à u nasu è aspettu ch’eddi ghjugnissini parsoni com’è vo ad aiutammi.

Aiutavvi à chì fà ?

- Sò pà parta in un locu chì spirenzi n’ani bisognu quant’è quì. Ma a buttega ùn la possu chjuda. Dunqua m’aveti da tacchià quand’e saraghju par viaghju.

Hè bedd’è bonu, ma travagliu n’aghju unu aghjà è s’hè ùn mi spicciu micca d’altrondi, m’aghju da fà surracà da…

- Ùn ci hè pinseri. Mi sogu intesu cù quiddi chì ci vulia. Pudeti stà quì u tempu chì accori è più.

Scherzu cumpagnu ùn mi n’hà mai fattu nimu.

- Ùn si tratta di scherzu. Seti quiddu chì mi ci voli.

Par chì ùn chjuditi micca puntu è basta ? Tamantu dannu, butteghi chì si tirani l’usciu quantu ci n’hè ogni sittimana ? Ùn sareti po u prima…

- Hè par via di a spirenza, a v’aghju ditta. A spirenza hè ciò chì faci mova l’umanu gennaru, senza spirenza, finitu lu mondu, hè edda chì allumina l’esistenza, chì faci campà. A spirenza hè sola à pudè salvà l’omu di a barbaria, di l’abissu, di a morti. Quantu sò l’omini privi d’ogni spirenza è chì m’aspettani.

À chì nasci spirendu mori cachendu dicia u tintu di missiavu.

- Iè ma u puvarettu di missiavu eru un briaconu è dicia suventi sprapositi.

Hè vera, a m’hà conta babbu… Ma comu l’aveti cunnisciutu à missiavu ?

- Laghemu perda issa minighedda. Vi tocca ad accittà chì a spirenza cusì ùn si pò lagà mora. A sapeti, sogu vechju è certi volti mi trega di vultà in i lochi mei. À pocu à pocu, prupongu à calchissia, tè, propiu ad unu com’è vo, di piglià u seguitu in i me butteghi.

Ùn valsini nè chircheni nè brioni. L’anticariu a si tracciava aghjà voltu a porta è francava in carrughju.

- ‘eti da veda, ùn ci hè tantu à fà è mori ad imparà.

Era scumparitu l’umatali in un ammè. L’assenza di u patronu mi pugnia u cori. Ma eccu chì, davanti à a vitrina, una cascetta imbriava u zogliu. Quali sarà ad avella sposta ? Ùn la sapariu mai. Sempri accadi cusì, à l’assindotta, com’è chì nienti fussi. Drentu, maravigli da classificà è da tena contu.

Casu mai s’edda vi casca d’arruchjà in Borgu, pianteti par pena di viaghjà frumbatu, canseti vi ghjà ind’è l’anticariu, ch’è no raghjonghimi di u tempu, di a vita, di litteratura, di spirenza.

A mazzera di l'erbe

2011-05-05T02:44:00.000-07:00

Una nuvella di

Francesca Graziani

Mi pare d’esse raziunale. Ma à volte devu ricunnosce chì ci sò i tufoni in a mo raziunalità, razza di tufoni neri induve chì si sdrughje a mo lucidità, quandu incontru certe ghjente o chì impettu annantu à certi fatti strani...

A mo raziunalità serà babbu chì a m'hà legata ; ellu ùn cridia in nunda fora di a scienza. Ind'è ellu era guasi una religione. Mamma invece paria in rilazione cù un mondu misteriosu. Per un dettu, si misfidava di certe persone in paese chì vi "pudianu innuchjà", si signava ogni volta ch'ella l'infattava, avia spiecazione magiche pè l'evenimenti gattivi... Hè cusì chì malgratu i mo sforzi per esse « raziunale », ogni tantu aghju e frizzure, aghju cum'è un trattu in mente, sentu una vuciarella chì mi sussura : "è chi ne sai tù, di stu mondu al di là di l'apparenze ?"

Era falata in carrughju à bon'ora à cumprà u pane è aghju vistu una vechja in traccia di copre e vitture d'erbacce. À sapè induve ella l'avia trove, quì in piena cità ? U paraventu di a mo Twingo n'era tuttu imbruttatu, cum'è tutte e vitture staziunate da quì à u Corsu !

In tutta a cità hè cunnisciuta a vechja, a chjamanu "a mazzera", perchè pare di fà un'opera secreta, di compie una vindetta misteriosa contru à u mondu, cuprendu e vitture d'erbacciole, a matina à l'alba.

U mo amicu Battì m'hà spiecatu ch'ella era intuntita dipoi anni è anni, dopu à avè persu u maritu è i dui figlioli in un accidente di a strada. E ghjente si piglianu di peura ogni volta ch'elle trovanu l'erbe mischjate di terra è di mulizzu nantu à e so vitture. Quant'è chì a vechja li avessi lampatu una ghjastema è chì li avessi da cascà addossu qualchì malannu. Battì ridia quand'ellu vidia ciò ch'e no chjamavamu trà di noi "l'erbittate" di a mazzera, ma eiu mi sentia male, à dilla franca.

Quella matina, a mazzera dicia una spezia di precantula davanti à a Megane di u macellaru, tuttu spunenduci l'erbe puzziche ch'ella cacciava da un cabbà maiò, di quelli di a campagna di l'Uffiziu di l'ambiente, contru à i sacchi in plasticu : "Megliu pè a Corsica, ùn imbrutta micca a natura".

" è Diu ricunnuscerà à i soi..."

U macellaru hè surtitu cum'è un scemu, aghju vistu u mumentu ch'ellu a minava, a tinta !

"Cacciate subitu i vostri impiastri o vi facciu imbarcà per Sant’Antone, eiu"

Cascava male a vechja, hè maniacu quessu ! Passa e so duminicate à pulisce a so bella vittura, chì pare un uggettu sacratu per ellu ; mi scappava a risa, ma era megliu à ritenemi. L’omu era surtitu di capu. A meia a Twingo ùn risicava più nunda : hè sempre cuperta di a polvara di e duminicate in paese, a lavu quandu ci pensu, vale à dì guasi mai ! Contu nantu à l'acqua piuvana è 'ssi pochi tempi, ne fala chì ne fala !

Di colpu ùn ebbe più a voglia di ride, u mo sangue s'hè ghjacciatu, sò scurata : a mazzera ci hà fidiatu tramindui è i so ochji grisgi eranu quant’è dui stiletti chì mi attraversavanu cum'è per mettemi à nudu. Hà marmuttulatu qualcosa eppo hè partuta ver di u Corsu, sempre pricantulendu.

U macellaru in e furie messe à strufinà u so capò cum'è un dannatu, ripitendu senza fine : « ‘ssa strega, 'ssa vechja tonta, l'aghju da fà chjode in Sant’Antone, eiu, subitu subitu". M’hà fattu pena pè a vechja, quantunque. U macellaru mi facia peura anch’ellu, a so ira mi paria spripusitata, per una mansa di ferraglia !

Sò scappata ind'è a panattera à truvà un pocu di cunfortu è quandu sò vultata, u carrughju era pienu à ghjente chì briunavanu è ghjastimavanu, tuttu nittendu i paraventi di e so vitture cusì preziose. Morta di risa, mi sò scurdata di u sguardu di a vechja.

I "fenomeni" principionu a sera stessa in casa, rientrendu da u travagliu. In a sala, vidì dui masci di circa 8 è 10 anni, à pusà davanti à a televisione. Mi guardavanu. I so ochji grisgi eranu listessi listessi chè quelli di a vechja, dui stiletti d'acciaghju chì vi trapanavanu. Ùn eranu nè minacciosi, nè amichevuli, eranu neutri ! Ùn sapia chì fà. Ùn sò perchè, m'hè venuta di spegne a televisione è sò smarriti.

I ritruvava cusì ogni sera, à pusà, a televisione accesa, è ogni volta smarrianu quandu a spegnia. Aghju aspettatu duie settimane prima di parlanne à qualchissia. Ùn vidia ch'à Battì per cuntà stu fattu, ma avia da ridesi di mè. Ben intesa, hè ciò ch'ellu hà fattu.

- Allora, colla cù mè sta sera, è viderai ! li disse.

Tandu m'hà passatu un bracciu nantu à e spalle, guardendumi cù una risa piena à sott'intese : ah, hè un invitu? Ripigliemu?

Ridendu, li aghju sciaccatu un pugnu in e coste, per nigà u caldu deliziosu chì venia d’invadiscemi ; emu avutu una sturietta corta corta ma hè da un pezzu chè no simu "amichi"... Avà ùn ci pare mancu più pussibule di rifà l'amore inseme, ùn feriamu chè ride. Bah, perchè micca, s'è mai...?

A sera, i zitelli ci eranu, ma Battì ùn hà vistu à nimu. Si sbillicava senza pudè piantà. Eiu era dillusa.

- Iè, ma cumu a spiechi tù chì a televisione sia accesa?

- Ahè, iè ch’ùn ti cunnoscu, o sturdidò!

- Nò, o Battì, ùn accendu mai a televisione a matina !

- Allora, hè accesa dipoi eri sera ! Sì partuta à dorme senza spegnela !

Una questione mi frasturnava : chì ne facenu i fandonii di a televisione ?

- À a radiu aghju intesu una medium spiecà chì i fandonii si manifestavanu à spessu à traversu l'onde radiulettriche, mi disse Battì, un pocu sgenatu di mustrà ch'ellu s'interessava à 'ssi fenomeni, in fin di contu.

Sperava ch’ellu si fermeria à fà cena cun mè eppo… Ma hà ricevutu una telefunata nantu à u purtevule è si n’hè andatu. Sò turnata à accende a televisione è mi sò guardatu un bellu western, cù i dui fandonii accantu : chì mi pudianu fà ? Megliu a cumpagnia di spiriti nucenti chè a sulitudine assuluta capu à capu cù e mo pensate nere !

Un ghjornu mi sò ardita à parlà dinù cù u macellaru, chì a mazzera l’avia fidiatu anch'ellu cù quellu sguardu fissu di l'altru mondu. Paria sullevatu di pudè parlà infine. M'hà palisatu ch'ind'è ellu s'era « stallatu » un omu. Cum’è i zitelli, venia quandu a televisione era accesa, puru ùn era micca ellu à accendela. Fin'ad avà, ùn ne avia parlatu à nimu, per ùn esse pigliatu per un scemu.

Intantu avianu chjosu a vechja in Sant’Antone, l'ospetale pè i scemi è i depressivi. Sò cullata à vedela, senza sapè ciò ch'e pudia sperà di 'ssa visita.

L'aghju vista subitu, chì spassighjava in e viole di u parcu à mezu à tutti 'ssi disgraziati. Paria una morta viva, era un'ombra grisgia chì s'incugnava in un curridore trà i dui mondi. Grisgi i capelli, grisgi l'ochji, grisgia a pelle, grisgiu u so scurzale eternu. Ùn era cusì vechja à sente dì, ma era smancita, viutata da l'internu, strutta, ghizza cum'è un fruttu seccu. Mi dicia da mè à mè chi sti lochi di "cura" ti sterminavanu e ghjente invece di risanalle.

- O zì, li aghju dettu, a sò ch'è vo ete suffertu, mi dispiace per voi, di core, ma noi ùn ci simu per nunda. I vostri figlioli mi visitanu in casa è u vostru maritu cumparisce tutte e sere ind'è u macellaru. Ùn ci puderiate "liberà", per piacè ? Ùn dormu più ch’è un pezzu ...

Attempu mi dumandava s'ùn era intuntita anch’eiu, di crede chì a vechja avessi un putere qualunque. Forse chì Battì avia a ragiò, era a mo imaginazione chì mi burlava ? S’elli mi sentianu i duttori, avianu da chjodemi quì cun ella !

Ma ùn m'hà micca rispostu. Ùn m'hà mancu guardatu, m'hà giratu e spalle è s’hè alluntanata per strappà l’erbigliole di u giardinu. (Ahè, risanà, ùn hè risanata, mi dicia). Mi n'andava, quand'ella hà arrestatu a vittura : tenite, mettite 'ss'erbe nantu à u vostru canapè è tenitele trè ghjorni.

Dopu à trè ghjorni, i zitelli sò spariti è ùn l'aghju mai più visti. Aghju cunsigliatu à u macellaru di cullà in Sant’Antone ma ùn la si sentia micca di vede ciò ch'ellu chjamava a "Cour des miracles". Dicia chì ancu l’infirmieri eranu locchi quassù ! Per ùn rivede l'omu, ùn avia mai più accesu a televisione è n'era propiu cuntentu : "avà, leghju è vivu di più, sortu. D'altronde, vi presenteraghju a mo nova amica un di sti ghjorni, anderemu à piglià l'apperitivu ind'è Petru Paulu, d'accordu?"

- D'accordu.

Avà, tuttu và bè, ma Battì s'hè messu à leghje tutti i libri nantu à u paranurmale ch'ellu pò truvà. Hahaha!

Ingurdizia

2011-04-30T10:34:00.001-07:00

Una cronica di

Marcu Biancarelli

Passaraghju torra pà calchì straviatu, ma pocu premi, socu avvizzu. Dunca m’aghju da lampà listessi… A carri umana, vo, vi seti ghjà dumandatu chì gustu ‘dda t’avia ? Dui sturiani aviani inchiistatu, in i tempi, è intarrugatu l’archivii di u cannibalismu, pà circà di risponda à ‘ssa quistioni impurtanti. Trà altri quistioni cussì impurtanti, voddu dì. Com’è quissi di sapè chì piazza u fenomenu spavintosu di l’antrupufagia avia presu in a Stodia, quali era statu manghjatu, quandu, di chì manera, cù chì cundimenti.

Cussì Pierre-Antoine Bernheim è Guy Stavrides ci prupuniani, in 1992, u libru « Cannibales ! », ind’è Plon, chì, s’iddu ùn era mancu un capu d’opara in materia d’analisa psiculogica o antrupulogica, t’avia o mancu u meritu di fà u ghjiru storicu u più cumplettu annant’à u sughjettu. Una vera antulugia di u cannibalismu, i fatti discritti cù tutti i ditagli i più morbidi pussibuli. È sempri dinò, fattu raru ind’è i sturiani, cù un sensu di a risa di i più acuti. Ciò chì pirmittia quantunca di fà passà a bistecca, senza indigistioni.

Ma u gustu, dunca, pà vultà à i nosci quistiunamenti di u principiu. Bernheim è Stavrides faciani parlà l’attori : i più numarosi evucaiani una sumidda cù u purceddu, com’è ‘ssi marinari inglesi burulati in 1808 da l’indigenii di i Fidjì, chì l’aviani fattu tastà un prighjuneri di guerra. Cunfusioni cù u porcu dinò pà tutti i clienti d’un certu Fritz Haarmann, esecutatu in Hanovra in 1919, dopu ad avè vindutu à u so maceddu a carri di 24 aduliscenti spariti di pocu. Pà i Chinesi di u Medievu, inveci, l’omu t’avia più à veda cù a pecura. Cussì un essaru chì finia in tianu era chjamatu una « pecura à dui zampi ». Ma l’intarpritazioni di u gustu di l’omu pari d’essa liata à spissu à a sughjittività culturali. Par quissa ch’un Indianu di l’Orenocu, intarrugatu da Humboldt, pricisaia piuttostu a vicinanza cù a scimia. Difficiuli di fassi un avvisu. Almenu di pudè spirimintà. Ma via.

Altra quistioni di primura : quali hè statu cannibalu ? Chì populu ? I dui autori t’aviani u meritu di ramintà chì l’omu hè statu manghjatu in tutti i cuntrati, sutt’à tutti i latitudini. Certu, l’anziani populi di l’Uceania pariani d’avè un attichju più sviluppatu in u duminiu. Com’è l’Indiani d’America, chì si fecini arrusta una mora di cunquistadori. Ma quandu ci hè a fami ugnunu prova o mancu una volta una piccula custiglietta. Par esempiu, mentri a ritirata di Russia in 1812, i tistimunianzi ùn funi rari di cannibalismu in a Grandi Armata : una banda di suldati Cruati cacciò un corpu da un incendiu pà intazzallu ; u generali russiu Kreutz poti veda da par iddu certi suldati francesi in traccia di sciaccassi un catavaru in a nivi ; u tinenti alimanu Furtenbach vidisti i suldati imbruccà i cori umani nant’à i foca di i so campamenta…

Tutti i cannibalizati, puri, ùn funi micca cussì anonimi chè ‘ssi tinti militari disfatti è inguttiti da i so simuli. Uni pochi di parsunalità ani fattu dinò un picculu sughjornu in unu stomacu di sapiens sapiens. Com’è Caligula, chì, una volta assassinatu, fù spartutu trà i cunghjurati chì u s’erani sdunzatu. Altru mastuccatu famosu : Concino Concini, tumbu in 1617 par via d’un ordini di Lavighju XIII, è udiatu da u populu pariginu, chì fù cacciatu da a tomba par essa strascinatu in carrughju, scurticatu, brusgiatu, è manghjatu da a folla isterica. Monda spluratori di rinoma, dinò, o missiunarii di prima trinca finistini a so carriera in a panza d’un Indianu salvaticu : mintuvaremu solu i puvaretti di Juan de la Cosa, Giovanni Verrazano, James Cook, ancu, o ‘ssu disgraziatu di Jean de Brébeuf, à qualissu l’Iroquois, crudeli, taddoni l’anchi è i braccia par manghjassili davanti ad iddu, vivu ma ammutulitu. Chì l’aviani cacciatu a lingua par impidillu di briunà. Iscia.

Infini. Eccu da veru un libru da buscà, com’ì vo pudareti, è da purtà subitu annant’à l’isula diserta. Ma com’è manuali, ghjustappuntu, in casu chì l’isula fussi menu diserta chè ciò ch’idda paria.

Peccatu

2011-04-29T05:34:00.001-07:00

Una nuvella di

Jo Antonetti

Lurenzu sì discitò cun pene in ogni locu. Avia u so da fà à apre l’ochji, un dulore stranu in fondu di e reni, è u fretu nù u spinu cum’è quand’ellu si stracquava nant’à i pentoni di u fiume per fà e so sieste.

Pruvava à ramintassi a surtita di a veghja, ma ùn s’arricurdava di nunda, solu d’esse entratu nù un pub scantatu in i carrughji bughji di a vechja villa, un pub grisgiu senza musica nè musicanti, senza mancu clienti, solu u patrone, un omatale cun una faccia chjosa, è u servore chì era u cuntrariu assulutu di u so patrone, ma for’di quessa, nunda, u bughju. A sborgna duvia esse stata di quelle.

Aprì l’ochji. Ùn era micca nù a so camara,ùn era manca nù un lettu, era chjinatu in terra, spugliatu in cristu, e mani liate à catene appicate à u muru. Avia da chjamà, quandu a porta s’aprì, lascendu entre un lume rossu, seguitatu da dui omi vestuti à frate.

Quale site ? Induve sò ? Cappiatemi.

Senza dalli capu, l’omi sfacenu e liaie, arrizzanu à Lurenzu è li mettenu un paghju di manette è u puntanu in davanti, traversanu un curridore longu alluminatu à candele, piantanu davanti à una porta doppia di pinu, unu di i frati pichja trè colpi secchi.

Entrate simu pronti, risponde una vucetta da nentru.

Puntanu a porta, è leanu à Lurenzu nant’à una croce di sant’Andria po senza mancu un’ ochjata à l’omettu chì s’avvicina di a croce si licenzianu.

Chì mi vulete ? Chì facciu quì?

L’omu s’avvicina, Lurenzu ricunnosce u servore di u pub,piatta a so manu manca nù u spinu, cù a manu diritta li carezza a faccia.

Peccatu chè tù ùn sia di i nostri.

È quale sò i toii ?

Un possu dittila, piglierebbi troppu risichi. Avà tira a lingua per piacè.

Vai è pigliatila in culu

Un m’ublicà micca à fattila sorte di forza.

Ch’ai da fà tù, sì una scrizzula. Puru liatu ti crepu in co….

L’omu avia pigliatu in manu u minchju di Lurenzu è cun u paghju di trisori ch’ellu piattava nù u spinu, li avia tagliatu a punta. U sangue zirlava per ogni locu, Lurenzu avia ghjimbatu u capu è mughjava cum’è un persu, l’omu u chjappò per a cannella, per fallu piantà li cacciò a lingua di bocca è a tagliò d’un colpu seccu.

Lurenzu s’avia da svene, ma à u rimore di a porta sbattuta contr’à u muru, luttò per vede s’ellu ùn era qualchì aiutu chì venia à salvallu. Era u patrone di u pub.

Ùn hè ancu finitu stu tazzu ?

Ié o maè, n’aghju per pocu.

Hè quellu d’eri sera?

Ié o maè.

U metterai cun l’altri quand’è t’ai finitu. Peccatu ch’ellu ùn sia statu di i nostri, ci simu campati cun ellu eri sera.

Surtì sbattendu a porta. L’ochji sburlati di Lurenzu fidighjavanu u servore cherendu spiecazioni, peccatu peccatu muvrunava quellu, poi surtì un stilettu è scannò à Lurenzu, lascendulu senza risposta, cù i so ochji sburlati d’animale impauritu.

Finimondu (2/2)

2011-04-27T04:53:00.001-07:00

Una nuvella di
Jean-Yves Acquaviva

Zuppiccheddu l’avia fattu vede a so stanza, Fritz avia pinsatu, scuprendu la, chì custì ancu Cristofanu Culombu avaria rinculatu. Sei o sette metri quadrati, micca purtellu, un lettu di farru un pocu rughjinosu cù addossu una strapunta sicuramente lasciata da l’arcibabbone di i dui omi. In pianu, a vistica nera d’un focu, avia dumandatu ciò ch’ellu era. « C’est…A rata…Ici c’était un seccu avant. » Dopu à ‘ssa spiecazione linda, Fritz ùn avia più fattu dumande, li si paria d’avè capitu chì u mappamondu ci vulia à brusgià lu supitu vultatu in casa soia. « Manghjemu…On mange d’ici à peu. Je t’appelle… » Tuttu ciò ch’ellu vinia di vede è sente ùn dava tantu appitittu à Fritz, ma a fame c’era è po, ùn avia ancu vistu a carta.

Suppa, sirvuta nu piatti di u stessu serviziu c’à u vichjeru di prima è carne purcina astrita à u focu è lampata nant’à u tavulinu, eccu la a carta. « Sciluuupuuu, sciluupuuu » Era stata, à pocu pressu, a sola cunversazione di u ripastu. Dopu à avè capitu quant’ella era difficiule à magnà a suppa senza chì a cuchjara tucchessi a bocca, Fritz s’era risicatu à parlà. « Y a-t-il moyen de louer un quad par ici ? J’aimerais bien faire un tour demain, dans la forêt. » A custigliola chì Cosimu ruzzicava era vulata à sin’à un cane chì durmia in un scornu. Strignia a so cultella è vardava à fritz cù l’ochji scemi. « C’hà dittu ? » Zuppiccheddu, paria ghjustu di ciarbellu ma avia una spezia di bon’sensu naturale è avia intesu u periculu. « Nudda, nudda, lascia corri » Un angnulu era passatu, di corsa sarrata. « Demain, on tue les cochons. Ch’elli brusgiani in infernu cù i so quad ! » « Oui, demain, après que tu auras dormi bien, tu viens voir comme on tue les cochons. » Fritz avia ricusatu l’acqua vita è s’era chjinatu, in pianu nant’à u so mantellu è avia aspittatu u sonnu.

« Frittu, Frittu ! Hè ora, c’est heure ! » Fritz vardava a so mostra, 4 ore è mezu. Mancu u tempu di mette si nant’à i so pedi, Zuppiccheddu sbulava in camara. « T’es tombé du lit ? Y faut faire cas o Frittu. »

In cucina c’era Cosimu chì tinia u stessu discorsu c’à quellu di a viciglia, ma ‘ssa volta era caffè. Una oretta dopu, s’eranu messi in strada per andà à sin’à a casetta di i porchi. Longu u caminu, Zuppiccheddu avia spiecatu à Fritz chì u so fratellu era u più forte per tumbà i porchi. Cum’è ellu ùn ci n’era, « Mazza farrata » u chjamavanu in cantone. Ùn avia mai mancatu u so colpu, una mazzata è u porcu falava, seccu cum’è un chjodu. Qualchì volta, Cosimu u lasciava scannà l’animale, ma a mazzata in fronte, quessa, mancu pinsà ci di lascià la à un antru. « Autant y te laisse le scanner à toi. Demande.» Fritz viaghjava dumandendu si perchè chì c’era bisognu di fà passà un scanner à i porchi nanzu di tumbà li, forse per vede s’elli eranu malati è ùn intusicà a ghjente.

Ghjunti ch’elli eranu sopra à locu, Fritz avia ricunnisciutu supitu i sei purchetti ch’ellu avia scupartu u ghjornu nanzu. Si dicia chì i panioli à a cicculata avianu da esse vindicati oghje.

Era tuttu prontu, azzingate à un palancatu, c’era una pochi di canapi liati à astre è tantu tagliole per pudè appingà l’animali dopu amazzati. Sottu à ogni liatoghju c’era un stagnone prontu à ricote u sangue. Sei porchi, sei stagnoni, tuttu prontu.

Cosimu è Zuppiccheddu s’eranu fatti entre è Fritz, chì principiava à discità si, vardava u spitaculu. Zuppiccheddu chjappava un porcu per una patta, u si tirava à sè, pusava in tarra, infine piuttostu in fanga, strignendu a bestia contru à u so pettu mantinendu là ancu ella di culu in pianu. È a mazza falava, passava à un ditu di u capu di Zuppiccheddu è minava a fronte di u corciu purchettu. « Piglia ti…Prends toi ça ! » Avia dettu Zuppiccheddu lampendu una uchjata à Fritz. Avà quattru porchi eranu appesi è Fritz avia capitu chì nanzu, Casimodò ùn amintava mancu à pena a radiulugia.

Cosimu stava à pettu imbuffatu, fieru di fà scopre a so cumpetenza à ‘ssu turistu. Aspittava a so quinta vittima minendu di pede in tarra. U so fratellu l’avia chjappu è u tirava. Quessu era più mastinu, u più vechju sicuramente. Zuppiccheddu avia sculisciatu è l’avia cappiatu. Una siconda l’animale avia forse cridutu di salvà a so pelle, ma Cosimu avia pisatu a mazza è l’avia fatta falà cù una pricisione scirurgicale nant’à a capaccia. « À u volu ! Au vol ! » Era ancu più fieru è lasciava corre una risa grassa è petricosa. Ùn s’era micca arvistu chì u so fratellu si vultulava da a pena. « U mio polzu, puttana inculata m’aghju tortu u polzu » Vardendu à fritz cù l’ochji di l’addisperu avia ripitutu « Putain enculée, je m’ai tordu le… » Cum’è a parolla ùn vinia, scuzzulava a so manu sottu à u nasu di u giuvanottu chì era à l’orlu di svene si.

« È avà cumu femu per l’ultimu ? Sì veramente un sciappa cuchjara ! » Cosimu avia postu u so sguardu nant’à Fritz è quellu avia capitu supitu a so pinsata. « Pas question vous rigolez ? » « Pas souvent… » avia rispostu l’ercule. Dopu à una neguziazione degna di i cunflitti suciali i più arrabbiati, Fritz s’era ritrovu i pedi in a fanga à corre appressu à l’ultimu porcu. S’era strallatu duie o trè volte nanzu di riesce à piglià lu. S’era trovu ancu à cavallu à l’animale è pinsava à ‘ssu stallone neru ch’ellu bramava di dumà in i so sogni. Avà u tinia u più forte ch’ellu pudia, ma era cupartu di fanga ancu ellu è sguillava cum’è una savunetta. C’era mancatu pocu ch’ellu u cappiessi parechje volte è Cosimu sintia cullà l’impacenza. È po s’era calmatu d’un colpu, avia capitu forse, chì a so sorte era sugillata, ch’ella ùn valia à zirpittà tantu. Cosimu avia pisatu a mazza, stava appesa è Fritz aspittava ochjichjosu chì u martoriu pigliessi fine. « Aiò, tiens le bien ! Si y bouge, je vais frrrrapper à toi ! »

In più bella, u curghjolu chì tinia e braghe troppu larghe di Cosimu s’era strappatu. Si truvava in una pustura strana, i bracci pisati cù a mazza in aria, i pantaloni nant’à i scarpi è vinutu à ghjornu u rigalu rancigu chì a natura l’avia fattu. Qualcosa chì ùn avia nisunu raportu cù u restu di a so parsona. Dopu à u siscu di a suspresa, Fritz s’era messu à ride, à spanzà si ancu. Avia lasciatu scappà u purchettu è insignava à Cosimu cù u so ditu, ridendu è capighjendu ver’di Zuppiccheddu chì ellu ùn ridia mancu à pena. Cosimu ùn avia micca l’abbitutine di pisà a mazza per nulla. Quand’ella falava era per tumbà è basta. E ‘ssa volta torna era falata cù a pricisione d’unu orilogiu sguizzaru. « Ahè ! Hai fattu a toia avà » dicia Zuppiccheddu vugulendu di tondu. « Cumu emu da fà avà ? Ùn hai appruntatu c’à sei stagnoni… ».

Finimondu (1/2)

2011-04-26T11:32:00.000-07:00

Una nuvella di
Jean-Yves Acquaviva

Fritz era unu giuvanottu bè, cum’ellu si dice. Eredu d’una famiglia di banchieri sguizzari, prumessu à un distinu inchjappillatu d’oru. Era carcu à diplomi di e più grande università. In più di l’intelligenza, a natura li avia rigalatu ancu a billezza. À 25 anni era digià à capu d’una figliala di l’impresa famigliale. A settima generazione di a International Bank of Zurich. A sin’à oghje avia fattu a fiertà di u so babbu chì u vardava cresce è viaghjà in i so passi. Riccu, bellu, astutu, cultivatu, iè, Fritz avia tutu per suddisfà si di a so vita. Puru, ogni volta ch’ellu surtia d’un cunsigliu d’amministrazione duve ellu era statu sciaccamanatu per ognunu di i so detti, si sintia frustratu. Ogni mane ch’ellu si discitava à u latu d’una giuvanotta bellissima ch’ellu ùn avia mancu avutu bisognu à seduce per purtà la in lettu, chì l’eranu tutte appressu, li mancava qualcosa. Ùn sintia nisunu focu brusgià in ellu, nisuna passione è quessa u casticava in veru. Sunniava di viaghji, d’avinture à l’altru capu di u mondu. Si vidia cavalcà un stallone neru per e prese immense di l’attacamà o di l’ural. S’imaginava fendu prove tamante chì saparianu abbagliulà ogni principessa di i palazzi d’oriente.

Quella mane, dopu à una nuttata senza dorme, avia chjappu una dicisione. Si n’andaria u lindumane, senza avisà à nimu. À l’asgiu di a banca, di u so babbu è di tutti i piacè artifiziali di ‘ssa vita di lussu. Avia vistu in qualchì filmu cum’elli facianu l’omi avinturosi per sceglie una distinazione, lascendu fà l’azardu, fendu vugà u mappamondu è appughjendu cù un ditu, à a ceca, induv’ella cascava. Cusì avia fattu, vardava girà quellu cosu spirendu chì u distinu li buscaria un locu salvaticu da sprime tutte e so qualità d’eroe in anda. Avia chjosu l’ochji è avia avvicinatu u so ditu per arreghje u vocatondu. Sintia u legnu sfrisgià li a punta di l’indice, torna duie siconde è appughjaria. Li si paria d’esse digià unu antru omu, era digià à cavallu à u stallone. Eccu ! Apria l’ochji per scorbe ciò chì a sorte avia macinatu per ellu. Senza caccià u ditu, s’era calatu per vede megliu. Avia spiratu l’Australia, l’Africa Suttana, l’Argentina è…Era a Corsica.

À pinuccia dilusu ma bellu risulutu à ubbidisce à a manu di u distinu, appruntava e so robbe. Avia stampittatu nant’à Google « Corse sauvage » è avia trovu un bellu situ chì u rinsignava à bastanza bè nant’à u teatru di e so spolvari à vene. A cunniscia a Corsica, a cunniscia bè chì ci avia passatu parechje stonde di vacanze da zitellu. N’avia un ricordu turchinu, a fiura d’un mare d’ogliu è di rinaghji senza fine, ùn li paria tantu intintu di salvaticume u so ricordu. Lighjendu torna nant’à internet, avia scupartu una antra isula, quella di l’internu, di u veru core di ‘ssa tarra, « à spessu cunquista mai sottumessa ». Quessa li piacia, ritrosa, incunnisciuta, pronta à rivultà si à ogni inghjustizia. Finalmente u distinu ùn s’era micca futtutu d’ellu.

Cù a so carta bancaria, avia rigulatu tuttu, l’aviò, a vittura sopra à piazza, l’alloghju in un paisolu persu, tuttu. Era scalatu in Figari dui ghjorni dopu, era andatu à piglià u 4X4 ch’ellu avia risirvatu, prugramatu u GPS intrendu u nome di u paese : Finimondo, cum’ella era scritta nant’à a carta. È gira, è gira, è gira torna. U so stomacu ùn era ancu avvezzu bè à a so nova vita è soprattuttu ùn gustava c’à pocu u tracciatu di ‘ssu stradone. U paisolu, era una stonda ch’ellu l’avia in mira, ma ogni volta ch’ellu cridia di francà l’ultimu pughjale, un antru affaccava. È gira, è gira. Era statu custrettu à fà si una impuntata da alligerisce si un suppu. Mentre ch’ellu pisciava, ingullia l’aria fresca è pura, s’imbriacava d’ogni profume di a natura. Appinzendu u nasu, li era vinutu una tanfata menu dilicata. Annasendu cum’è un cane di caccia, avia suvitatu a puzza, chì puzza era, per ghjungne davanti à una spezia di baraccunnaciu fattu di palette è di tavulacce mezu fraciche. Nentru, avia trovu sei purchetti neri chì u fidighjavanu, curiosi. Era vultatu in vittura per piglià i dui panioli à a cicculata ch’ellu avia compru a mane è chì e girate l’avianu scuragitu di magnà. N’avia lampatu unu à i puchjuculi, o chì fraiu ! Avia rinculatu d’un passu videndu l’animali liticà si u corciu paniolu, si puntavanu, lampendu cum’è mughji acuti chì li stirpavanu l’arechje. Avia lampatu u sicondu è a so sorte era stata simule à quella di u primu. Fritz era chjappu d’una frizzura, pinsava ch’ella era megliu à ùn cascà quì nentru.

Torna duie o trè centu girate è era ghjuntu nant’à a piazzetta di u paisolu. Marzu muria ma ùn facia ancu tantu caldu. Avia avisatu una pancarta duv’ellu c’era scrittu : Alloghju casanu « U purcile ». « U purssil » avia dettu à voce alta, sicuramante u nome di qualchì muntagna altissima chì mai un omu ùn hà avutu curagiu à affruntà. Forse a si faria u lindumane ? Dopu à una pochi di passi nant’à un chjassu lamaghjosu è suminatu di e petre di u muru supranu, era ghjuntu in piazza à una casa mezu scialbata, mezu di bricche grisge. Era stunatu di truvà ‘ssu bastimentu di fattura à bastanza muderna, s’aspittava à qualchì casamentu anticu, alzatu tempi fà da ‘ss’omi chì sapianu cusì bè toglie da u granitu i quadri è i sopraporta chì davanu tantu nubilezza à e case di quì.

Avia scuzzulatu a campanella chì pindiculava à l’intrata. Una volta, duie, trè, dopu à a terza era piantatu di cuntà. Infine qualchì sia era affaccatu. Era un omu d’andatura strana, scontrafattu, una spezia di Casimodò campagnolu. « Bonjour, je suis Fritz schubenbacher, j’ai reservé pour la semaine. » Casimodò l’avia fighjatu qualchì siconda è po l’avia chjappu una manu è a l’avia trinicata una bella stonda. U so surisu, chì lasciava induvinà chì i dintisti eranu puchissimi per ‘ssi lochi, l’arricava un picculu disgustu. L’avia supitu rifrinatu, pinsendu à Cristofanu Culombu di punta à i primi americani ch’ellu avia scontru. L’omu ùn dicia nulla, ridichjulava è facia segnu à Fritz di suvità lu.

Eranu intruti in a prima pezza, s’assumigliava à una cucina. U focu era imburratu è sciuppittava forte. I catusci ghjugnianu à sin’à u tavulinu, caschendu nant’à una incirrata gialliccia. « Assis, assis », avia dettu l’umarellu cum’è s’ellu circava à parlà di manera curtese à un cane. Fritz s’era pusatu è avia postu un bracciu nant’à u tavulinu. L’avia ritiratu supitu, sintendu a pece nant’à a so pelle, l’era custata una pochi di peli.

« Caffè ? » Avia rispostu di sì senza pinsà ci è a rigrittava, u vichjeru era culor’caffè è purtantu era sempre viotu. Da fora, vinia qualchì sia. « Arrive mon frère».

« O Zuppicchè ! O Zuppiciccchhèèèè ! Ooo Zuppichhhhèèèè-errggm !!! » Fritz ùn rispirava più, u vucione l’avia insischitu à morte. Trimulava sintendu a scarpata pisia chì s’avvicinava. « Mon frère », avia dettu « Zuppiccheddu ». Cosimu stava in l’inquadratura di a porta, li ci vulia à aghjumpà si à pena per ùn inticcià di capu. Era unu ercule, una muntagna, una leccia siculare fatta omu. Zuppiccheddu era corsu, a si discutava cù u so fratellu in una linguaccia tuttu à fattu straniera à Fritz. Ellu chì pinsava chì cù u so francese parfettu, cù un picculu accente quant’unque, s’avia da sbruglià benissimu in Corsica, li si paria d’avè lettu in qualchì locu chì ‘ss’isula era francese. È po in Figari ùn avia micca intesu ‘ssu sabir gutturale chì li ramintava un pocu i canti di u Tyrol.

« Bonjourrr ! Comment tu restes, mon nom c’est Côme et toi ? » U tuppertù ingullitu, Fritz s’era prisintatu. Cosimu avia lampatu un rochju in u focu è era falatu di tuttu u so pesu in un futtogliu, chì à u colpu, avia stritatu a so suffranza.

A Luttaria

2011-04-16T10:19:00.000-07:00

Una nuvella di

Marceddu Jureczek

à George Orwell

Aghju da mora. A sò par chì a m’ani ditta à mumentu, quand’eddi m’ani stesu nantu à issu lettu.

Ùn andeti à creda ch’eddi sò gattivi. Sò stati propiu bravi cù mecu. Ma a m’ani ditta, ùn ci hè nudda di parsunali, mi devini tumbà è basta. Hè a leghji cusì.

Eccu l’infirmiera chì ghjugni a sciringa piena.

Mi fighjula. Li surridini l’ochji. L’acu s’infilza in una vena. Si sparghji quiddu liquidu verdi chì arreca a paci, a sirinità.

A m’ani imprumissa. I crergu. Infini, mi tocca à credali.

Hè vera ch’e sariu campatu par pena di di più. Ma chì vuleti fà, ci hè statu quiddu bigliettu di a Luttaria…

Bisogna forsa ch’e turressi à divvi a me passata da l’iniziu. Ci vol’ ch’e a dichi à calchissia, ci vol’ chì u mondu sappii. Mi tocca à svilà a virità.

Mi chjamu Lionzu. T’aghju trenta trè anni è sò (infini eru), impiigatu ind’è l’assicurenzi. U tippu chì vi manda i lettari pà annunciavvi chì si pò dà chì vi sighiti primurati pocu è micca di i danni pussibuli incausati da a ghjatta, i pesci rossi o di pruteghja i ghjuveddi di Mariassunta o chì a criatura in u viculu, chì ùn ci hè manera di chjuda ochji a notti, prestu ingrandata pudaria aguircià i so cumpagni di scola ed arrubbassi i vitturi di u quartieru. Èbbè, in tutti i guai di a vita, picculi o grossi, t’emu una risposta pronta à bedd’à posta, un cuntrattu à favvi signà.

Eccu ciò ch’eddu eru. Ma un ghjornu, ci volsi ch’edda ghjunsi a crisa, a puttanaccia, maladetta crisa ch’edda sprifondi. U numaru di i disuccupati criscìa chì basta.

L’affari erani à segnu mali. L’impresa pirdia mori soldi. La ghjenti ùn s’assicurava più postu ch’eddi ùn aviani più nienti à assicurà.

Divimi strigna u currighjolu senza altru dissini i capi amministratori. Femu prestu chì osinnò ci n’andemu tutti à a malavia. Eiu, impinsiritu eru pà l’andatura di l’impresa ma à contu meiu, eru sicuru di essa mantinutu à u me postu. I me statistichi erani boni è più, ogni annu aviu sempri migliuratu i me risultati, imbavuchjavu di più clienti cà quali voglia fussi l’impiigatu. Sapiu venda…

M’ani licinziatu. M’ani missu fora. Un calciu in culu, avvedaci è tanti saluti.

Da rè di l’assicurenzi eru turratu disuccupatu. È quissa ùn la sapiu fà. Circà travagliu si pudia sempri circà. Di a me più bedda scrittura elettronica, aghju stampittatu ùn sogu quantu lettari, dumandendu, po à l’ultima chirendu un impiigucciu, ancu pà impastà l’inviluppi di stupu.

I vosci qualificazioni ùn vi parmettini d’appratenda à un postu cumpagnu. Un’ antra manera di dimmi, và è mettitila in quiddu locu, o barnacà. Sè falatu à buleghju à u stercu di a sucità è ci ai da stà. D’altrondi solu ùn eru. Più di a mità di a pupulazioni di u paesi era tali è quali è mè. A crisa, a sapeti.

È sò longhi ed affannosi i ghjurnati di u disuccupatu. Ùn ci hè da tirà tanti salti.

I pochi soldi ch’eddu dà u guvernu ghjustu ghjustu s’eddi vi facini magnà. Anc’assai, c’era a televisiò. Issu rigalu divinu invintatu da culmà i ghjorni è i notti d’addisperu di quiddi à l’oziu. Chì vuleti fà, stavu à l’assolu. Una donna, mai ch’edda ni fussi ! Aviu sgubbatu senza rechiu da parvena à ciò ch’è t’aviu è avali ch’e ùn aviu più nienti, eru com’è un bisgiolcu, conciu è carminatu. A televisiò mi facìa da cumpagna. I prugrammi i cunniscìu tutti quanti. I telecompra, compra compra di a mani matina, cù a so robba framanti, indispinsevuli, à bon pattu (spiccetivi ghjà cari telespittatori chì ci n’hè pocu è micca da cantu). L’emissioni di cucina da mettavi a bocca in suchju quand’è vo seti avvezzi à sciaccavvi quiddu pezzu di ghjacciu quatratu chì à senta dì saria pesciu. L’infurmazioni di meza ghjurnata cù u so stolu di novi appacenti pà no altri i disucuppati (u guvernu si dà di rimenu da cumbatta a disucuppazioni, forza è curaghju cari telespittatori, intantu ùn vi sminticheti di u telefilmu di u dopumeziornu : l’ispittori avarà saputu quali hè chì hà tombu u vechju ricconu o tandu si ni sarà scappatu eddu cù a manicchina capibionda è puppulata, uh lu bruttu !). A sera, mi campavani quiddi emissioni chì i ghjovani voni divintà artisti ricchi è cunnisciuti senza mancu sapè fà un o di canna.

Vuliu essa mezzu à soldi eiu dinò, vuliu essa cunnisciutu è stimatu. U travagliu ùn arricchìa à nimu, quissa a lizziò ùn eru prontu à scurdammila. Inveci a televisò…

Passò a nuttata sveghju, l’ochji sbalangati ma senza mancu abbadà i maghjini invispiti chì sciuppavani nantu à u screnu. Sunniavu. Dumani, a mi tracciariu versu i scagni di l’agenzia di a disuccupazioni. L’infurmazioni annunciavani chì u guvernu avia trovu un mezu efficaci da sdrughja a massa di i privi di travagliu. Un attimu dopu, principiava quiddu ghjocu novu, a Luttaria.

Un palazzu grisgiu tarulatu à balconi chì ùn si poni cuntà da tantu ch’eddu ci n’hè, un furmiculaghju dundi s’accoglini à cintunari i funziunarii inaffaracciati da buscacci un travagliu o da ùn perda u soiu, eccu u ministeru di a disuccupazioni.

Pianu setti, scagnu duicentu sittantottu. Un descu neru longu longu chì impachjava a pezza, davanti una piccula carrega di plasticu, daretu un omu di meza ità persu in i pieghi di un carrigonu neru. Appesu à u muru, u ritrattu di u sgiò prisidenti, a faccia ammaschittata, tonda è liscia. U scontru principiò senz’altru.

- L’ufferti sò più cà schersi si pochi tempi, a vi dubbiteti. Mi dissi l’omu in pusonu daretu à u descu cù un surrisu largu è sticchitu, com’è disignatu di feltru. Ùn vi possu prupona nudda è nienti. Erati ind’è l’assicurenzi prima.

- Isiè, ma oghji mi piaciaria à scambià d’attività.

- Vi stocu à senta. Mi risposi.

- A televisiò, a televisiò m’intaressa mori. Comu ci vurrà à fà pà travagliacci ?

Di un colpu di renu, u funziunariu feci avanzà u so carrigonu, sposi i so voiti nantu à a tola, mi fighjulò in ochju.

- Ùn s’entri micca cusì faciuli à a televisiò. Cù a crisa, hè turrata primura statali. Tutti quiddi chì ci travagliani o chì ci ghjocani si spizzicani di fusu. Mi dispiaci à divvila, ma ùn possu accunsenta à a voscia dumanda. U scontru hè compiu, à truvacci da quì à un mesi.

Di colpu s’alzò è m’insignò a porta di bracciu.

- Intantu, u Statu vi rigala un bigliettu di a Luttaria à posta pà i disuccupati. Fà chì tuccarà à vo d’essa u prossimu vincitori. Avvedaci.

In u trasportu cullittivu chì mi purtuava in casa, stracciò a lettara datumi da u funziunariu. Indrentu, u solitu cartulari d’inchiesta à riempia, u me sceccu di l’allucazioni è un ticchettu ciaddu è rossu. Nantu ci era scrittu in neru : «Luttaria di a furtuna. Sola pà i disuccupati» sottu, setti filari di numari à davvi a pena in capu. Chì nasci spirendu, mori cachendu, dicia u tintu di babbu. Tutt’à manera, altru ùn si pudia fà.

In casa, senza tricà, accesi a televisiò. Ad ogni ora, ùn si parlava più cà di quidda luttaria. Diciani chì si tiraria dui volti à sittimana è chì ogni volta ci saria un vincitori. U prima premiu, una massa di soldi da favvi sminticà a disuccupazioni pà u sempri. Soldi abbastanza da campà in u lussu è u benistà pà cent’anni è più. Ch’avariati fattu vo ? vi sentu da quì, ma fetila finita. Avariati fattu com’è mè. Ci avariati cridutu. Avariati aspittatu ad ogni emissioni da veda s’eddi surtiani i biati sciffri di u ticchettu. Senza lavavvi, senza sbarbavvi, l’ochji sciarpati davanti à a televisiò.

I vincitori, ùn bastavani i soldi, t’aviani a so emissioni da eddi. L’avariati visti fendu a spacca cù i vitturi longhi da quì à culà è certi pezzi di donni chì pariani sciuti da calchì filmu di scenza finzioni. Spindacciavani à dritta è à manca senza mancu riguardu alcunu pà quiddi chì campacceghjani cù a limosina di u Statu. D’altrondi, nimu truveti à dì. Comu, uni pochi vastani tanti soldi, è part’è più di i parsoni facini i pacialaghji. Infini, eiu dinò aghju sunniatu. Filavani i sittimani è i prima vincitori sparisciani. Forsa si n’andavani à sciurassila ind’è l’isuli trupicali.

Eppò una sera l’animatrici, un pizzonu, vistuta à a moda chì paria meza cà spugliata, i culi spaccati da una siguletta, u surrisu largu è sticchitu, annunciò i risultati. Isiè, i me sciffri tutti quanti erani sciuti. I mei. È fighjula è fighjula è po fighjula un antru pocu, ùn pudia andà diversu. I listessi numari. M’aviani mintuvatu, nomu è casata. Avà sì chì ci aviu da passà à a televisiò.

U tempu scorsi in fughjina. Tanti soldi. Era com’è ad essa strascinatu da una fiumara pazza. A mani, mi scitavu in u lettu immensu, linzoli di seta è un paghju di donni à fiancu. A sera a me facciaccia era in i casi tutti quanti di la ghjenti da falli mantagà. Tuttu era licitu è facìu tuttu ciò chì piacìa à mè.

Ma c’era una tiscara à pagà. Megliu avariu fattu à sapella.

Una sera in a villà ch’e m’eru pagatu ancu i me soldi scuccagnati, m’appruntavu pà andà à l’emissioni di i vincitori. Un chjoccu spavintevuli feci trimà u casali tuttu quantu. Aviani spundatu a porta. Tanti è tanti passi putenti è dicisi ribumbavani in i curridori è i scali. In una scappiamanata, a camara s’era impiuta da una banda d’umatali vistuti di neru. Ùn ebbi mancu u tempu di vestami cù quiddu custumu turchinu fattumi à bedda posta da un sartori vistu à a televisiò. Aghju fattu pà agguantà u teleffonu è chjamà à l’aiutu ma ùn valsi. Una matanghitata secca mi sdragheti in terra. Intornu à mè, u mondu era turratu rossu. Un paghju di scarpi s’avvicineti. Una mani mi strinsi u polzu. Dopu più nienti.

Aghju da mora. A sò par chì a m’ani ditta à mumentu, quand’eddi m’ani stesu nantu à issu lettu.

Ùn andeti à creda ch’eddi sò gattivi. Sò stati propiu bravi cù mecu. Ma a m’ani ditta, ùn ci hè nudda di parsunali, mi devini tumbà è basta. Hè a leghji cusì. À chì vinci, devi mora.

Eccu l’infirmiera chì ghjugni a sciringa piena.

Mi fighjula. In faccia t’hà quiddu surrisu largu è sticchitu. Com’è fattu di feltru. L’acu s’infilza in una vena. Sparghji u liquidu verdi chì arreca a paci è a sirinità.

A mani imprumissa. I crergu. Infini, mi tocca à credali.

Hè vera ch’e sariu campatu vulinteri par pena di più.

Ma chì vuleti fà, m’era tocca ch’e vincissi à a Luttaria…

È ultima nutizia prima à mova, u guvernu a l’avia fatta à fà calà a disuccupazioni…